DEUTERONOMIO 31
31
Moisespaj randi israelcunata pushaj cachun Josueta churashcami
(Nm 27.12-23)
1Israelcunapajman Moisés rishpaca, 2cashnami nirca: “Ñucaca ñami 120 huatacunata charini. Ñucaca pushashpa llujshinata, pushashpa tigrachinata mana valinichu. Ashtahuancarin Mandaj Diosmi ñucataca: “Cai Jordán yacutaca ña mana ch'imbanguichu” nirca. 3Mandaj Dios cancunapaj Taita Diosmi cancunata ñaupashpa ringa. Mandaj Diosmi chai llajtacunataca cancunapaj ñaupajpi chingachinga. Chaipimi cancunapaj cachun japinguichij. Mandaj Dios nishca shinallataj Josuemi cancunata ñaupashpa ringa. 4Mandaj Diosca chai llajtapi causajcunataca, amorreocunata jatun mandaj Sehonta, jatun mandaj Ogta, paicuna mandacushca llajtacunandij chingachishca shinallatajmi chingachinga. 5Mandaj Diosmi chai runacunataca, cancunapaj maquipi churanga. Paicunataca ñuca ima shina mandashca shinallatajmi rurana canguichij. 6Fuerzarichij, c'ari c'ari caichij, ama manchaichijchu. Paicunataca ama imata manchanguichijchu. Mandaj Dios cancunapaj Taita Diosmi cancunahuanca ringa. Paica cancunataca manataj saquingachu, manataj shitangachu” nircami. 7Chai q'uipaca Moisesca Josueta cayashpami, tucui israelcunapaj ñaupajpi cashna nirca:
“Fuerzari, c'ari c'ari cai. Canmi cai gentecunataca Mandaj Dios paicunapaj ñaupa yayacunaman cushatajmi nishca llajtaman pushangui. Chai llajtataca canmi paicunapaj cachun cungui. 8Mandaj Diosmi cantaca ñaupanga. Paica canhuanmi canga. Cantaca mana saquingachu, canmantaca mana anchuringachu. Ama manchanguichu, ña mana valishachu ama ninguichu” nircami.
Mandashcacunata, cada canchis huatapi rezachun mandashcami
9Moisesca tucui cai mandashcata quillcashpami, Mandaj Dioshuan ari ninacushca quillcata huaquichina arcata apaj levita curacunamanpish, tucui israelcunata cunaj yuyajcunamanpish curca. 10Moisesca cashna nishpami mandarca:
“Cada canchis huatapi ramacunahuan rurashca chugllacunata rurashca fiesta punllacunapi divicunata perdonana huata chayamujpi, 11tucui israelcuna Mandaj Dios cancunapaj Taita Dios agllashca puebloman paipaj ñaupajman rijpi tucui israelcunapaj ñaupajpi tucui paicuna uyajta cai mandashcata rezangui. 12Cai mandashcata uyashpa Mandaj Dios cancunapaj Taita Diosta manchanata yachachun, cai mandashcapi tucui imalla nishcacunata chai yuyailla tucushpa pajtachijcuna cachunca, tucui c'aricunata, huarmicunata, huahuacunata, cancunapaj pueblocunapi causaj shujtaj llajtamanta cajcunata tandachinguichij. 13Paicunapaj huahuacunaca cai mandashcata manaraj uyashca cashpapish chaipi uyashpami yachangacuna. Chashna cashpami paicunaca cai Jordán yacuta ch'imbashpa japigricun llajtapica tucui causai punllacunapi Mandaj Dios cancunapaj Taita Diosta manchanata yachangacuna” nircami.
Moisés ña huañunalla cajpi Mandaj Dios imallata mandashcami
14Chai q'uipami Mandaj Diosca Moisestaca:
“Riqui, ñami can huañuna punllaca quichquiyamun. Ñucahuan tupanacuna carpa huasiman Josueta cayashpa chaipi shuyaichij. Chaipimi imalla rurana cashcataca mandasha” nircami.
