1 SAMUEL 31
31
Saulca paipaj churicunandij huañushcami
(1 Cr 10.1-12)
1Filisteocunaca israelcunahuanmi macanacurcacuna. Israelcunaca filisteocunata miticushpa rishpaca, Gilboa urcupimi huañurcacuna. 2Filisteocunaca Saultapish, paipaj churicunatapish catishpa rishpaca, Jonatán, Abinadab, Malquisúa shuti Saulpaj churicunatami huañuchirca. 3Chai macanacuica ashtahuan tucushpa catijpimi flechacunahuan shitajcunaca Saulpi shitajpi, paicunataca yallitaj manchashpa, 4Saulca, paipaj escudota apajtaca:
–Circuncisionta mana rurashca runacuna shamushpa ñucata ama asichun, paicunapaj espadahuan ama huañuchichun cambaj espadata surcushpa, huañuchi– nirca.
Chashna nijpipish, Saulpaj escudota apaj runaca yallitaj manchashpami, mana imata rurarca. Chaimi Saulca paipaj espadallatataj japishpa, paillataj satirishpa huañurca. 5Saúl huañujta ricushpami, paipaj escudota apaj runapish paipaj espadallahuantaj satirishpa Saulhuan huañurca. 6Saulpish, paipaj quimsa churicunapish, paipaj escudota apajpish, tucui paipaj runacunapish chai punllallatajmi tucuicuna chashna huañurcacuna. 7Pugru pambamanta ch'imba ladoman causaj israelcunapish, Jordán yacu ch'imba ladoman causaj israelcunapish, Israel soldadocuna miticushpa callpashcata, Saulpish paipaj churicunapish huañushcatami ricurcacuna. Chaimi paicunapish paicuna causacun pueblocunata shitashpa callpashpa miticugrircacuna. Chaimi filisteocunaca chai pueblocunaman shamushpa chaipi causai callarircacuna.
8Chai cayandij punllami filisteocunaca, huañushcacunapaj churanacunata llujshichinaman rishpaca, Saulpish paipaj quimsa churicunapish huañushca chutajllata siricujta Gilboa urcupi japircacuna. 9Chaipimi Saulpaj umata p'itishpa, paipaj macanacunatapish llujshichishpa aparcacuna. Chaicunahuanmi huillajcunataca filisteocunapaj tucui llajtacunapi causajcunamanpish, paicunapaj rurashcalla dioscunata yuyarina huasicunapipish, ricuchishpa huillashpa cushichichun cacharcacuna. 10Saulpaj macanacunataca, Astarot diospaj huasipimi churarcacuna. Saulpaj aichataca, Bet-san pueblo muyundijta pircashcapimi huarcurcacuna.
11Galaadpi caj Jabes pueblopi causaj israelcunaca, filisteocuna Saulta imallata rurashcata yachaj chayashpami, 12ashtahuan c'ari c'ari runacunaca tucuicuna jatarishpa chai tutaca tucui tuta Bet-sanman rishpa Saulpaj, paipaj churicunapaj cuerpotapish huarcushcamanta uriyachishpa Jabes puebloman aparcacuna. Chaipimi rupachircacuna. 13Paicunapaj tullucunata japishpaca, Jabes pueblopi tiyaj shuj yura ucupi pambashpami canchis punllata ayunarcacuna.
Currently Selected:
1 SAMUEL 31: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.