2 SAMUEL 5
5
Davidtaca tucui Israel aillucunata jatun mandaj cachun churashcami
(1 Cr 11.1-13)
1Tucui Israel aillucuna Hebronman Davidpajman shamushpaca: “Caipi cajcunaca tucuicunami cambaj tullu, cambaj aicha canchij. 2Saúl ñucanchijpaj jatun mandaj cajpipish, israelcunataca canmari macanacuiman pushaj carcangui. Canllatajmari tigrachimuj carcangui. Mandaj Diosmi cantaca: Ñuca israelcunataca can michingui. Canmi tucui israelcunata mandaj cangui nishcami carca” nircami.
3Israelcunata tucui cunaj yuyajcunapish Hebronmanmi jatun mandajpajman shamurcacuna. Chaipimi jatun mandajca paicunahuanpish Hebronpica Mandaj Diospaj ñaupajpi ari ninacurcacuna. Chaipimi paicunaca tucui israelcunata jatun mandaj cachun Davidtaca aceitehuan churarcacuna. 4Davidca mandai callarinapajca quimsa chunga huatayujmi carca. Paica chuscu chunga huatacunatami mandarca. 5Davidca canchis huata sujta quillacunataca Hebronpica judacunallatami mandarca. Quimsa chunga quimsa huatacunataca tucui israelcunata, judacunatapishmi Jerusalenpi mandarca.
Davidca sinchi pircayuj Sión pueblota japishcami
(1 Cr 11.4-9)
6Jatun mandajca paipaj runacunandij Jerusalenman rishpaca, chaipi causaj jebuseocunahuan macanacungapajmi rirca. Paicunaca Davidtaca: “Caimanca mana yaicunguichu. Ñahui mana ricujcuna, patojocunapish can caiman yaicuchunca mana saquingacunachu” nircami. Davidca caimanca mana yaicui tucungachu yuyashpami chashna nircacuna. 7Chashna nicujpipish Davidca, sinchi pircayuj Siontaca paimi japirca. Chai puebloca cunanca Davidpaj pueblomi. 8Chai punllallatajmi Davidca: “Jebuseocunata maijanpish huañuchisha nijcunaca yacu rina larca ucuta rishpa, ñahui mana ricujcunata, patojocunata huañuchigrichij. Chaicunataca Davidca shungumantatajmi p'iñani” nircami. Chaimantami: “Mandaj Diospaj huasimanca ñahui mana ricujcuna, patojocunapish mana yaicunachu” nishca tiyan. 9Davidca chai sinchi pircayuj pueblopimi causarca. Chaitaca: “Davidpaj pueblo” nishpami shutichirca. Chai pueblo muyundijtaca allpata jundachishcamanta callarishpa, pai mandashpa tiyana huasicamami muyundijta jatun pircata rurachirca. 10Tucuita Mandaj Diosca Davidhuanmi carca. Davidca tucuipimi ñaupajman rirca. Tucuicuna jatunyachishcami carca.
Hiramca paipaj randi parlajcunata Davidpajman cachashcami
(1 Cr 14.1-2)
11Tiro pueblota jatun mandaj Hiramca, paipaj randi parlanacuj cachunmi maijancunata Davidpajman cacharca. Cedro caspicunatapish, carpinterocunatapish, rumicunata labrajcunatapishmi cacharca. Paicunami Davidpaj huasita rurarcacuna. 12Chaimi Davidca israelcunata jatun mandaj cachun Mandaj Dios churashca cashcata yacharca. Pai agllashca israelcunata Mandaj Dios c'uyashcamanta David tucui mandacunca ashtahuan jatunyacushcatapishmi yacharca.
Jerusalenpi David cashpa charishca churicunami
(1 Cr 3.5-9; 14.3-7)
13Davidca Hebronmanta Jerusalenman rishpaca paipaj quiquin huarmi cachun, paipaj caishuj huarmicuna cachunpish ashtahuan japircarajmi. Chai huarmicunaca c'ari huahuacunatapish, huarmi huahuacunatapishmi Davidpajta huacharca. 14Jerusalenpi huacharishca Davidpaj churicunaca: Samúa, Sobab, Natán, Salomón, 15Ibhar, Elisúa, Nefeg, Jafía, 16Elisama, Eliada, Elifelet shuticunami carcacuna.
Filisteocunata David mishashcami
(1 Cr 14.8-17)
17Tucui israelcunata jatun mandaj cachun Davidta aceitehuan churashcatami filisteocunaca yachaj chayarcacuna. Chaimi tucui filisteocuna Davidta mashcanaman huichiyarcacuna. David chaita yachashpaca alli pacatucunapimi pacatucunaman uriyarca. 18Filisteocuna shamushpaca, Refaim pugru pambapimi rigarishpa tiyarircacuna. 19Chaimi Davidca Mandaj Diostaca:
–¿Filisteocunahuanca macanacugrishachu? ¿Paicunataca ñuca maquipi churanguichu?– nishpa tapujpi Mandaj Diosca Davidtaca:
–Rilla, filisteocunahuanca macanacugrilla. Paicunataca cambaj maquipi churashatajmi– nirca.
20Shina nijpi David rishpaca, Baal-perazim pambapi macanacushpa paicunata mishashpami Davidca: “Mandaj Diosca jatun yacu jatun pircata t'unij shinami ñucata p'iñajcunataca ñuca ñaupajmanta anchuchin” nishpa, chai pambataca Baal-perazimta shutichirca. 21Filisteocunaca paicunapaj rurashcalla dioscunataca chaipi shitashpami rircacuna. Chaicunataca Davidca paipaj runacunandij tucushpami rupachircacuna.
22Filisteocunaca cutinllataj shamushpami, Refaim pugru pamballapitaj rigarishpa tiyarircacuna. 23Davidca cutinllataj Mandaj Diosta tapujpi, Mandaj Diosca:
–Ch'imbapura macanacungapajca ama huichiyaichu. Ashtahuanpish bálsamo yuracuna tiyan ch'imbanijta muyushpa paicunataca cungaillapi japingui. 24Bálsamo yuracuna puntacunata puricuj shinata uyashpaca, macanacunaman puri callaringuilla. Chaica Mandaj Diosmi filisteocunapaj carpa huasicunapi macanacungapaj canta ñaupashpa ricunga– nircami.
25Davidca Mandaj Dios mandashca shinami rurarca. Chashnami filisteocunataca Gebamantaca Gezercama catishpa huañuchirca.
Currently Selected:
2 SAMUEL 5: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.