Moisespish, Josuepish Dioshuan tupana carpa huasiman rishpami chaipi shuyarcacuna. 15Mandaj Diosca suni p'uyupi ricurishpami, chai carpa huasiman yaicuna pungu jahuapi shayarirca. 16Chaipimi Mandaj Diosca Moisestaca:
“Riqui, canca ñami cambaj yayacunahuan samarigringui. Cai israelcunaca paicuna causagricun llajtaman rishpa chai llajtapi tiyaj shujtaj dioscunata catishpami chai dioscunahuan huainayangacuna. Chaipica ñucata mana valichishpami ñucamanta anchurishpa, ñuca paicunahuan ari ninacushcatapish p'aquingacuna. 17Chai punllacunapica nina sindirij shina paicunahuan ñuca yallitaj p'iñarishpami, paicunata shitashpa manataj tigrashpa ricusha. Paicunapaj jahuaman achca llaquicuna, mana allicuna shamushpami paicunataca tucuchinga. Chai punllapimi paicunaca: 'Ñucanchij Dios ña mana ñucanchijhuan cajpimari, cai tucui llaquicunaca ñucanchij jahuaman shamushca' ningacuna. 18Ashtahuanpish ñucaca paicuna chashna yuyaricujpipish manataj tigrashpa ricushachu. Paicuna shujtaj dioscunapajman rishpa tucui mana allita rurashcamantami chashna rurasha. 19Cunanca cai cantota quillcashpa tucui israelcunaman yachachichij. Cai cantota israelcuna cantashpaca paicunallatataj llaquichina cashcata yuyachij cachun paicunapaj shimipi churaichij. 20Lechepish, sacha, chuspipaj mishquipish yacu llujshicuj shina tiyan llajtata paicunapaj ñaupa yayacunaman cushatajmi nishca llajtaman ñuca chayachijpica, huijsa pajtata micushpami yallitaj huirayangacuna. Shujtaj dioscunaman tigrarishpa, chai dioscunapaj ruranacunata rurashpa, ñucahuan ari ninacushcata p'aquishpami ñucataca yallitaj p'iñachingacuna. 21Paicunapajman jatun llaquicuna, llaquichijcuna shamujpica paicuna cantajpimi chai cantoca paicuna ima shina cashcamanta chashna cashcata ricuchinga. Paicunapaj huahua huahuacuna cantajpipish chashnallatajmi yuyachinga. Ñuca paicunaman cushatajmi nishca allpaman manaraj ñuca chayachishpa, paicuna chaipi cashpa ima shina yuyana cashcataca ñaupamanmi ñucaca ña yachani” nircami.
22Moisesca chai punllallataj, cai cantota quillcashpami israelcunamanca yachachirca. 23Chai q'uipami Mandaj Diosca Nunpaj churi Josuetaca:
“Fuerzarilla, c'ari c'ari cailla. Ñuca cushatajmi nishca llajtamanca canmi israelcunataca yaicuchingui, ñucaca canhuanmi casha” nirca.
Mandashcacunata arca c'uchupi ima shina huaquichinata mandashcami
24Moisesca cai mandashca shimicunata shuj libropi quillcashca q'uipaca, 25Mandaj Dioshuan ari ninacushca quillcata huaquichina arcata apaj levita curacunatami cashna mandarca: 26“Cai mandashcacunata quillcashca librota japishpa, Mandaj Dios cancunapaj Taita Dioshuan ari ninacushca quillcata huaquichina arca c'uchullapi churaichij. Chaitaca cancuna imallata rurashcata ricuchij cachunmi chaipi churana canguichij. 27Ñucaca cancuna mana cazujcuna, millaita ruranaman aticujcuna cashcatami yachani. Cunan cancunahuan ñuca causacujpipish cancunaca Mandaj Diosta c'ariyajcunami canguichij. Ñuca huañushca q'uipacarin ima shinachari canguichij. 28Cunanca cancunapaj tucui aillucunamanta tucui cunaj yuyajcunata, cancunata mandajcunata ñucapajman tandachimuichij. Chaipica jahua pacha cai pacha ricucunpimi israelcunaman rimashpa cai shimicunata uyachisha. 29Ñuca huañushca q'uipaca Diospajca ismucuj shina tucushpa, ñuca mandashca ñancunamanta anchurina cashcataca yachanimi. Cancunapaj maquihuan rurashcacunahuan Mandaj Diosta yallitaj p'iñachishcamantaca, q'uipa punllacunataca jatun llaquicunami cancunapaj jahuaman shamunga” nircami
Moisés rurashca cantomi
30Moisesca, tucui tandanacushca israelcunamanmi cai cantotaca callarimanta tucurincama tucuita uyachirca:
Currently Selected:
DEUTERONOMIO 31: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.
