LUCAS 10

Canchis chungacunata huillanaman cachashcami

1Chaipaj q'uipami Mandaj Jesusca, shujtaj canchis chungacunatapish agllarca. Paicunataca pai maillaman rina cashca pueblocunamanmi ishqui ishquita ñaupachishpa cacharca. 2Cashna nishpami cacharca:

“Granocunata tandanaca achcami, ashtahuanpish tandajcunaca ashallami. Tandajcunata cachachun, Chagrayuj amota mañaichij. 3Richij, cancunataca atujcunapaj chaupiman ovejacunata cachaj shinami cachani. 4Cullqui muchilata, cucayu muchilata, pargatetapish ama apashpa ringuichijchu. Ñanpi allillachu cangui nishpaca, ama uniyanguichijchu. 5Maijan huasiman yaicushpaca: “Cai huasipica, sumaj causai tiyashca cachun” ninguichijraj. 6Sumaj causai cancunahuan cachun nishcata chai huasipi chasquisha nij tiyajpica, paicunahuanmi saquiringa. Ashtahuanpish mana chasquijpica cancunallahuantajmi ringa. 7Maijan huasipi chasquijpica, imatapish carashcata micushpa, ubyashpa chaillapitaj saquiringuichijlla. Taita Diospajta rurajca, pai causanapajca chaillamantatajmi japinga. Huasin huasinca ama puringuichijchu. 8Maijan puebloman yaicujpi paicuna chasquishpa carajpica, carashcata micunguichijlla. 9Chaipi ungushcacuna tiyajpi, alliyachishpaca: “Cancunata Taita Dios mandanamari ña c'uchuyamushca” nishpa huillanguichij. 10Mai puebloman yaicujpi cancunata mana chasquijpica, ñanman llujshishpaca cashna ninguichij: 11“¡Cancunapaj pueblopi cajpi ñucanchij chaquipi ñutu allpa japirishcatapish, cancuna llaqui tucuna cashcata ricuchishpami caillapitaj chaspinchij! Ashtahuanpish caitaca yuyaripanguichij: Taita Dios mandanaca cancunapaj c'uchullapimi carca” ninguichij. 12Chai pueblopi causajcunata Taita Dios llaquichi punllapica, Sodoma llajtapi causajcunata llaquichishcata yallimi llaquichinga. Chashnatajmi canga.

Taita Diosman mana cutirij pueblocunata llaquichinami

(Mt 11.20-24)

13Aij Corazinpi causajcunalla, aij Betsaidapi causajcunalla. ¡Imachari tucunguichij! Cancunapajpi rurashca shina milagrocunata Tiropi, Sidonpi rurashca cajpica, paicunarajchari Taita Diosman cutirishcata ricuchingapaj cañamazuta churarishpa, ushpapi tiyarinman carca. 14Imalla rurashcata Taita Dios ricuchi punllapica, cancunataca Tiropi, Sidonpi causajcunata yallimi jatunta llaquichinga. 15Capernaumpi causajcunalla, jahua pachamanmi apashca cashun yuyacunguichijmi. Ashtahuanpish ucu pachamanmari shitashca canguichij.

16Cancunata uyajca ñucatami uyan, cancunata p'iñajca ñucatami p'iñan. Ñucata p'iñajca, ñucata cachajtapishmi p'iñan” nircami.

Huillanaman cachashca canchis chungacuna tigrashcami

17Huillanaman cachashca canchis chungacuna cushicuihuan tigramushpaca:

–¡Mandaj Jesús, cambaj shutipi rimajpica supaicunapish cazunllami!– nircacunami.

18Chaimi Jesusca cashna nirca:

–Satanastaca, jahua pachamanta rayo shina urmajtami ñucaca ricurcani. 19Cancunamanca culebracunata, escorpioncunata saruna poderta, p'iñaj diablota cazuchina podertami cuni. Chaimanta cancunataca imata mana rurai tucungachu. 20Cancunaca supaicunata cazuchishpallaca ama cushicuichijchu. Ashtahuanpish cancunapaj shuticuna jahua pacha libropi quillcashca cashcamanta cushicuichij– nircami.

Jesús cushicushcami

(Mt 11.25-27; 13.16-17)

21Chai horasllatajmi Jesusca jucha illaj Espíritu cushichijpi achcata cushicushpa cashna nirca:

–Jahua pachata, cai pachata Mandaj ñuca Yaya, ñucaca cantami alabani. Caicunataca alli yuyaiyuj, yachaisapacunamanca mana ricuchishcanguichu. Huahuacuna shina manaraj yachajcunamanmi ricuchishcangui. Ñuca Yayitu, canllatajmari chashna tucuchun munashcangui.

