2 SAMUEL 6
6
Davidca Diospaj arcata Jerusalenman apanata yuyashcami
(1 Cr 13.5-14)
1Davidca israelcunamanta agllashca 30.000 tucui runacunatami cutinllataj tandachirca. 2Chaimantaca Davidca tucui paihuan cajcunandijmi Judapi caj Baalaman rirca. Diospaj arcata chaimanta apamungapajmi rirca. Chai arca jahuapi querubincunapaj chaupipimi tucuita Mandaj Diosca causan. Chaipimi imata cashpapish paiman mañana. 3Lomapi caj Abinadabpaj huasimanta Diospaj arcata llujshichishpaca shuj mushuj carropimi churarcacuna. Abinadabpaj Uza, Ahío shuti churicunami chai carrota maillata rina cashcata ricuchishpa pusharcacuna. 4Lomapi caj Abinadabpaj huasimanta Diospaj arcata apacujpica, Ahío runami Diospaj arcata ñaupashpa rirca. 5Davidpish tucui israelcunapish Mandaj Diospaj ñaupajpimi tushushpa rircacuna. Paicunaca haya caspimanta rurashca tucui laya tocanacunapi arpacunapi, salteriocunapi, panderocunapi, flautacunapi, cimbalocunapimi tocashpa ricurcacuna. 6Naconpaj trillana patioman chayashpaca, huagracuna ñitcajpimi, Uza runaca, Diospaj arca ama urmachun paipaj maquihuan japirijpi, 7Mandaj Diosca Uza runahuanca nina sindirij shina p'iñarirca. Mandaj Diospaj arcata tuparishcamantami Taita Diosca paitaca huañuchijpi, Diospaj arca c'uchullapitaj urmashpa huañurca.
8Uza runata Mandaj Dios huañuchishcamantaca, Davidca achcatami llaquirirca. Chaimi chai pambataca, Pérez-uzata shutichirca. Cunancama chai shutillatajmi. 9Davidca, Mandaj Diosta manchashcamantami chai punllaca: “Diospaj arcataca ñuca huasimanca maitataj apashari” nishpaca, 10Mandaj Diospaj arcataca paipaj pueblopi caj paipaj huasimanca mana apashpa, geteo Obed-edompaj huasiman apachun mandarca. 11Mandaj Diospaj arcaca quimsa quillatami, geteo Obed-edompaj huasipi carca. Mandaj Diosca Obed-edommanpish, paipaj huasi ucupuramanpish achca allicunatami curca.
Davidca Diospaj arcata Jerusalenman apashcami
(1 Cr 15.1–16.6)
12Mandaj Diospaj arca Obed-edompaj huasipi cashcamantaca paipaj familiaman, tucui imalla charishcacunapipish achca allicunatami Mandaj Diosca cushca nishpa jatun mandaj Davidman huillajpimi paica, Obed-edompaj huasiman rishpa cushicuihuan Diospaj arcataca paipaj puebloman aparca. 13Diospaj arcata apajcuna sujta tatquita purijpimi, Davidca shuj huagrata, huirayashca carnerotapish Diosman cushpa huañuchirca.
14Davidca mandaj Diospaj ñaupajpimi tucui fuerzahuan tushushpa rirca. Paica linomanta rurashca efod churanata churashcami carca. 15Davidpish tucui israelcunapish Mandaj Diospaj arcataca chashna cushicuihuan caparinacushpa, trompetacunapi tocashcahuanmi aparcacuna.
16Mandaj Diospaj arcahuan Davidpaj puebloman chashna ña chayacujpica cashnami tucurca: Jatun mandaj Davidca Mandaj Diospaj ñaupajpi jahuata saltashpa tushuihuan shamucujtami, Saulpaj ushushi Micalca huasi shuj ventanamanta ricurca. Chaimi paipaj shungupica Davidtaca p'iñarca.
17Davidca ñaupamanmi Mandaj Diospaj arcata churanapajca shuj carpa huasita shayachishca carca. Mandaj Diospaj arcata ña chayachishpaca, chaupi huasi ucupi maipi chai arcata churanata rurachishcallapitajmi churarca. Chaipimi Davidca Mandaj Diosman cushpa tucui rupachinatapish cushpa rupachirca, sumaj causaimantapish Mandaj Diosman curca. 18Davidca Diosman cushpa tucui rupachinatapish cushpa rupachishca q'uipa, sumaj causaimantapish Diosman cushca q'uipaca, tucui israelcunataca tucuita Mandaj Diospaj shutipimi alli cashca canguichijman nirca. 19Chai q'uipaca tucui chaipi cajcunaman, tucui tandanacushca israelcunamanmi c'aricunamanpish, huarmicunamanpish cada shujman shuj tandahuan, mirga aichahuan, chaquichishca uvahuan rurashca shuj tandahuan cararca. Chaimantaca, tucuicuna paicunapaj huasicunaman rircallacunami.
20David, paipaj huasi ucupuracunata alli cashca cachun ninaman tigracujpica, Mical huarmi tupanaman llujshishpaca:
–¡Israelcunata jatun mandajca, cunanca yallitaj alli nishcamari tucushca. Paipajta rurajcunapajta ruraj huarmicunapaj ñaupajpi maijan mana pingajcuna shina lluchulla tucushpa tushushpaca ima allitataj rurashcari!– nircami.
21Chaimi Davidca Micaltaca:
–Mandaj Diosmari ñucataca cambaj yayatapish, cambaj huasi ucupuracunatapish yalli ñucata munashpa pai Mandaj Dios agllashca israelcunata jatun mandaj cachun churarca. Chaimi Mandaj Diospaj ñaupajpi chashna rurarcani. Chaimanta Mandaj Diospaj ñaupajpica tushushami. 22Chashna nijpipish cunanta yalli ashtahuan millashcamari tucusha. Cambaj ricuipica yanganchishcami casha. Ashtahuanpish can rimacushca ñucapajta ruraj huarmicunapaj ñaupajpica paicuna alli nishcami casha– nircami.
23Saulpaj ushushi Micalca pai huañungacamami, huahuacunataca manataj charirca.
Currently Selected:
2 SAMUEL 6: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.
