Matiu 25
25
Ñke abañake mme abọikpa duob
1 “Ke ini ado abio ubọọñ Abasi adiiba nte ibaan ndọ duob e-ekebenne utuenikañ ammọ ewuọọñọ eka adikikịt ebendọ. 2Ition ke atu ammọ ekedo ndisịme, ition edoñño mme adiọọñọ idem. 3Akpesʌk ado mme ndisịme ami ekekamake mme utuenikañ, ammọ ikikamake adan ikañ. 4Ado mme adiọọñọ ñkpọ emaekama adan ikañ ke iko ye ke utuenikañ ammọ. 5Ebendọ amaabiad ini adidi, ndin idap amaabọkkọ ammọ.
6 “Ado ke ufọọd akoneyo, emaebọñ ñkpọ, ‘Sese ebendọ! Iwuọọñọ ika ikikịt anye!’
7 “Ndin afịd ibaan ndọ emaedemme ke idap enyʌñ esioño inua utuenikañ ammọ. 8Ndin mme ndisịme ami emaebo mme adiọọñọ ñkpọ, ‘Inọ ñnyịn etək adan ikañ, utuenikañ ñnyịn eyaeniime.’
9 “Ado ammọ ebọọrọ, ‘Iyoo, adan ikañ idiikemme ñnyịn ye ndufo. Akpaafọn ndufo eka ebịne mme andinyam ekedep.’
10 “Ado idaha ammọ ekaiyake adidep adan ikañ, ebendọ amaadiwuọ. Mbio e-ekebeeñeke idem emaedʌk ufọk ndọ ye anye, ndin ekʌk usʌñ.
11 “Akema mme ibaan ndọ mbon aken ediwuọọñọ enyʌñ ebo, ‘Abọọñ, Abọọñ, kʌkkọ usʌñ inọ ñnyịn!’
12 “Ado ebendọ amaabọọrọ, ‘Ke akpanikọ ke idọkkọ ndufo, ami idiọọñọke ndufo.’
13 “Ke ntodo, itaba idab ikpeme, sia ndufo idiọọñọke usen me awa.
Ñke taden kood
14 “Ñko abio ubọọñ Abasi aba nte awo a-ayemme ika idʌñ mfen, a-akoodo mme nditọufọk amọ anyʌñ ayaak inie amọ anọ ammọ. 15Awo keed anye anọ taden ition, mfen taden iba, ayọhọ ita taden keed, kwa awo nte ukeme ammọ adooho. Akem anye adakka isañ. 16Awo a-akebọọhọ taden ition asọp aketọọñọ ubịn udua, anyʌñ anie taden ition ññwen nte udoro. 17Awo a-akebọọhọ taden iba, anyʌñ anam udoro taden iba ke ukem usʌñ ami. 18Ado awo a-akebọọhọ taden keed, amaaka aketịppe isọñ adịp akʌk eteufọk amọ.
19 “Ke anyan ini amakeboiyo, eteufọk ammọ amaato adi, adiduuñọ ñwed ibad akʌk ye ammọ. 20Awo a-akebọọhọ taden ition aben taden ition mfen adi anyʌñ adibo ate, ‘Ete, afo akennọ taden ition, se ition mfen a-ami ñnwanake mi.’
21 “Eteufọk amọ abọọrọ, ‘Amenam afọn, eti anamakpanikọ ayịnufọk! Afo amenam akpanikọ ke ntək ñkpọ; ami nyaunọ se ikpon ikan ami. Keene di wana ke inemesịd usọufọk!’
22 “Awo a-akebọọhọ taden iba anyʌñ adi adibo, ‘Eteufọk, afo akennọ taden iba, se iba mfen ami ññwanake mi.’
23 “Eteufọk amọ amaabo anye, ‘Amenam afọn, eti ayịnufọk anamakpanikọ! Afo amaawọt akpanikọ ke ntək ñkpọ; ñyaunọ fiin ikpọ ñkpọ. Di, di wana ke inemesịd usọufọk!’
24 “Ke akpatre, awo a-akenieeghe taden keed amaawuọ adi adibo eteufọk ate, ‘Ete, ami mmaadiọọñọ ke afo ado akpọsọñ awo a-adọkkọ ke itie uduutọọhọ, anyʌññọ akoono ke itie a-ammuukubonoke. 25Ke ntodo, idem amaañnyeñ ndin ami mmaaka ñkedịp taden mfo ke isọñ. Se anye mi, ake mfo kedo, mbọ do.’
