Matiu 24
24
Ubiad itie ubọñ akam ye idiọọñọ akpatre ini
1Ke ini Yisọs asʌkkọ asaña awuo akpọñ tembịd, mme mbed amọ emaediwọọd anye mme ufọk tembịd. 2Anye abịp ammọ ate, “Emekịt afịd ñkpọ ami? Ami ntañ akpanikọ inọ ndufo, itiad ndomokeed mi idiidoroke ke mfen, eyaetoomo afịd ammọ eduọọñọ ke isọñ.”
3Naña Yisọs atieeghe ke Abod Ọdif mbed edibịne anye ndịbe-ndịbe edibịp anye ete, “Tañ inọ ñnyịn, idaha ake-e ke ñkpọ ami aditịppe, nso-o idiinyʌñ ido idiọọñọ adidi mfo ye ake utịd ederimbod?”
4Yisọs abọọrọ ate, “Itịm kpeme mbaak awo ndomokeed adibiaaña ndufo. 5Sia uwak eyaedi ke anyịñ mmi edibo, ‘Ami ndo Mesaya,’ eyaenyʌñ ebiaaña uwak awo. 6Eyaekop ebaña ekọñ ye etob ekọñ, ado ikiiyak esịd ndufo etịmede sia ami ado ñkpọ a-anaaha ate atịppe, utịd idiidiighe dion. 7Sia idịd eyaenwana anwan ye keed aken, abio ubọọñ eyaenyʌñ enwana ye abio ubọọñ mfen. Akañ ye unyekisọñ eyaebañña ke umiañ itie. 8Afịd ami edoñño ntọọñọ ubiak uman.
9 “Ndin eyaikappa ndufo enọ mbio e-ediitʌkkọ ndufo inyʌñ iwood ndufo, ñko afịd idịd eyaisua ndufo ke ntak mmi. 10Ke ini ado uwak awo eyaekpọñ mbuọdidem ami, edutappa keed aken enọ, enyʌñ edusuara idem ammọ. 11Uwak brọfed nsu eyaewuọọñọ edi enyʌñ edibiaaña uwak awo. 12Ke ntak ibak aditọt, ima ata uwak awo ayaadeeñe. 13Ado awo a-asọñọke ada akewuọ utịd eyaenyaaña anye. 14Ndin eyaekwọrọ eti etob abio ubọọñ ami ke afịd ederimbod nte ntiense enọ afịd idịd. Do ndin ke utịd adidi.
15 “Ndin umaukịt nte, ‘uduọ abom a-adatta nsobo adi,’ nte ada ke adisana itie, nte brọfed Danied aketañña, yak akood ñwed adiọọñọ, 16ndin yak mbon e-ebaññake ke Yudia efeeñe ekaiya mme abod. 17Yak awo ndomokeed ke anyọñ ufọk amọ akuuka adisio ñkpọ ke ufọk. 18Yak awo ndomokeed ke inwañ akuutịmme uka adikidat afọñ ufʌhọ amọ. 19Adido ekamba ñkpọ ndịk ke mme usen ado ediido inọ mme ibaan idịb ye mbio ekamake nsekayịn ke ubọk! 20Ibọñ akam ibo adifeghe ndufo akuudo ke ini akpọsọñ atueb me ke usen Sabad. 21Sia ke ini ado akpọsọñ ukuud a-akenanam mmiibaaha tọọñọ ke aditọọñọ ederimbod tutu idahami, ñko idiinyʌññọ iba, aba.
22 “Awo miikpikinamma mme usen ado aməho, awo ndomokeed ikpibọkkọke. Ado ke ntak mbon e-emaekemeemek, enam mme usen ado aməho. 23Ke ini ado awo ndomokeed akpibo ndufo, ‘Se mi, Mesaya aba mi,’ me, ‘Se ñko ke anye aba,’ ikiinịm ke akpanikọ. 24Uwak nsu-nsu Mesaya ye mme brọfed nsu eyaewọọñọ edi edinañña mme akwa idiọọñọ ye ñkpọntịbe mbaak ebiaaña kpa ye mbio emaekemeemek, akpedo ñkpọ ntodo akeme itịppe. 25Se, mmebak idọkkọ ndufo do mbemiso ini ado.
26 “Do ndin awo ndomokeed akpidọkkọ ndufo, ‘Se, anye ko ke akpautatan,’ ikiika do. Akpedo ebo, ‘Se anye mi, ke mme esịd ubeed,’ ikiinịm ke akpanikọ. 27Sia naña akep-kep asakka ato usakka utịn akesịm usobutịn, adidi Ayịn Awo adiiba ntodo. 28Itie keed ake adodo akpọ ñkpọ anaaha, do ke mme utere ediikiboho.
