DEUTERONOMIO 32
32
1“Ñucamari rimagrini jahua pachacuna uyaichij.
Ñuca shimihuan imalla nishcacunata cai pachapish uyayari.
2Ñuca yachachishcaca tamya shinami urmanga.
Ñuca imallata yuyachishcaca shulla shinami shutujyachinga.
Gramapi garhuashca shinami canga.
Q'uihuapi tamya shutuj shinami canga.
3Mandaj Diospaj shutitami ñucaca cantasha.
¡Ñucanchij Taita Diostaca jatunyachichigari!
4Paica ñucanchij miticuna jatun Rumimari.
Pai rurashcacunapica ima panda mana tiyanchu.
Paipaj ñancunapish ima mana pandachu.
Paica mana llullaj Taita Diosmi.
Paipica ima millai mana tiyanchu.
Paica cashcata rurajmi, imata mana pandajmi.
5Ashtahuanpish paipaj huahuacunamari Diospajca ismucuj shina tucushcanchij.
Huahua huahua millaicunami tucushcanchij.
6Cancunaca yuyai illaj muspacunamari canguichij.
Manachari paica, cancunata ruraj cancunapaj yayari.
Manachu pai cancunata rurashpa causaiyujta rurarca.
Chashna jahuachu cancunaca millaita rurashcahuan cutichinguichij.
7Ñaupa huatacunata yuyarichigari.
Achca huahua huahuacuna ima shina tucumushcata yuyarichij.
Cambaj yayata tapuiyari paica huillangallami.
Cancunapaj cunaj yuyajcunata tapuichigari, paicunapish huillangallacunami.
8Jahua pacha Diosca gentecunata mirga mirgata rurashpa llajtacunata rurashpaca, tucuicunamanmi quiquin llajtacunata curca.
Ashtahuanpish israelcunamanca mashna cashcapaj pajtatami curca.
9Chaimantami Mandaj Diosca paipajlla agllashcacunata rurarca.
Jacobca pai munashcami carca.
10Paicunataca shitashca pambapimi japimurca.
Imapish mana tiyan llajtapimi japimurca.
Paipaj quiquin ñahuita shinami ugllashpa cuidarca.
Paipaj quiquin ñahuita shinami huaquichirca.
Chashnami cuidashpa yachachirca.
11Aguila paipaj tazin jahuata purishpa paipaj huahuacunata jatarinata yachachij shinami, Mandaj Diosca alasta chutashpa paipaj pluma jahuapi apamurca.
12Mandaj Diosllami cuidashpa pushamurca.
Paihuanca shujtajcunapaj diosca mana carcachu.
13Jahua llajtacunamanmi huichiyachirca.
Cai allpacunapi p'ucushca granocunatami cararca.
Peñamantami sacha chuspipaj mishquitapish cararca.
Rumilla sinchi allpacunamantami aceiteta cararca.
14Vacapaj mantequillata, ovejacunapaj lechetami cararca.
Malta ovejacunapaj huirata, Basán carnerocunapaj, chivocunapaj aichatami cararca.
Ashtahuan alli trigotami cararca.
Uvapaj yahuarta capishca vinotami ubyarchirca.
15Ashtahuanpish Jesurún huirayashpaca, huashamanmi jaitarca.
Yallitajmi gordoyarcangui, huirami taparca.
Ashtahuanpish paita ruraj Taita Diosmantami anchurirca.
Paita quishpichij jatun Rumitapish yanganchircami.
16Paicunaca shujtaj dioscunapajman rishpami yallitaj p'iñachircacuna. Millananacunata rurashpami p'iñachircacuna.
17Taita Diosman animalcunata huañuchishpa cunapaj randica supaicunamanmi curcacuna.
Paicunaca mana rijsishca dioscunamanmi curcacuna.
Paicunapaj ñaupa yayacuna mana manchaj cashca, cunanlla ricurij dioscunamanmi curcacuna.
18Cancunata ruraj jatun Rumitamari cungarishcanguichij.
Cancunata ruraj Taita Diostamari cungarishcanguichij.
