Maak 14
14
Eyet Yisọs adan ke Betani
1Akesʌghọ usen iba mbemiso adikem usen usọrọ Basofa ye Usọrọ Uyo a-awo mmiisisịnne defịn; ndin mme ikpọ aku ye mme andikpeeb ibed eyem ñkara-ñkara usʌñ naña eda emʌm Yisọs ndịbbe-ndịbbe enyʌñ ewot. 2Ammọ emaedioomo ke atu idem ammọ ete ke inaaha emʌm anye idaha usọrọ ado mbaak atu awo edinam ntịme.
3Ndin naña anye abaaha ke Betani abere ke akpokoro ndidia ke ufọk Saimọn awo akpamfia, awonwaan keed amaadʌk aka adi, akama ata nsọñudua a-anemufịk adan ke ekpeme adabasta e-ekedatta naad enam. Awonwaan ado amaakʌppọ ekpeme adan ado aduọk anye ke iwuod.
4Usʌk awo ke ufọk ado emaenekke eyaad esịd ke atu idem ammọ, ete, “Ebiad utọ nsọñudua adan ami ebaña so-o? 5Adan ado akem se ekpenyam ebọhọ akʌkutom afiọñ ake isuakeed enyʌñ eben akʌk ado enọ mme uwueene.” Ntom ke ammọ ekesua enọ mma ado.
6Ado Yisọs amaabo ammọ ate: “Ikpọñ anye. Nsido ntak efịnake anye? Anye anam eti ñkpọ ke idem mmi. 7Mbon uwueene ediisʌk ibaba ye ndufo afịd ini, ndin ini ake ndufo emama emekeme adinwam ammọ. Ado ndufo idinnieeghe miin afịd ini. 8Awonwaan ami akenam se anye akan. Anye ababak anyet miin anemufịk adan abeeñe ini e-edimbuuk miin. 9Ke akpanikọ ke ntañ inọ ndufo, itie ake adodo e-edikwọrọ eti mbʌk ami, ke afịd ederimbod eyaetañ se awonwaan ami akenam, edat ado etoiyo anye.”
10Akekem Yudas Iskariọd, keed ke atu mme mbed duob ye iba, emaadakka abịne mme ikpọ aku akenam edioomo nọ atap Yisọs anọ ammọ. 11Esịd amaanem ammọ eti-eti naña ekoppo, ammọ emaenyʌñ enwọñọ adinọ anye akʌk. Ndin anye atọọñọ ayem ufañ naña ada atap anye ayaak anọ ammọ.
Akpatre ndidia ndubi
12Ke akpa usen Usọrọ Uyo a-defịn mmiisisịneke, a-akenaaha esiwot edọñ Usọrọ Nsaña Mboyo, mme mbed Yisọs emaebịp anye ete, “Ayem ñnyịn ika itie ake-e ikinam ndutʌm ñkpọ se afo uduudia Usọrọ Nsaña Mboyo?”
13Ndin anye asio mbed amọ iba ate ammọ, “Ikaa esịd abio, eeyaekịt awodeen keed nte akama abañ mmọọñ. Ikeene anye. 14Ndin ufọk ake anye adidʌk, ebo anieufọk ado ke Andikpeeb abo, ‘Ubeed isen mmi a-ndiididia Basofa ye mme mbed mmi ado ake-e?’ 15Anye ayaiwọt ndufo ekamba ubeed ke anyọñ e-emaekebeeñe inịm. Itʌm mme ñkpọ ke ndo ibeeñe ñnyịn.”
16Mme mbed emaeka ekedʌk abio, ekekịt ukem-ukem naña Yisọs akebo ammọ. Ndin ammọ enyʌñ etʌm Basofa ebeeñe ebet anye.
17Ndubi ado, Yisọs amaasaña ye mbed duob ye iba adiwuọ. 18Ke ini ammọ ekebonoke ke akpokoro edia ndidia, Yisọs ate, “Ke akpanikọ ke ntañ inọ ndufo, awo keed ke atu ndufo, a-adiaaha ñkpọ mi ye ami, ayaantap miin.”
19Ammọ etọọñọ adifʌhọ, ndin ke adiana ke adiana, emaebịp anye ete, “Ñkọ idooho ami-o?”
20Ndin anye amaabọọrọ ammọ ate, “Ado awo keed ke atu ndufo adiideeb uyo ke usan ndidia ye ami. 21Ayịn Awo ana anyọñ, ukem naña ekewet ebaña anye. Ado ayaadiọọk inọ awo ake aditap Ayịn Awo. Akpaafọn ye awo ado adieke anye mmiikpikimanake mana.”
22Ke ammọ ekaaha iso edia ñkpọ, Yisọs amaaben uyo, ndin ke anye amaakenọ ekọọm a-ma, anye amaabuuñ anọ mme mbed amọ, ate, “Ibọ ami, ita; ami ado ikpọkidem mmi.”
