1 SAMUEL 29
29
Filisteocunaca Davidtaca macanacuiman mana pushashun nishcami
1Filisteocunaca tucui paicunapaj soldadocunatami Afec pambapi tandachircacuna. Israelcunapish Jezreelpi caj yacu pugyu c'uchupimi carpa huasicunata shayachircacuna. 2Filisteocunata mandajcunaca paicunapaj soldadocunataca patsajcunapurapipish, huarangacunapurapipish tucuicunatami paicunapaj shutipi cayashpa ricurcacuna. Davidpish paipaj runacunapish Aquista cuidashpami paipaj huashata caticurcacuna. 3Chaimi filisteocunata mandajcunaca:
–Chai hebreocunaca ¿imatataj caipica ruracuncuna?– nijpi Aquisca filisteocunata mandajcunamanca:
–Cai Davidca, israelcunata jatun mandaj Saulpajta rurajmari. Paica cai punllacunata, cai huatacunataca ñucahuanmari cashca. Paipica ñucapajta rurai callarishcamanta cunan punllacama ima mana allita mana japishcanichu– nircami.
4Shina nijpimi filisteocunata mandajcuna Aquishuan p'iñarishpaca:
–Cai runaca macanacuiman ñucanchijhuan ama richun can maipi causachun churarcangui chaillamantaj tigrachishpa cachai. Chai macanacuipica ñucanchijta p'iñajcunapura tucungallatajmari. Chaimantaca ñucanchij runacunata huañuchishpa umacunata apashpa paipaj amopi alli ricurigringallatajmari. 5¿Manachu cai Davidta:
Saulca, 1.000 gentecunatami huañuchishca.
Davidca, 10.000 gentecunatami huañuchishca nishpa, cantashpa tushushcacuna?– nircacunami.
6Chaimi Aquisca, Davidta cayashpaca:
–¡Mandaj Diosca causajmi, canca imatapish cashcata ruraj runami cangui! Llujshishpapish tigrashpapish, carpa huasicunapica ñucapajca tucuitami alli rurashcangui. Ñucapajman shamushca punllamantapacha cunan punllacama, canpica ima mana allita mana japishcanichu. Ashtahuanpish caishuj mandajcunamari, cantaca mana munancuna. 7Filisteocunata mandajcunata ama ashtahuan p'iñachingapaj, tigrashpa cushicuihuan rilla– nirca.
8Davidca Aquistaca:
–¿Imatataj rurashcaniyari? Ñuca amo jatun mandajta p'iñajcunahuan macanacunaman ama richunca cambajta ruraj ñucapica canhuan puri callarishca punllamanta cunancama ¿ima mana allitataj japircanguiyari?– nircami.
9Aquisca Davidtaca:
–Canca Diospaj ángel shina ñuca ñaupajpi alli cashcataca yachanitajmari. Shina cajpipish filisteocunata caishuj mandajcunami: Macanacuiman ñucanchijhuanca ama richun nincuna. 10Chaimanta caya tutamanta utca jatarishpa canpish, canhuan shamuj can amopajta rurajcunapish pacarinca ringuichijlla– nircami.
11Davidpish paipaj runacunapish filisteocunapaj llajtaman tigrashpa ringapajmi cayandijtaca utca jatarircacuna. Filisteocunaca Jezreelmanmi rircacuna.
Currently Selected:
1 SAMUEL 29: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.