29 “Ndutʌkkọ ini ado amaasʌk ikwee-kweeñe,
“ ‘utịn ayaabre,
afiọñ idiinọọhọ unwana amọ aba,
mme ntantaafiọñ eyaeduọññọ eto ikpaanyọñ ke isọñ
ndin eyaenyeeñe mme adudu e-ebaha ikpaanyọñ.’
30 “Ke ini ado idiọọñọ Ayịn Awo ayaawuọ ada ke ikpaanyọñ ndin afịd idịd ke ederimbod eyaefʌho. Ammọ eyaekịt Ayịn Awo nte adi ke ntọñanyọñ ke adudu ke akwa ubọọñ. 31Anye ayaadọñ mme enyere amọ edifịt abukpoñ ke akpọsọñ uyo enam ikood. Ammọ edikoono mme andimek ikọd amọ eto afịd inuuk inaañ tọọñọ ke utịd ederimbod keed tutu asịm anye aken.
32 “Idahami, idat ukpeebñkpọ ami ito eto fik: Anye amaatọọñọ isio mfia mfịd, ndufo emediọọñọ ke ndaayo akpere. 33Kpa ye ado emaekịt afịd ñkpọ ami eyaediọọñọ ebo ke ini akpere, mmọdo ke inuausʌñ. 34Ntañ akpanikọ inọ ndufo, emana ami idiiboiyoke ifep mbemiso mme ñkpọ ami etịppe. 35Anyọñ ye isọñ eyaeboiyo efep, ado ikọ mmi ndomokeed idiiboiyoke ifep.
Awo idiọọñọke usen ye awa
36 “Awo ndomokeed idiọọñọke ibaña usen ado me awa ado, kpak mme enyere ke anyọñ me Ayịn Abasi, idiọọñọke. Ado Ete ikpọọñ adiọọñọ. 37Naña akeba ke ini Nua, adidi Ayịn Awo adiiba ntodo. 38Sia ke ini ado mbemiso ukwọ, mme awo ekesʌk edọ ndọ, enyʌñ enọ ke ndọ tutu usen Nua adʌkkọ ubom. 39Ammọ ikidiọọñọke ñkpọ ndomokeed ibaña se idiitịppe tutu ukwọ adiben afịd ammọ afep. Kpa ntodo ke adiiba ke adidi Ayịn Awo. 40Ideen iba eyaeba ke inwañ, ado eyaedat keed, ekpọñ anye aken. 41Ibaan iba ediisʌk ikọk ñkpọ ke itie ukọkñkpọ, ado eyaeben keed, ekpọñ keed.
42 “Do ndin ikpeme, sia ndufo idiọọñọke me nso-o usen ke Abọọñ ndufo adidi. 43Ado diọọñọ ntom: adieke anieufọk akpekediọọñọke me nso-o utọ ini ke akoneyo ke inọ adidi ufọk amọ, anye akpaakekpeme ufọk amọ, iyakka nọ inọ adʌk. 44Do ndin ana ndufo ebeeñe idem, sia Ayịn Awo adidi ke awa a-ndufo mmibeeñeke anye.
45 “Anie awo ndin ido eti ye anie iwuod ayịnufọk e-eteufọk amọ anịmme ke iwuod mme nditọufọk mfen ke afịd ufọk amọ nọ anye anọ ammọ udia ke eti ini? 46Ayaafọn ye ayịnufọk e-eteufọk adidikịt anye nte anam ñkpọ naña aketemme anye, eteufọk ami amaanyọñ idi. 47Ntañ akpanikọ inọ ndufo, anye ayaanịm anye nte akpeme afịd inie amọ. 48Ado kere baña nte ayịnufọk ami akpedooho ndubịk, ndin anye abo idem amọ, ‘Eteufọk mmi ayaakekpeene,’ 49ndin atọñọ imia emọ-emọ nditọufọk, adia ñkpọ anyʌñ añwọñ mmịn ye mme akpammịn. 50Eteufọk amọ ayaanyọñ adi ke usen ayịnufọk ami mmiikibekke anyen ye ke awa a-anye miidiọọñọke. 51Anye ayaamia anye ñkpa-ñkpa anyʌñ anọ anye aka itie mbon ndubịk, nte ntuaaña ye nta eded ediiba.
Currently Selected:
Matiu 24: NAAM
Highlight
Share
Copy
Want to have your highlights saved across all your devices? Sign up or sign in
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