23Akem anye aben kọọb, ke anye amaakenọ ekọọm, anye amaayaak anọ ammọ, ndin afịd ammọ enyʌñ enwọñ anye.
24Anye abo ammọ “Ami ado iyiib mmi ake ufa edioomo, e-eduọkkọ enọ uwak awo. 25Ke akpanikọ ke ntañ inọ ndufo nte, ami ndiinwọññọ mmịn atooho mfịd fain aba, tutu awuọ usen a-ndiitịmme ñnwọñ ke abio ubọọñ Abasi.”
26Ke ammọ emaekekwọ ikwọ, afịd ammọ emaewuọọñọ eka Abod Ọdif.
Yisọs ababak atañ ke Bita ayaaikañ imọ
27Do ke Yisọs aketañ ye mbed ammọ ate: “Afịd ndufo eyaefeeñe eñkpọñ miin akonayo ami, sia emaewet ebo,
“ ‘Nyaakpi akpemedọñ,
ndin mme edọñ eyaesuana.’
28 Ado, ami mmaaset ke ñkpa, ñyaibem ndufo iso ñka ke abio Kadidi.”
29Bita amaatañ anwa-anwa ate anye, “Afịd awo ekpukpọñ fiin, ami nduukpọññọ.”
30Yisọs amaabọọrọ anye ate, “Ke akpanikọ ke ntañ unọ fiin, mfịn ami, kpa idem akonayo ami, mbemiso akikọ akpọk akañ iba, afo ayaañkañ miin akañ ita.”
31Ado Bita asọọñọ ayịre atañ ate, “Akpedo ana ñkpa ye afo, ami nduukañña fiin.” Ndin afịd mmọn ñko etañ kpa ukem ado.
Ketsemeni
32Ammọ edaaña ekaiya itie e-koodo Ketsemeni, ndin Yisọs amaabo ammọ ate, “Ibet mmi, naña ami mbọọñọ akam.” 33Anye amaadat Bita ye Yemsi ye Yọọn aka, idem amaatọọñọ adifịna anye eti-eti anye amaanyʌñ akop akpọsọñ mfʌhọ. 34Anye amaasio adọkkọ ammọ abo, “Ukpọñ mmi afʌhọ eti-eti akpere ñkpa. Itie mi, inyʌñ ikpeme.”
35Anye akesaña adọọk etək, anye aduọ ke isọñ abọñ akam ate adieke usʌñ abaaha, yak ini ado aboiyo ikpọñ imọ. 36Anye ate, “Abba, Ete, afo amekan adinam afịd ñkpọ. Ben kọọb ami nsio ke iso. Ado yak akeedo naña ami nnyịmme, yak ado ke uduak mfo.”
37Anye ato adi adikịt nte mbed edaiya, abịp Bita ate, “Saimọn, adadaiya? Usʌkkọ ukan utaba idab ukpeme ye ami ukpọk awa keed? 38Ikpeme inyʌñ ibọñ akam mbaak ndufo ididʌk ke idomo. Ke akpanikọ, sịbidịd anyịmme, ado ikpọkidem akop mmemidem.”
39Anye amaatịmme aka amaana akebọñ akam, atañ kpa ukem ikọ ado. 40Anye aketịmme adi, anye adikịt ke ammọ esʌk edaiya, sia idab akeanekeke adʌk ammọ anyen. Ammọ ikidiọọñọke se ekpebọọrọ anye.
41Akem anye amaadi ayọhọ ñke nta, adibo ammọ ate, “Ndufo esʌk edadaiya eduọk adudu? Akem! Ini ado a-dikem. Sese, e-kappa Ayịn Awo esịn ke ubọk ndiọi awo. 42Idaaña ida! Yak inyọñọ! Andibiintap miin adiwuọ.”
Emʌm Yisọs
43Kpa idaha a-anye asʌkkọ atañ do ke inua, Yudas, keed ke atu ibed duob ye iba adʌk. Anye akesaña ye atu awo e-ekekamake mme eduad ye ñkpeti, a-mme ikpọ aku, mme akpeeb ibed, ye mme ñkpisọñ ekedọññọ.
44Awo a-akebooho itap anye amaanọ ammọ idiọọñọ, “Anye a-mbooho ntʌminua ado awo ado; imʌm anye iben ika, inekke ikpeme.” 45Anye adidakka abịne Yisọs kpa ndondo ado, ate anye, “Andikpeeb,” anyʌñ atʌm anye inua. 46Mme awo ado emʌm Yisọs, eben edakka. 47Awo keed ke atu ado a-akedaaha akpere asio akañkañ akpi ayịnufọk akwa aku utọñ akpịkke.
