DEUTERONOMIO 33
33
Moisesca chunga ishqui aillucunata alli cashca canguichijman nishcami
1Diospaj runa Moisesca pai manaraj huañushpami, tucui israelcunataca alli cashca canguichijman nishpa, 2cashna nirca:
“Mandaj Diosca Sinaimantami shamurca.
Seir urcumantami achijyachirca.
Parán urcumantami achij nicuj ricurirca.
Huaranga huaranga paipaj jucha illajcunapaj chaupipimi shamurca.
Paipaj alli lado maquipica, nina lunyacuj mandashcata apashcami shamurca.
3Paipajlla cajcunataca c'uyanmi. Paipajlla cachun tucui ch'icanyachishcacunaca paipaj maquipimi.
Chaimi paicunaca can purishcata catircacuna.
Quiquin yachachishcata catishpami chashna purircacuna.
4Moisesca mandashcacunataca Jacobpaj huahua huahuacuna tandanacushcapaj cachunmi curca.
5Israelcunata mandajcuna, Israel aillucunahuan tandanacujpica, Jesurunpica shuj jatun mandajllami tiyanga.
6Rubén causacuilla, canca mana huañunguichu.
Paipaj ailluca mana yupaipaj cashca cachun” nircami.
7Judata alli cashca canguichijman nishpaca cashnami nirca:
“Mandaj Dioslla, Judá mañashcata uyahuayari. Paipaj huauquicunapajman tandachihuayari.
Paicunapaj maquihuanmi mitsarincuna.
Paicunata p'iñajcunata mishachunca quiquinmi ayudaj cangui” nircami.
8Levita alli cashca canguichijman nishpaca cashnami nirca: “Mandaj Dioslla Tumimpish quiquinpajmi, Urimpish quiquinpajmi.
Chaitaca can yuyailla causaj Levipaj maquipimi churarcangui.
Pai ima shina cajtaca Masahpimi ricurcangui.
Meriba yacupimi achcata rimanacurcangui.
9Paimi paipaj yaya mamataca: 'Mana ricushcanichu' nirca.
Paipaj huauquicunataca: 'Mana rijsinichu' nircami.
Paipaj huahuacunatapish: 'Pipishchari' nircami.
Paicunami cambaj shimicunata cazuncuna.
Paicunami canhuan ari ninacushcata pajtachincuna.
10Paicunami Jacobpaj huahua israelcunamanca, quiquin mandashcacunataca yachachingacuna.
Paicunami quiquinpaj ñaupajpica inciensota rupachingacuna.
Paicunami quiquinpaj altar jahuapipish tucuita cushpa tucui rupachingacuna.
11Mandaj Dioslla, paicuna imalla rurashcataca alli cashca cachun niyari.
Paicunapaj maquihuan imalla rurashcacunataca cushicuihuan chasquiyari.
Paicunata p'iñajcuna ama cutin jatarichun, paicunapaj huasha tullucunata p'aquiyari” nircami.
12Benjamintapish alli cashca canguichijman nishpaca cashnami nirca:
“Mandaj Diospaj c'uyashca runaca, paipi shunguta churashpami paipaj c'uchullapi causanga.
Paitaca huiñaipajmi ugllanga.
Mandaj Diospaj rigrapimi causanga” nircami.
13Josetapish alli cashca canguichijman nishpaca:
“Cambaj allpaca jahua pachamanta allicunahuan, jahua pachamanta shullahuan, ucu allpamanta nuyuchishcahuan Mandaj Dios alli nishca cachun.
14Inti p'ucuchishca ashtahuan alli granocunahuan, luna p'ucuchishca mishqui granocunahuan,
15ñaupaman tiyaj urcucunapi p'ucushca alli granocunahuan, huiñaita tiyaj jatun lomacunapi p'ucushca achca granocunahuan,
16tucui cai pachapi imalla tiyaj allicunata cushcacunahuan, Zarza cashapi ricurij Taita Diospaj mana c'uyaipajta c'uyaihuan allicunata cushca cachun.
Tucui chaicunaca huauquindijcunamanta mandaj cachun churashca Josepaj uma jahuaman shamushca cachun.
17Paipaj fuerzaca punta huacharishca huagrapaj shinami.
Paipaj gachucunaca búfalo huagrapaj gachucuna shinami.
Chai gachucunahuanmi tucui gentecunataca tucui cai pachapi urata janajta sagmashpa shitanga.
Efrainpaj huahua huahuacunaca huaranga huarangacunami.
Manasespaj huaranga huaranga runacunapish c'ari c'aricunami” nircami.
18Zabulontapish alli cashca canguichijman nishpaca:
“Zabulón, can llujshirishpaca cushicuiyari.
Isacar canpish cambaj carpa huasicunapi cushicuiyari.
19Paicunapaj urcumanmi shujtajcunata cayangacuna.
Chaipimi Mandaj Dios munashca shina paiman cushpa rupachingacuna.
Chashna rurashpami mama cuchapi achca tiyajcunahuan, allpapi pacashca sumaj charinacunahuan cushicungacuna” nircami.
20Gad aillutapish alli cashca canguichijman nishpaca:
“Gad ailluman achca allpacunata cuj Taita Diosca alli nishca cachun.
Gadca león shina chapashpami rigracunata surcunga, umacunata p'itinga.
21Gadca ashtahuan alli allpacunatami agllarca.
Mandajpaj huaquichishca sumaj allpatami japirca.
Paimi tucuicunapaj ñaupajpi shamurca.
Paica israelcunaman Mandaj Dios cushca mandashcacunata, cashcata rurashpa pajtachinguitaj nishcacunatami pajtachirca” nircami.
22Dan aillutapish alli cashca canguichijman nishpaca:
“Danca malta león shinami Basanmantami saltanga” nircami.
23Neftalí aillutapish alli cashca canguichijman nishpaca:
“Neftalimanca allicunatami yallijta cushca.
Mandaj Dios alli nishcacunahuan jundami.
Paipaj allpaca inti huashicun ladomanta, ura ladocamami” nircami.
24Aser aillutapish alli cashca canguichijman nishpaca:
“Israel aillucunapurapica Aser ashtahuan alli nishca cachun.
Paipaj huauquicuna c'uyashca cachun.
Paipaj chaquitapish aceitehuan llihuishca cachun.
25Cambaj pueblo pungu aldabacunaca fierromanta broncemanta, rurashcami canga.
Cambaj causana punllacunapish, cambaj fuerzapish unita cashca cachun.
26Jesurunpaj Taita Dios shinaca pi mana tiyanchu.
Paica canta ayudangapajca jahua pachapi tiyarishcami puricun.
Pai tucuita rurai tucuj cashcahuanca p'uyu jahuapimi puricun.
27Huiñaipaj Taita Diosca, can miticunami.
Paipaj rigracunaca huiñaipaj canta charirajmi.
Paimi canta p'iñajcunataca cambaj ñaupajmanta anchuchirca.
Paimi: ¡Tucuita tucuchij! nircami.
28Israelcunaca ima manchai illajllami causanga.
Jacobpaj huahua huahuacunaca ch'ican paicunallami causanga.
Trigo, vino yallitaj tiyan llajtapimi causanga.
Jahua pachapish tamyachicungallami.
29Israel, canca cushijllami cangui.
Shujtaj llajtacunaca mana cancunata shina Mandaj Dios quishpichishcaca tiyanchu.
Paica canta pacaj escudomi.
Can mishana espadami.
Canta p'iñajcunaca cumuringacunami.
Paicunapaj lomacunapi tiyaj altarcunatapish canmi sarungui” nircami.
Currently Selected:
DEUTERONOMIO 33: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.