22Ñuca Yayaca tucuitami ñucamanca curca. Churi pi cashcatapish pi mana rijsinchu, Yayallami rijsin. Yaya pi cashcatapish pi mana rijsinchu, Churillami rijsin. Pi cashpapish Churi rijsichisha nishcacunallami, Yayataca rijsin– nircami.

23Yachacujcunapajman tigrarishpaca, paicunallatami cashna nirca:

–Cancuna ricucunta paicunapaj ñahuihuantaj ricujcunataca, cushichishcami canga. 24Profetacunapish, jatun mandajcunapish cancuna ricucunta ricunaihuan cashpapish, mana ricurcacunachu. Cancuna uyacunta uyanaihuan cashpapish, mana uyarcacunachu. Chaica chashnatajmi– nircami.

Samaria llajtamanta caj alli runamanta Jesús parlashcami

25Mandashcacuna ima nisha nishcata yachachij shuj runami, Jesús imapi pandarijpica juchachingapaj nishpa cashna tapurca:

–Yachachij ¿imata rurashpataj huiñai causaita japisha?– nijpi, 26Jesusca:

–Mandashcapica ¿imata quillcashcataj tiyacun, chaitaca ima cashcatataj rezashcanguiyari?– nirca.

27Chaimi chai yachachijca:

–Mandaj cambaj Taita Diosta tucui shunguhuan, tucui almahuan, tucui fuerzahuan, tucui yuyaihuan c'uyangui. Can quiquinta shinallataj shujtajcunatapish c'uyangui ninmi– nirca.

28Chaimi Jesusca:

–Allitami nishcangui. Chaicunata pajtachishpaca huiñai causaita charinguimi– nirca.

29Pai ashtahuan alli ricurisha nishpami chai runaca:

–¿Pi shujtajtataj c'uyana cani?– nirca.

30Chaimi Jesusca, cashna nirca:

–Shuj runami Jerusalenmanta Jericoman uriyacushpa, shuhuacunapaj maquipi urmarca. Paitaca imalla charishcacunata quichushpa, chugrichishpa, ch'ahuata huañuchishpami saquishpa rircacuna. 31Chaipica shuj cura chai ñanta uriyacushpa chaita ricushpapish pasashpa rircallami. 32Shinallataj shuj levitapish chai ñanllatataj uriyacushpa chai siricuj runata ricushpaca, pasashpa rircallami. 33Ashtahuanpish Samaria llajtamanta shuj runapish chai ñanllatataj shamucushpami, chaiman c'uchuyashpa ricushpaca, shungumanta llaquirishpa, 34c'uchuyashpaca aceitehuan, vinohuan chugricunata jambishpa linsohuan pilluchishpaca, paipaj burro jahuapi churashpa pozadaman pushashpa paitaca cuidarca. 35Cayandij punllata ña rigrishpaca, ishqui denariota pozadayujman cushpami: “Alli cuidapangui, cai cullqui mana pajtajpipish, tigramushpa cushallami” nishpa saquirca. 36Chai ñanta ricuj quimsacunamantaca canpica ¿maijantaj pai quiquinta llaquij shinallataj llaquishca yuyachin?– nirca.

37Mandashcacunata yachachijca:

–Paita llaquishpa ayudaj runari– nijpi, Jesusca:

–Canpish chashnallataj ruragri– nirca.

Martapaj Mariapaj huasiman Jesús rishcami

38Chai q'uipami Jesusca paipaj yachacujcunandij rishpa shuj uchilla llajtaman chayarca. Chaiman chayajpica, Marta shuti huarmimi paipaj huasiman pusharca. 39Martaca, María shuti shuj ñañatami charirca. Mariaca, Jesuspaj ñaupajpi tiyarishpami, pai yachachishcata uyacurca. 40Ashtahuanpish Martaca, huasi ucupi caita chaita rurana yuyailla cashpami, Jesuspajman rishpaca:

–Mandaj Jesús caita chaita ñucalla rurachun ñuca ñaña saquijtaca ¿manachu ricungui? Ri ayudagri niyari– nirca.

41Chaimi Jesusca cashna nirca:

–Marta, Marta, canca caitapish chaitapish rurasha nishpamari musparicungui. 42Ashtahuanpish shujllata ruranamari alli. Mariaca ashtahuan allitami agllashca, chaitaca pi mana quichungachu– nirca.

Currently Selected:

LUCAS 10: QCHI04

Highlight

Copy