26 “Ado eteufọk amọ amaabọọrọ anye ate, ‘Afo idiọọk ifu ayịnufọk! Awuọ afo amaadiọọñọ ke ami nsidọk ke itie a-mmeñketọọhọ ñnyʌñ ñkoono ke itie a-mmekebonoke? 27Do ndin akpekena afo aben akʌk mmi anọ mme akamakʌk; antooho ndi mi ñkpaabọ akʌk mmi ye udod.
28 “ ‘Ndin idahami, bọ anye akʌk ami kappa nọ awo a-anieeghe taden ition. 29Sia awo a-anieeghe ñkpọ eyaenọ anye ekan ado, ñko anye ayaanie akan se ikem anye; ado awo idiinieeghe ñkpọ, eyaebọ etək se anye anenie. 30Amaado ayịnufọk a-ammiifọnnọ ke usʌñ nte keed, top anye duọọk ke añwa, ke akịm, ke itie ntuaña mme nta eded ediiba.’
Mme edọñ ye ebod
31 “Ayịn Awo amaadi ke ubọọñ amọ, ye mme afịd enyere amọ, anye ayaadat itie amọ ke ebekpo ubọọñ amọ. 32Eyaebək afịd idịd ke iso amọ, ñko anye ayaabakka mme awo nte akpemeedọñ abakkake ebod ye edọñ. 33Anye ayaabon mme edọñ ke ubọk udom anyʌñ abon mme ebod ke ufien.
34 “Ndin Adidem ayaabo mbon e-ebaaha ke ubọk udom ate, ‘Edi ndufo e-Ete mmi adiọññọ, idat ñkpọ adia akpa abio ubọọñ e-ekenịmme inọ ndufo tọọñọ ke ntọọñọ ederimbod. 35Sia ndufo emaennọ ndidia ke ini abiọñ akendọññọ, ke itọñ akensatta emaennọ ñkpọ se ñnwọñ, emaenyʌñ endaara ke ñkedooho asenawo. 36Ke ñkenanake afọñ ndufo emaennọ afọñ, ndọñọ udọñọ, ndufo edinse, ke ñkpakọb, ndufo enyʌñ edinse.’
37 “Ndin mme ndinen awo eyaebọọrọ anye ebo: ‘Abọọñ, idahake-e ke ikukịt nte abiọñ udọñ ndin ñnyịn unọ ndidia, me itọñ usat ñnyịn unọ ñkpọ anwọñ? 38Idahake-e ke afo akedo asenawo ndin ñnyịn udaara fiin, me nte anana afọñ ndin ñnyịn unọ afọñ? 39Idahake-e ke afo akedọñọ me asịne ke ñkpakọb ndin ñnyịn iduse fiin?’
40 “Ñko Adidem ayaabọọrọ, ‘Ke akpanikọ ke idọkkọ ndufo, kpa nte ekenamma ami enọ keed ke atu nditọeka mmi, ekenam ennọ miin?’
41 “Ndin anye ayaabo mbon e-ebaaha ke ubọk ufien amọ ate, ‘Indaaña ke iso, mme isuuñọ ndufo ke idem, ika ke ikañ nsi-nsi e-ekebarake enịm enọ setan ye mme enyere amọ. 42Sia abiọñ amandọñ, ado ndufo ikinnọọhọ ndidia, itọñ amansat, ado ndufo ikinnọọhọ ñkpọ ndomokeed ñnwọñ. 43Ami ñkedo asenawo, ndin ndufo ikindarake miin, nnana afọñ ado ndufo ikinsịnne afọñ, ndọñọ ñnyʌñ mba ke ñkpakọb ado akenanam ndufo idinseeghe miin.’
44 “Ndin adido ini ammọ adibịp, ‘Abọọñ idahake-e ke ikukịt nte abiọñ udọñ me itọñ usat, nte ado asenawo me anana afọñ, adọñọ me aba ke ñkpakọb ndin ñnyịn idiighe idunọ unwam?’
45 “Ndin anye ayaabọọrọ, ‘Ke akpanikọ ke idọkkọ ndufo, kpa nte ndufo eketreke adinam ami nnọ keed ke atu ntək-ntək ami, ndufo eketre adinam ami innọ miin.’
46 “Ñko ammọ eyaedʌk ke nsi-nsi ufen, ndin mme ndinen awo eyaedʌk ke nsi-nsi uwem.”
Currently Selected:
Matiu 25: NAAM
Highlight
Share
Copy
Want to have your highlights saved across all your devices? Sign up or sign in
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
