LUCAS 7
7
Patsaj soldadocunata mandajpajta rurajta Jesús alliyachishcami
(Mt 8.5-13)
1Jesusca paita uyajcunaman ña tucui parlashca q'uipaca, Capernaummanmi rirca. 2Chaipica patsaj soldadocunata mandajpaj achcata c'uyashca paipajta rurajmi, huañunalla ancha ungushca carca. 3Chai mandajca, Jesusmanta parlanacujta uyashpami, judiocunata cunaj maijan yuyajcunata paipajta rurajta alliyachichun Jesusta rogashpa pushamugrichij nishpa cacharca. 4Paicuna Jesuspajman chayashpaca, patsaj soldadocunata mandaj imata nishcata huillashpami cashna nishpa rogarcacuna:
–Paica allita rurajmi, chaimanta paitapish ayudapai. 5Paica ñucanchij judiocunata c'uyashpa shuj sinagogatami shayachirca– nircacunami.
6Jesusca paicunahuanmi rirca. Ashtahuanpish huasiman chayagricujpimi, patsaj soldadocunata mandajca paihuan alli apanacuj maijancunata cashna nichun cacharca:
–Amito, mana p'iñachisha ninichu. Ñucaca allillapish cajpichu, ñuca huasimanca yaicunguiyari. 7Ñucaca cambajmanca mana ripajllapish cashpami mana ri tucurcani. Ashtahuanpish chaillamanta rimapai, ñucapajta rurajca alliyangallami. 8Ñucapish mandaj churashca cashcamanta, mandangapaj soldadocunatami charini. Maijanta: “Ri” nijpica rinllami, shujtajta: “Shamui” nijpipish shamunllami. Ñucapajta rurajtapish: “Caita rurai” nijpica, chaita ruranllami– nircami.
9Chaita Jesús uyashpaca, mancharishpami caticujcunapajman tigrarishpaca:
–Cashnami nini: Cashna yallitaj crijtaca, Israelpipish manataj japishcanichu– nirca.
10Cachashcacuna huasiman tigramushpaca, ungushca servijtaca alliyashcatami japircacuna.
Viudapaj churita Jesús causachishcami
11Chashna tucushca q'uipaca Jesusca achca yachacujcunandij, achca runacunandijmi Naín puebloman rirca. 12Puebloman yaicuna punguman chayagricujpica, viuda mamapaj shujlla churi huañushcatami pambanaman apacurcacuna. Pueblomanta achcacunami paihuanca ricurcacuna. 13Mandaj Jesusca chai viudata ricushpa llaquishpami:
–Ama huacaichu– nirca.
14Pai c'uchuyashpa huañushcata apacun huandupi tuparijpi huandujcuna shayarijpica Jesusca:
–Huambra, cantaca jatari ninimi– nijpi, 15huañushca jatarishpa rimai callarijpica, chai huambrataca paipaj mamamanmi curca. 16Chaita ricushpaca tucuicuna yallitaj mancharinacushpa Taita Diosta sumajmari cangui nishpaca: “Ñucanchijpurapica, shuj jatun profetami ricurishca. Taita Diosmari paipaj cajcunata ricuj shamushca” nircacuna.
17Jesús chashna rurashcaca tucui Judeapi, tucui muyundij llajtacunapimi huashan huashan yachaj chayarirca.
Bautizaj Juanpaj yachacujcuna Jesusta tapushcami
(Mt 11.2-19)
18Jesús chashna rurashcataca bautizaj Juanmanca paipaj yachacujcunami tucuita huillarcacuna. Chaimi Juanca paipaj yachacujcunamanta ishquita cayashpaca: 19“¿Canchu chai shamuna cashcaca cangui, mana cashpaca shujtajtachu shuyana canchij?” nishpa tapugrichun Jesuspajman cacharca.
20Paicuna Jesuspajman chayashpaca:
–“¿Canchu chai shamuna cashcaca cangui, mana cashpaca shujtajtachu shuyana canchij?” ninmi bautizaj Juanca– nishpami tapurcacuna.
21Paicuna chaillapitaj cajpimi, ima ungüihuan caj achcacunata, llaquichij ungüihuan cajcunata, millai espiritucuna japishcacunata, mana ricujcunatapish achcacunata alliyachirca. 22Chaimi Jesusca:
–Richij, cancuna imata ricushcata, uyashcata, ñahui mana ricujcuna ricushcata, cojocuna purishcata, leprahuan cajcuna alliyashcata, mana uyajcuna uyashcata, huañushcacuna causarishcata, huajchacunamanpish alli huillaita huillashcata bautizaj Juanmanca huillagrichij. 23Maijanpish ñucapi mana ñitcarijca cushichishcami canga– nircami.
24Bautizaj Juan cachashcacuna rishca q'uipami, Jesusca tucui chaipi cajcunaman Juanmantaca cashna parlai callarirca:
–Shitashca pambapica ¿imata ricungapajtaj rircanguichij? ¿Shuj carrizota huaira caiman chaiman cuyuchicujtachu ricugrircanguichij? 25Mana cashpaca ¿shuj runa sumaj churanacunata churarishcatachu ricugrircanguichij? Sumajta churarishcacunaca, jatun mandajcunapaj huasicunallapimi cushicushpa causancuna. 26Shina cajpica ¿imata ricungapajtaj llujshircanguichij? ¿Shuj profetata? Ari, cashnami nini: Paica profetatapish yallimari. 27Bautizaj Juanmantaca, cashna quillcashcami tiyacun:
“Ñuca ima nishcata huillajtaca cambaj ñaupami cachani.
