Maak 15
15
Yisọs ke iso Baided
1Ata ubahausen ke ayo amaakesiere, mme ikpọ aku ye mme ñkpisọñ, ye mme andikpeeb ibed ye afịd mbon Sanhidrin emaenam edioomo ammọ. Ndin ammọ emaebọp Yisọs, eben anye esañña ekeyaak enọ Baided.
2Ndin Baided amaabịp anye ate, “Nte afo ado adidem mme Yuu?” Ndin anye amaabọọrọ Baided ate.
“Ado naña afo atañ.”
3Mme ikpọ aku ndin etañ umiañ ikọ nsu edian anye. 4Baided amaatịmme abịp anye ate “Afo usʌkkọ ubọọrọ ndomo ikọ keed? Ke afịd umiañ ikọ se etañ udot fiin?”
5Ado Yisọs ikisʌkkọ ibọọrọ, anam idem amaakpa Baided eti-eti.
6Akedo ido Baided adisaana awo ñkpakọb keed ñyaak kwa ini usọrọ, awo ake idʌñ ebo esaana eyaak. 7Ndin amaaba awo keed a-akekereke Barabas, a-akebaaha ke nkpọkọb ye mbon mfen e-ekesịnne ntịme ke abio, kpa ye mbon e-ekewooto awo ke ntịme ado. 8Atu awo ami emaedi ebịne Baided edibeeñe anye ete anam naña anye asisʌk anam ke ini usọrọ ntom.
9Mi ke Baided akebịp ammọ ate, “Ndufo ebo ñyaak adidem mme Yuu inọ ndufo?” 10Anye akebịp mbịme ami sia anye amaadiọọñọ abo ke ato ke ntak ufịb akesịn mme ikpọ aku ekeyaak Yisọs inọ imọ. 11Ado mme ikpọ aku edọọñ atu awo ado ete ebo Baided asaana Barabas ayaak.
12Baided ndin amaatịmme abịp ammọ ate, “Ndufo ebo nnam nso-o ndin ye anye a-ndufo ekoodo adidem mme Yuu?”
13Afịd ammọ emaedọñ uyo keed ebọñ ete, “Kọñ anye ke krọs!”
14Baided ate ammọ, “Ntak-a? Nso-o ndudue ke anye anam?”
Ammọ eneneke ebọñọ ñkpo ete, “Kọñ anye ke krọs!”
15Baided, ke adiyem adinem atu awo ado esịd, amaasaana Barabas ayaak anọ ammọ. Anye amaanam emia Yisọs eti-eti, ndin asaana anye ayaak anọ ammọ ate eben ekekọñ ke krọs.
Mbon ekọñ enọ Yisọs ñnyọ
16Mbon ekọñ emaeben Yisọs ewuọ edʌk esịd akwere, (adodo Britodium) enyʌñ ekood umiañ mbon ekọñ ediyọhọ. 17Ammọ emaesịn anye ewra, a-akebaaha iduud-iduud, anye, edọk anyanya ñkukịm eyat anye ke iwuod. 18Ndin ammọ emaetọọñọ iben anye ntọọñ ndọk, ete, “Imukọọm fiin, adidem mme Yuu.” 19Ammọ emaeben esañ emia anye ke iwuod, enyʌñ ekọkkọ etab etọ anye. Etọọñọ edọñ etuak iwuod enọ anye. 20Ke ammọ emaekesuenne anye ema, ammọ emaesio anye iduod-iduod afọñ ewra ado enyʌñ eben afọñidem amọ esịn anye. Ndin ammọ amaeben anye ewuọ eka adikọñ anye ke krọs.
Adikọñ Yisọs ke krọs
21Saimọn, ete Adeksanda ye Rufọs, a-akedooho awo abio Sirin, akeato esịd abio ayem adisaña mboiyo, ammọ emʌm anye eyịk ete abiom krọs ado. 22Ammọ eben anye edika Kọọdkọta (awuọhọ itie “ñkpọkpọrọ iwuod awo”). 23Do ke ammọ ekeben ukọd ewaaha ye atidod enọ anye, ado anye ikibọọhọ. 24Ndin ammọ emaekọñ anye ke krọs, edeeme afọñidem amọ, ke emaekesịn ukañ adidiọọñọ mme ake afọñ ke awo keed-e-keed adidat.