19Chaita ricushpami Mandaj Diosca nina sindirij shina yallitaj p'iñarirca.
Paipaj churicuna, paipaj ushushicuna yanganchishcamantami yallitaj p'iñarca.
20Chaimi paica: 'Ñuca ñahuitaca paicunamanta anchuchishami.
Paicunaca yallitaj millai mana pajtachij huahua huahuacunami.
Paicuna ima shina chingarijtaca ricushatajmi.
21Paicunaca manapish dios cajta mañashpami ñucataca yallitaj p'iñachircacuna.
Paicunapaj rurashcalla dioscunata cungurishpami ñucataca p'iñachircacuna. Ñucapish paicunataca manapish ñucapaj cajcunahuanmi llaquichisha.
Ch'ahuan runacunahuanmi llaquichisha.
22Nina sindirij shina ñuca p'iñarishcami seolcama rupachinga.
Paicunapaj allpatapish granocunandijmi millpunga.
Urcucunapaj callari rumicunatapish rupachingami.
23Paicunapaj jahuapica tucui laya llaquicunata ñucami churasha.
Paicunata tucuchingapajmi puntajlla caspicunata shitasha.
24Paicunaca yaricaihuanmi huañungacuna.
Rupachij fiebrehuan, millai ungüicunahuan tucuchishcami cangacuna.
Sacha animalcunatami paicunapajman cachasha.
Venenoyuj culebracunatami paicunapajman cachasha.
25Canllaman cajcunatapish espadacunahuanmi huañuchingacuna.
Huasi ucupi cajcunapish chujchungacunami.
Q'uipa huiñai c'aricunapish, huarmicunapish, chuchucuj huahuacunapish, puzujlla umacunapish chujchungacunami.
26Paicunataca mai caruta cachashpa tsirapanatami yuyarcani.
Chashna rurashpami paicunataca pi ama ashtahuan yuyarichun cai pachapi causaj runacuna puramantaca chingachisha' nircani.
27Paicunata p'iñajcuna c'amishpa ñucata asichunca mana munashpami, mana chashna chingachircani.
Chai runacuna pugllachunmi mana munarcani.
Chai runacunataca: 'Mana Mandaj Dioschu cashna chingachin.
Ashtahuanpish ñucanchij alli c'ari c'aricuna cashpami chashna tucuchinchij nishpami' jatun tucunmancuna carca.
28Ashtahuanpish israelcunamanca manamari pi yuyaita cushcachu.
Mana yuyaita japi tucuncunachu.
29Caicunata entendingapaj yachaisapacuna cashpachari alli canman.
Tucuripica ima tucuna cashcata yachashpachari alli canman.
30Paicunaca shujllamari huarangata manchachishpa catircacuna.
Ishquillamari chunga huarangata callpachircacuna.
Miticuna jatun Rumi shina ñucanchijta Mandaj Dios, paicunapaj maquipi churajpimari chashna rurarcacuna.
Pai Diosllatajmi c'atuj shina paicunaman curca.
31Paicunapaj rumica mana ñucanchij Rumi shinachu.
Chaitaca ñucanchijta p'iñajcunallataj allimi yachancuna.
32Paicunaca Sodoma, Gomorra uva chagracunami.
Paicunaca huañuchij jayaj uvacunami.
33Paicunapaj vinoca culebrapaj venenomi.
Canishpa huañuchij culebrapaj venenomi.
34¿Manachu sumaj charinacunata huaquichinapi huaquichishpa sellashcata charicuni?
35Chai tucuimantaca ñucami paicunatapish llaquichisha.
Paicuna rurashca shinallatajmi cusha.
Paicunapaj llaqui punllaca ñallami chayamugrin.
Paicunaman cunataca allichishcatami charicuni.
36Mandaj Diosca pai agllashcacunamanta shayaringami.
Paipajta rurajcuna llaquita apacujta ricushpaca llaquiringami.
Fuerza illajlla cajta ricushpami llaquiringa.
Amopajta rurajcunapish, amopajta mana rurajcunapish tucuricujta ricushpami llaquinga.