Paimi cambaj ñaupa rishpa, can purina ñanta allichinga” nishcami.
28Cancunaman huillanimi: Cai pachapi huacharishcacunapurapica, bautizaj Juanta yalli allica pi mana tiyashcachu. Shina cajpipish cai pachapi imapish mana cajcunami Taita Dios mandacujpica, bautizaj Juanta yalli cangacuna– nircami.
29Tucui chaipi cajcunapish, impuestota japijcunapish Juan bautizashca cashcamantami Jesús chashna nijta uyashpaca: “Taita Diosca allitamari rurashca” nircacuna. 30Fariseocunapish, Mandashcacuna ima nisha nishcata yachachijcunapish Juan bautizacujpi mana bautizarijcunaca, Dios ima shina paicunapaj allita ruracushcataca p'iñashpami mana chasquishun nircacuna.
31Mandaj Jesusca cashnapish nircami:
–Cunan cai punlla causajcunataca ¿imahuantaj ch'imbapurashari? ¿Imaman rijchajcunataj canguichijchu imamí? 32Paicunaca plazapi tiyacuj huambracuna caishuj chaishuj cashna caparicuj shinami: “Flautapi tocajpipish, mana bailarcanguichijchu. Huañuipi cantanata tocajpipish mana huacarcanguichijchu” nicuj shinami. 33Bautizaj Juan shamushpaca, mana micuj, vinota mana ubyajmi carca. Paitaca: “Supaitami charin” ninguichijmi. 34Runa Aichayuj tucushpa shamujca micujmi, ubyajmi. Chai runaca: “Achcata micujmi, vinotapish ubyajmi, impuestota japijcunahuan, juchayujcunahuanpish tandanacunllami” ninguichijmi. 35Ashtahuanpish Taita Dios yachaj cashcataca paipaj huahuacunallami alli nincuna– nircami.
Jesusca Simón shuti fariseopaj huasipi cashcami
36Chai q'uipami fariseocunapuramanta shuj runaca, ñuca huasipi jacu micushun nishpa rogajpi Jesús rishpaca micungapaj tiyarirca. 37Chai pueblopica juchasapa shuj huarmimi causarca. Paica fariseopaj huasipi Jesús micucujta yachashpami, alabastro botellapi mishquijllata ashnacujta apashpa shamurca. 38Paica Jesuspaj huasha ladota shamushpami paipaj chaquiman cumurishpa achcata huacashpa chaquipi huiquita shutuchi callarirca. Chaitaca paipaj ajchahuan chaquichishpami, chaquita muchashpa pai apashca mishquijllata ashnacujtapish Jesuspaj chaquipi tallirca. 39Chaita ricushpami micunaman cayaj fariseoca paipaj yuyaipica: “Caica profetataj cashpaca, chai huarmi pi cashcata, ima shina huarmi paipaj chaquipi tuparicujtaca yachanmanmi. Chai huarmica juchasapamari” niricurcami.
40Chaimi Jesusca:
–Simón, cantaca caitami nisha nini– nijpi fariseoca:
–Nipailla, Yachachij– nijpi, 41Jesusca:
–Cullquita mañachij shuj runami ishqui debijcunata charirca: Shujca pichca patsaj denariota, caishujca pichca chunga denariotami debirca. 42Chai debijcuna imata mana pagai tucujpica, ishquindijtatajmi perdonarca. Canca ¿imatataj yuyangui? Chai ishquimantaca ¿maijanshi yalli c'uyanga?– nirca.
43Chaimi Simón fariseoca:
–Maijantami yalli debita perdonarca, chaimi yalli c'uyanga yuyanimi– nijpi Jesusca:
–Allitamari ningui– nirca.
44Chai huarmita ricushpami Simontaca:
–¿Cai huarmi imata rurajta ricunguichu? Cambaj huasiman yaicumujpica, ñuca chaquita maillachun yacuta mana curcanguichu. Ashtahuanpish cai huarmica, ñuca chaquita huiquihuan maillashpami paipaj ajchahuan chaquichirca. 45Canca ñucataca allillachu cangui nishpaca mana mucharcanguichu. Ashtahuanpish cai huarmica yaicumuimanta pachami, ñuca chaquitaca muchacunlla. 46Canca ñuca umapipish aceitetahuan mana churarcanguichu. Ashtahuanpish cai huarmica mishquijllata ashnacujtami, ñuca chaquipi churan. 47Chaimantami cantaca cashna nini: Paipaj achca juchacunata perdonashcata yachashpami, cai huarmica ñucataca achcata c'uyan. Ashalla juchacunata perdonashcacunaca ashallatami c'uyan– nirca.
48Jesusca chai huarmitaca:
–Cambaj juchacunaca perdonashcami– nircami.
49Chaimi mezapi Jesushuan tandalla micucujcunaca:
–¿Cai runaca pi cashpataj juchacunata perdonani ninchu imamí?– nishpami paicunapuralla ninacucurcacuna.
50Ashtahuanpish Jesusca chai huarmitaca:
–Canca crishcamantami quishpichishca cangui, sumajta causagrilla– nirca.
Currently Selected:
LUCAS 7: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.
