Matiu 19
19
Usioño ndọ
1Ke ini Yisọs amaaketañ mme ikọ ami ima, anye amaakpọñ Kadidi aka ke efaak Yudia ke edem Yọdan edem uko. 2Mme uwak atu awo emaekeene anye, ndin anye amaakọk ammọ udọñọ do.
3Mme Farisi ifañ emaebịne anye adidomo anye. Ammọ ebịp ete, “Nte ado nnen-nnen ñkpọ awodeen adisio anwaan amọ ndọ ke ntak ake adodo?”
4Anye amaabọọrọ ate, “Ndufo ikikoodo ite ke aditọọñọ Andibod ‘akebot ammọ awodeen ye awonwaan,’ 5anyʌñ abo ate, ‘ke ntak ami, awodeen ayaakpọñ ete ye eka amọ anyʌñ akediana ye anwaan amọ, ndin ammọ awo iba eyaekappa abʌk keed? 6Anam ammọ idooho iba aba, ado edo abʌk keed.’ Anam se Abasi amaakedian, yak awo akuudiaaña.”
7Ammọ emaana ebịp ete, “Ntaha a-Moses akebooho yak awo anọ anwaan amọ ñwed uwuọọñọ ndọ anyʌñ abịne anye?”
8Yisọs abọọrọ ammọ ate, “Moses akeyaak ndufo esioño ibaan ndufo ndọ ato ntak isọñesịd ndufo. Ado ikidooho ntodo ke aditọọñọ. 9Ami ibo ndufo ke awo ake adodo a-asiooho anwaan amọ ndọ, ibọhọke ke ntak efịbe, anyʌñ adọ awonwaan mfen, asịn efịbe.”
10Mme mbed ebo anye, “Akpedo ñkpọ anwaan ye ebe aba ntom, afọn adiba udọọhọ ndo.”
11Yisọs abọọrọ ate, “Idooho afịd awo ekeme adinyịmme se ñkpeeb ami, ibọhọke mbon a-Abasi amaakenọ ukeme adinyịmme. 12Sia ubaak awo edo itọ sia ammọ ekemana ntodo, ubaak ado mme awo enam ammọ ekakpa itọ; ndin ubaak awo etre udọ ndọ ke ntak abio ubọọñ Abasi. Awo ake akan anyịmme ñkpọ ami yak anyịmme.”
Ntəkayịn ye Yisọs
13Ndin emaeben ntəkayịn esọk Yisọs nọ anye adot ammọ ubọk ke iwuod anyʌñ abọñ akam anọ ammọ. Ado mme mbed emaekpan mbon e-ekebenne ammọ edi.
14Yisọs amaabo ate, “Yak ntəkayịn eñkeene miin, ke awo akpan ammọ, sia abio ubọọñ Abasi anie utọ mbon ami.” 15Ke ini anye amaakedot ammọ ubọk ama, anye amaakpọñ do aka itie mfen.
Imọ awo ye abio ubọọñ Abasi
16Akem awo keed asaña abịne akebịp anye ate, “Andikpeeb, nso-o eti ñkpọ ke ñkpenam nọ nnie uwem nsi-nsi?”
17Yisọs abọọrọ ate, “Ntaaha afo ambịppe miin abaña se ifọn-ọ? Awo keed kpọd aba a-afọnnọ. Adieke afo ayemme uwem nsi-nsi, nịm ibed Abasi.”
18Awo ado amaabịp anye ate, “Mme ake ibed?”
Yisọs amaabọọrọ ate, “Kuuwot awo, kuusịn efịbe, kuuyịp inọ, kuutie ntiense nsu, 19kpono usọ ye uka, nyʌñ ma mbọhọidʌñ mfo nte idem mfo.”
20Akparawa ado amaabọọrọ ate, “Mmenịm afịd mme ibed ami. Nso-o mfen isʌghọ?”
21Yisọs abọọrọ anye ate, “Akpedo ameyem adifọn mmaa, kaa kenyam inie mfo nyʌñ kpọñ akʌk nọ mme uwueene, ndin afo ayaanie inie uto ke abio ubọọñ Abasi. Ndin di ñkene miin.”
22Ke ini akparawa ami amaakekop ñkpọ ami anye amaadakka anyọñ ke mfʌghọ, sia anye amaanie ñkpọ eti-eti.
23Ndin Yisọs abo mme mbed amọ ate, “Ntañ akpanikọ inọ ndufo, ayaasọñ anie ñkpọ awo adidʌk abio ubọọñ Abasi. 24Mme maana ntañ inọ ndufo nte ke ado mmem-mmem ñkpọ enañ mbiomo adiboiyo ke adudu abiawuen ñkan anie ñkpọ awo adidʌk abio ubọọñ Abasi.”
25Ke ini mme mbed emaekekop ami, idem amaakpa ammọ, anam ammọ emaebịp anye ete, “Anie awo ndin idiibọkkọ?”
26Yisọs amaabenne anyen ase ammọ anyʌñ abo ate, “Ñkpọ ami asọñ ye awo, ado ye Abasi afịd ñkpọ ado mmem-mmem.”
27Bita abọọrọ anye ate, “Ñnyịn imikpọñ afịd ñkpọ inyʌñ ukeene fiin! Nso-o idiiba inọ ñnyịn?”
28Yisọs abo ammọ ate, “Ntañ akpanikọ inọ ndufo, ke ini afịd ñkpọ adikappa ufa, ke ini Ayịn Awo aditie ke ebekpo ubọọñ amọ, ndufo e-ñkeeneke miin eyaetie ke ebekpo duob ye iba adibiire ikpe nnọ mme idịd Isred duob ye iba. 29Ndin afịd awo e-emaekekpọñ mme ufọk, ye nditọeka ideen ye nditọeka ibaan, ye ete, ye eka ye nditọ ye ikọd inwañ ke ntak mmi eyaebọ utịb akañ ikie enyʌñ enie uwem nsi-nsi. 30Ado uwak awo e-eboiyoke iso, eyaekpe edem, ndin uwak e-ekpeghe edem, eyaeboiyo iso.”
Currently Selected:
Matiu 19: NAAM
Highlight
Share
Copy
Want to have your highlights saved across all your devices? Sign up or sign in
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