25Akedo ñkanika usʌkkeed ubahausen ke ammọ ekekọñ anye ke krọs. 26Ndin ammọ emaewet ikọ ubiọmikpe edian do ke krọs, ete:
“Adidem mme Yuu.”
27Ammọ emaekọñ mbon amauke iba ke eto krọs ediana anye, keed ke ubọk udom, keed ke ufiin. 28Ntom ke ikọ ñwed Abasi e-ekewette ebaña anye akesụ: “Ndin ebat anye esịn ke atu mme anam ukuañ ñkpọ.” 29Mbon se ikisaña iboiyo do emaesueñ anye, efuuñ iwuod, ete, “Afo a-anieeghe ukeme adiwuud tembịd nyʌñ mbọp ke usen ita, 30sọiyọ ke krọs dinyaaña idem mfo-o!” 31Ke ukem usʌñ ado mme ikpọ aku ye mme akpeeb ibed ke atu idem ammọ ñko emaesaha anye, ete, “Anye akekan inyaaña mbon mfen, ado ikanna inyaaña idem amọ. 32Yak Mesaya ami, Adidem Isred ami, asọiyọ do ke krọs, nọ ñnyịn ikịt inyʌñ inịm anye ke akpanikọ.” Mbon e-ekekọññọ ke krọs edian anye emaekeene esueñ anye.
Ñkpa Yisọs
33Akediwuọ ufọọd uweemeayo akịm amaafʌk isọñ tutu ñkanika ita uweeme. 34Ndin ke ñkanika ita uweeme Yisọs asio ñkpo ke akpọsọñ uyo, “Edoi, Edoi, lema sabaktani?” (Ikọ ami awuọ, “Abasi mmi, Abasi mmi, nso-o inam afo añkpọñọ miin?”)
35Ke ini usʌk mbon se ikida ikpere ekeekoppo, ammọ emaebo ete, “Kop naña anye abọọñ akood Edaiya.”
36Ete keed amaafeghe akedat ndọbọ, anyiin ke ukọd fineka atot ke eto anyan anọ Yisọs ate anwọñ. Akem awo ami amaabo ete, kpọñ anye, yak ise me Edaiya ayaadikọññọ anye ke krọs.
37Yisọs amaamaana abọọñ ñkpo ke akpọsọñ uyo, ndin ayaak ukpọñ amọ, anweek akpatre ibifịk.
38Idahado, ikpeghe ke esịd tembịd amaasakka mbaak iba, tọọñọ ke anyọñ tutu awuọ isọñ. 39Kini sentudiọn, etubom mbon ekọñ a-akedaaha do ke iso Yisọs akịtte naña anye akpa, anye amaabo ate: “Ke akpanikọ, awo ami akedo Ayịn Abasi.”
40Mme ibaan mmọdo ekeba e-ekedaaha nsan-nsan ese se ikitịppe ami. Ke atu ammọ akedo Mmeri Makdadin, ye Mmeri eka Yemsi etək-etək ayịneka ye Yosef ye Sadomi. 41Mme ibaan ami e-ekesisañake ye Yisọs ese ñkpọ ebaña anye idaha akebaaha ke Kadidi. Uwak ibaan mfen e-ekesañake ye anye eto Yerusedem edi emaeba do nko.
Adibuuk Yisọs
42Akedo ke Usen Mbeeñeidem (ami ado usen keed mbemiso asiere usen Sabad.) Ndin akediikpere ndubi, 43Yosef awo Arimatia, ekamba awo ke akwa esob mme Yuu, a-anye ke idem amọ a-aketieeghe abet ini adidi abio ubọọñ Abasi, amaabịne Baided uko-uko akebịp akpo Yisọs. 44Idem amaakpa Baided adikop ke Yisọs amaakpakpa. Adọñ ekood sentudiọn, anye amaabịp me Yisọs amaakpakpa 45Anye amaakekop ito sentudiọn ke Yisọs amaakpa, anye amaayaak akpo amọ anọ Yosef. 46Yosef amaakedep ufa afọñ dinen, akekọññọ akpo Yisọs awañ anye ke dinịn ado, aben akpo Yisọs akesịn ke udi, e-ekekappa itiad etịppe. Ndin anye amaakpat ubaak itiad akue inua udi. 47Mmeri Makdadin ye Mmeri eka Yosef emaekịt itie e-ekebuuhọ anye.
Currently Selected:
Maak 15: NAAM
Highlight
Share
Copy
Want to have your highlights saved across all your devices? Sign up or sign in
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
