LUCAS 6
6
Yachacujcuna samana punllapi trigo caspata c'utsashcami
(Mt 12.1-8; Mr 2.23-28)
1Samana punllapimi Jesusca chagra chaupita ricurca. Chaipimi paipaj yachacujcunaca trigo caspata c'utsashpa, maquihuan c'acushpa micurcacuna. 2Chaita maijan fariseocuna ricushpaca:
–¿Ima nishpataj samana punllapi mana rurana cashcata ruracunguichij?– nijpi, 3Jesusca:
–Davidpish paihuan cajcunapish yaricaihuan cashcamanta, imata rurashcataca ¿manachu rezashcanguichijllapish? 4Paica Diospaj huasiman yaicushpaca, Diosman cushca tandata japishpami micurca. Paihuan cajcunamanpish cararcami. Chai tandataca mana pipish micunallachu carca. Curacunallami micuna carca– nircami.
5Shinallataj:
–Runa Aichayujca, samana punllatapish Mandajmi– nircami.
Chaquishca maquita alliyachishcami
(Mt 12.9-14; Mr 3.1-6)
6Chai q'uipapish samana punllallapitajmi Jesusca sinagogaman yaicushpa yachachirca. Chaipica alli lado maqui chaquishca shuj runami tiyacurca. 7Samana punllapi chai runata Jesús alliyachijpica juchachingapajmi, mandashcacunata quillcajcuna, fariseocunapish chaparacurcacuna. 8Ashtahuanpish Jesusca, paicuna cashna yuyacujta yachashpami, chaquishca maquiyuj runataca:
–Jatari, caicunapaj chaupipi shayari– nijpica, jatarishcahuan shayarirca.
9Chaimi Jesusca:
–Cancunataca caita tapusha: Samana punllapica ¿allita ruranachu, mana cashpaca mana allita ruranachu, huañuimanta quishpichinachu, mana cashpaca huañuchinachu, imata ruranataj alli canga?– nirca.
10Chai tucuicunata muyundijta ricushpami, chai runataca:
–Cambaj maquita chutai– nirca.
Pai chutajpica, chai maquica alliyarcallami. 11Chashna rurajpica yallitaj p'iñarishpami Jesustaca ¿imatataj rurashun? nishpa caishuj chaishuj parlanacurcacuna.
Chunga ishqui apostolcunata Jesús agllashcami
(Mt 10.1-4; Mr 3.13-19)
12Chai punllacunapimi Jesusca, Diosta mañangapaj urcuman rirca. Chaipica tucui tutami Diosta mañarca. 13Ña achijyajpica paita caticujcunata cayashpami, paicunapuramanta chunga ishquita agllarca. Paicunatami apostolcunata shutichirca. 14Chai agllashcacunaca: Simón paillatatajmi Pedro nijpish carca. Simonpaj huauqui Andrespish, Jacobopish, Juanpish, Felipepish, Bartolomepish, 15Mateopish, Tomaspish, Alfeopaj churi Jacobopishmi carca. Llajtapi quiquin mandajta charingapaj macanacujpuramanta Simonpish, 16Jacobopaj huauqui Judaspish, Judas Iscariotepishmi carca. Paimi, Jesusta huañuchichun japichij carca.
Achcacunaman Jesús yachachishcami
(Mt 4.23-25)
17Jesusca paipaj yachacujcunandij urcumanta uriyamushpaca, shuj pambapimi paita catij achcacunandij carca. Chaimanca tucui Judeamanta, Jerusalenmanta, mama cucha uripi caj Tiromanta, Sidonmantapishmi Jesús yachachishcata uyangapaj, ungüicunamanta alliyachishca cangapajpish shamushcacuna carca. 18Chaipica millai espiritucuna llaquichishca cashcacunatapish alliyachircami. 19Tucui ungüihuan cajcunata alliyachina poderta charijta ricushpami, tucuicuna Jesuspica tuparishun nircacuna.
Cunan huacacujcunaca cushichishcami canga, cunan cushicucujcunaca huacangacunami
(Mt 5.1-12)
20Jesusca, paipaj yachacujcunata ricushpaca cashnami nirca:
“Huajchacunaca, cushichishcami canguichij.
Taita Dios mandagrinca cancunapajmi.
21Cunan yaricaihuan cajcunaca, cushichishcami canguichij.
Mana nijtami micunguichij.
Cunan huacacujcunaca, cushichishcami canguichij, yallitajmi asinguichij.
22Runa Aichayujta caticushcamanta runacuna p'iñajpi, mana ricunachishpa paicunapuramanta anchuchijpi, cancunapaj shutitaca millaita rurajta shina yangata rurashpa c'amijpipish cushichishcami canguichij.
23Chai punllacunapica, yallitajmi cushicunguichij. Cancuna jahua pachapi japina cashcaca, tucuita yalli jatunmari. Paicunapaj ñaupa yayacunapish, profetacunata chashnallataj llaquichijcunami carca.
24Aij, achcata charijcunalla, cancuna charishcahuan ña cushicucushcamanta ¡imachari tucunguichij!
25Aij, cunan mana nijta micucujcunalla q'uipataca yaricaihuan ¡imachari tucunguichij!
¡Aij, cunan asicujcunalla! Q'uipataca achcata llaquirishpami huacanguichij.
26Tucui runacuna cunan alli nishcacunalla ¡aij, imachari tucunguichij! Paicunapaj ñaupa yayacunapish, llulla profetacunatarajmi alli nijcuna carca.