48Yisọs amaabịp ammọ ate, “Ndufo ewuọ embịne edidiimʌm miin ye eduad ye akpeti nte ebo ke ndo etubom mme asịn ntịmme? 49Mmaaba ye ndufo kwa usen, ñkpeeb ñkpọ ke mme akwere tembịd, ado ndufo ikimmʌmmọ miin. Ado mme ñkpọ ami etịppe nọ ikọ Abasi asu.” 50Idahado, afịd awo ekpọñ anye efeeñe.
51Akparawa keed a-akewañake isịn afọñ dinen ke idem, akeene Yisọs. Ammọ ekemʌm anye, 52anye amaafeghe ifed, akpọñ afọñ amọ.
Yisọs ke esob Sanhidrin
53Ammọ eben Yisọs eka atʌñ akwa aku, afịd mme ikpọ aku ye mme ñkpisọñ, ye mme akpeeb ibed emaebono do. 54Bita amaakeene Yisọs ke edem, akedʌk esịd akwere akwa aku. Do anye akesuuk atie ye mbon ukpeeme akwa aku awue ikañ.
55Afịd mme ikpọ aku ye afịd mme esob Sanhidrin emaeyem ikọ ntiense se etañ edian Yisọs nọ ediikan iwot anye, ado ikikịtte. 56Uwak mme ntiense nsu emaewuọọñọ edido anye uyo, ado ikọ ammọ ikisañake keed.
57Akem usʌk awo emaedaaña eda etañ ikọ ntiense nsu ndian anye: 58Ñnyịn imaikop nte anye abo, “Nyaawuud tembịd ami, e-ekedatta ubọkawo ebọp ndin ke usen ita nyaabọp mfen, a-awo mmiidatta ubọk ibọp.” 59Ndin kpa ye ado, ikọ ntiense ammọ ikisañake keed.
60Do ke akwa aku akedakka ada ke ufọọd esob, abịp Yisọs ate, “Afo uyemme adibọọrọ ikọ? Nso-o ke mme awo ami etañ ami udian fiin?” 61Ado Yisọs ikiisiooho uyo, ibọọrọke ndomo ikọ keed.
Akwa aku amaamaana abịp anye ate, “Afo ado Mesaya, Ayịn Abasi Andido Adidiọñ?”
62Yisọs abo anye, “Ami ke ado, ndufo eyaekịt naña Ayịn Awo atie ke ubọk udom Anie Adudu Abasi, ye naña anye adidi ke ntọñ ikpaanyọñ.”
63Akwa aku amaawai afọñidem amọ, ate atu awo, “Nso-o ntiense mfen ke iyem? 64Ndufo emekop atịme-atịme se anye atañ. Idahado, ndufo ekere die?”
Afịd ammọ emaebiom anye ikpe, ete anye adot ñkpa. 65Ndin usʌk awo etọọñọ editọọñ anye etab; efʌk anye afọñ ke iso; etọ anye eta, enyʌñ ebo anye ete, “Tañ brọfesi!” Mbon ñka ukpeme emaeben anye ewuọ enyʌñ ekeemia anye.
Bita akañ Yisọs
66Idaha Bita asʌkkọ aba ke esịd akwere akwa aku, ayịn abọikpa keed a-akedooho ayịnufọk akwa aku amaadʌk adi. 67Anye akekịt Bita nte awue ikañ, awuuk anyen ase anye, ate, “Afo ñko akeba ye Yisọs, awo Nasared ado.”
68Ado anye akañ ate, “Ndiọọñọke, inyʌññọ i-inwaña se ikọ mfo awuọọñọ.” Ndin Bita adakka akpọñ esịd akwere awuọ esiin.
69Kpa abọikpa ado amaatịmme adikịt anye, adọkkọ mbon se ikida ikpere ate, “Awo ami ado keed ke atu ammọ.” 70Ado anye amaana akañ.
Ke etək ini amaakeboiyo, mme awo se ikida ke ndo emaebo Bita ete, “Ke akpanikọ, afo ado awo keed ke atu ammọ, afo ado awo Kadidi; uyo usem mfo uyaada fiin.”
71Bita atọọñọ adikood isuuñọ, anyʌñ anwọñọ ñkpọ ate, “Ami ndiọọñọke awo a-ndufo etañña ikọ ebaña.”
72Ukem idahado, akikọ amaakpọk ayọhọ ñkemba. Ndin Bita amaatoiyo ikọ a-Yisọs akedọkkọke anye abo, “Mbemiso akikọ akpọk akañ iba, afo ayaañkañ miin akañ ita.” Ndin esịd amaabʌññọ anye, anye atua.
Currently Selected:
Maak 14: NAAM
Highlight
Share
Copy
Want to have your highlights saved across all your devices? Sign up or sign in
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