37Chaipica israelcunaca paicunata p'iñajcunataca:
¿Paicunapaj dioscunaca maipitagari?
¿Paicuna miticuna jatun rumica maipitagari?
38¿Paicuna cushca animalcunapaj huirata micuj, paicuna tallishpa cushca vinota ubyaj dioscunaca maipitagari?
Paicuna jatarishpa ayudachunri, paicuna shamushpa mitsachunri.
39Cunanca ñucalla Taita Diostaj cashcataca alli ricuichij.
Ñuca shina Diosca pi shujtaj diosca mana tiyanchu.
Ñucami causaita quichuni, ñucallatajmi causaita cuni.
Ñucami chugrichini, ñucallatajmi alliyachini.
Ñuca maquimantaca pi mana quishpiri tucunchu.
40Ñuca maquita huichi chutashpami: “Ñucaca huiñaita causacujmi cani” nini.
41Achij nicuj ñuca espadata ña filosapata rurashpaca, llaquichijta ñuca maquihuan japishpami ñucata p'iñajcunataca paicuna ima shina rurashca shinallataj rurasha.
Paicuna ima shina rurashca shinallatajmi ñucata p'iñajcunamanca cusha.
42Ñuca puntajlla caspicunataca yahuarpimi pambasha.
Ñuca espadaca aichacunatami millpunga.
Huañushcacunapaj, prezucunapaj yahuartami millpunga.
Ñucata p'iñaj mandajcunapaj umacunatami p'itinga' ningami.
43Llajtacunapi causajcuna, Diospajlla cajcunahuan tucushpa cushicuichigari.
Paipajta rurajcunata huañuchijcunataca, Taita Diosmari huañuchinga.
Paita p'iñajcunataca llaquichingatajmi.
Pai agllashca llajtamantapish, paipajlla cajcunamantapish juchata anchuchingami” nircami.
Huañunalla cashpa israelcunata Moisés yachachishcami
44Moisesca Nunpaj churi Josuendij, tucui israelcunapajman rishpami, cai cantotaca tononchishpa rezashpa uyachirca. 45Chaita tucui uyachishpaca Moisesca tucui israelcunamanca, 46cashnami nirca: “Cunan cancunaman ñuca huillashca shimicunataca cancunapaj shungupi cutin, cutin yuyaricunguichijlla. Cancunapaj huahuacuna cai mandashcacunapi nishcacunata pajtachina yuyailla pajtachichun mandangapajmi chashna yuyaricuna canguichij. 47Cai mandashcacunaca mana yangachu. Ashtahuanpish cancunaman causaita cujmi. Jordán yacuta ch'imbashpa cancuna japigricun llajtaman chayashpaca cai mandashcacunata pajtachishpami unita causanguichij” nircami.
Moisesmanca Nebo urcumanta Canaanta ricuchishcami
48Chai punllallatajmi Mandaj Diosca, Moisestaca cashna nirca:
49“Abarim urcucunaman rishpa chaipi caj Nebo urcuman huichiyagri. Chai urcuca Jericó ch'imbapurapi caj Moab llajtapimi. Chai urcumantami israelcunapaj cachun ñuca cushca Canaán llajtataca ricungui. 50Chai urcunaman huichiyashpami chaipi huañungui. Cambaj ñaupa yayacunahuanmi tandanacugringui. Cambaj huauqui Aarón Hor urcupi huañushpa paipaj ñaupa yayacunahuan tandanacugrij shinallatajmi tandanacugringui. 51Cancunaca ishquindijtajmi, Cades llajtapi cashpaca Zin nishca shitashca pambapi caj Meriba yacucuna c'uchupica ñucata p'iñachishpa tucui israelcunapaj ñaupajpi juchallircanguichij. Ñucataca jucha illaj Jatun Dios cashcata paicunaman mana ricuchircanguichijchu. 52Chaimantami canca tucui israelcunaman ñuca cushca llajtamanca mana yaicugringui. Chai llajtataca carumanta ricushpallami saquiringui” nircami.
Currently Selected:
DEUTERONOMIO 32: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.