P'iñajcunatapish c'uyanami
(Mt 5.38-48; 7.12)
27Ashtahuanpish cunan caipi uyacujcunataca, cashnami nini: Cancunata p'iñajcunataca c'uyaichij, cancunata llaquichijcunapajca allita ruraichij. 28Llaqui tucushca canman nijcunataca alli cashca cuchun nichij, yanga juchachijcunamantaca Taita Diosta mañaichij. 29Shuj lado quijadospi huajtajpica, caishuj ladotapish ricuchingui. Jahua churanata quichujpica, camizatapish apachun saquinguilla. 30Maijan canta imata mañajpica, cunguilla. Cambajta maijan imata apajpica, tigrachi nishpa ama mañangui. 31Ima shinami shujtajcunataca cancunapaj allita rurachun munanguichij, chashnallataj cancunapish shujtajcunapaj allita ruraichij.
32Cancunata c'uyajcunallata c'uyashpaca, ima allita mana ruranguichijchu. Juchayujcunapish paicunata c'uyajcunataca c'uyanllatajmi. 33Cancunapaj allita rurajcunapajlla allita rurashpaca, ima allita mana ruranguichijchu. Juchayujcunapish chashnaca ruranllatajmi. 34Imata mañachishpapish, mañachishcamanta imata japina yuyailla mañachishpaca, ima allita mana ruranguichijchu. Juchayujcunapish imata japina yuyaillahuanca mañachinacunllami. 35Ashtahuanpish cancunata p'iñajcunata c'uyashpa, paicunapaj allita ruraichij. Imata mañachishpaca chaimanta imata japinataca ama yuyaichijchu. Cancuna japinaca tucuimanta alli jatunmi. Jahua pachapi caj Taita Diospaj huahuacunami canguichij. Taita Diosca mana pagui nijcunatapish, mana allicunatapish llaquijmi. 36Cancunapaj Yaya llaquij caj shinallataj, cancunapish llaquijcuna caichij.
Pitapish mana juchachinallachu
(Mt 7.1-5)
37Pitapish ama juchachichijchu. Cancunatapish Taita Dios ama juchachichun. Pitapish caitaca llaquichinatajmi ama nichijchu. Cancunatapish Taita Dios ama llaquichichun. Shujtajcunata perdonaj caichij, cancunatapish Taita Dios perdonachun. 38Shujtajcunaman cuichij, Taita Diospish cancunamanca jatun jatunpi tushuchishpa, llapishpa talliricujtami cunga. Cancuna ima shinami shujtajcunaman jatun jatunpi cunguichij, chashnallatajmi cancunamanpish cunga” nircami.
39Shuj yuyachij parlohuanpish cashnami nirca: “¿Mana ricujca, caishuj mana ricujtaca pushai tucungachari? ¿Manachu ishquindijtaj jutcupi huashicunman? 40Yachacujca paita yachachijtaca mana yallichu. Yachanata tucuchishpami paita yachachij shina tucunga.
41¿Ima nishpataj cambaj huauquipaj ñahuipi ujsha tiyacujtaraj ricungui? Cambaj quiquin ñahuipi jatun caspi tiyacujtaca manamari ricunguichu. 42Cambaj ñahuipi jatun caspi tiyacujta mana anchuchishpaca ¿ima shinataj huauquitaca: “Huauqui, cambaj ñahuipi tiyacuj ujshata shuyai llujshichisha” ninguiyari? Mishqui shimi jayaj shungu, cambaj ñahuipi tiyacuj caspitaraj llujshichiyari. Chashnami huauquipaj ñahuipi tiyacuj ujshataca alli ricushpa llujshichingui” nircami.
Alli yura cashcatapish mana alli yura cashcatapish grano p'ucujpimi ricuna
(Mt 7.17-20; 12.34-35)
43Alli yurapica mana alli granoca, mana p'ucunchu. Mana alli yurapipish, alli granoca mana p'ucunchu. 44Ima yura cajpipish, grano p'ucujpimi rijsinchij. Higocunataca mana casha yuramantaca tandanchu. Uvascunatapish mana zarza cashamanta tandanchu. 45Alli runaca, sumaj yuyaicunata shungupi huaquichishca cashpami allita riman. Millai runaca, millai yuyaicunata shungupi huaquichishca cashpami millaita riman. Shungupi imami junda tiyan chaillatajmi shimimanca llujshin.
Sinchi allpapi t'iyu allpapi huasichijcunamanta parlashcami
(Mt 7.24-27)
46“¿Ima nishpataj manapish ñuca nishcata rurashpa ñucataca: “Mandaj Jesús, Mandaj Jesús” ninguichigari? 47Pipish ñucapajman shamushpa ñuca huillashcata uyashpa cazujca, ima shina cana cashcatami ricuchigrini: 48Paica, ucujta allashpa yacu rumi jahuapi huasita shayachij runa shinami. Yacu rumi jahuapi alli shayachishca huasitaca, tamya shamushpa jatun yacu jatarishpa sinchita huajtashpapish mana cuyuchi tucurcachu. 49Ashtahuanpish ñuca huillashcata uyashpa mana rurajca, ucujta mana allashpa, allpa jahuallapi huasichij runa shinami. Chai huasica tamyajpi jatun yacu jatarishpa sinchita huajtajpica urmarcami. Chaipica jatun mancharina llaquimi carca” nircami.
Currently Selected:
LUCAS 6: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.
