Matiu 18
18
Andikpon ñkan ke abio ubọọñ Abasi
1Ke ini ado mme mbed Yisọs emaedibịne anye enyʌñ edibịp, “Anie ido andikpon ñkan ke abio ubọọñ Abasi?”
2Yisọs amaakood etəkayịn anyʌñ anam anye adida ke ufọọd ammọ. 3Ndin anye abo ammọ, “Ñtañ akpanikọ inọ ndufo, ibọhọke ndufo ekpəhọ enyʌñ ekappa eba nte ntək nditọ, ndufo idiidʌkkọ abio ubọọñ Abasi. 4Ke ntodo, awo ake adodo a-asuuhọke idem amọ nte etəkayịn ami, anye ado andikpon ñkan ke abio ubọọñ Abasi. 5Awo a-adaarake etəkayịn keed ntom ke ntak anyịñ mmi, andaara miin.
Se inam awo aduọ
6 “Ado awo a-adooho ñkpọiduọ anọ keed ke atu mme etəkayịn ami e-ebuọttọ idem ye ami anam idiọọkñkpọ, akpaafọn ekọọñ anye ekamba itiad ke itọñ enyʌñ enam anye adeñ ke ntotəño akpa mmọọñ. 7Adọdiọọk anọ ederimbod ke ntak mme ñkpọ a-anamma mme awo enam idiọọk ñkpọ. Ñkpọ ntodo ana atịppe, ado adọdiọọk anọ awo a-anamma ñkpọ ntodo atịppe. 8Ubọk mfo me ukod mfo akpenam nọ afo anam idiọọk ñkpọ, kpịkke anye sio nnyʌñ top duọọk; sia afọn afo adinie uwem nsi-nsi nte mbʌñọ, ñkan adisaña ye ubọk iba me ukod iba ñkedʌk ikañ nsi-nsi. 9Ñko anyen mfo akpebo ido ñkpọiduọ mfo, kappa anye sio nnyʌñ top duọọk, sia afọn afo adinie uwem nsi-nsi ye anyen keed ñkan adinie anyen iba ñkedʌk ke ikañ nsi-nsi.
Mbʌk ñke nyooñ edọñ
10 “Ikpeme mbaak ndufo idisappa keed ke atu ntəkayịn ami. Ami idọkkọ ndufo ke mme enyere ammọ esʌk ekaka iso eba ke iso Ete mmi ke anyọñ. 11Sia Ayịn Awo akedi adinyaaña se ikisop.
12 “Ekere die, adieke awo anieeghe edọñ ikie, ndin keed ke atu ammọ asop usʌñ, nte anye idiikpọññọ anaañ ye usʌkkeed ado ke abod ika ikiyem keed andikisop? 13Ke akpanikọ idọkkọ ndufo, adieke anye akịtte edọñ keed ado, anye ayaanem esịd abaña anye ado akan anaañ ye duob ye usʌkkeed ako e-emmiikisoppo. 14Ukem-ukem ado, idooho uduak Ete ndufo ke anyọñ nte keed ke atu ntəkayịn ami ekpesop usʌñ.
Adise mkpọ mbaaña idiọọkñkpọ ke ufọkabasi
15 “Adieke ayịnuka awodeen me awonwaan unamma fiin idiọọkñkpọ, kaa keneme ye anye ikpọọñ, ke ufọọd ndufo awo iba. Anye akpekop se atañ, afo amemaana adat ayịnuka anie. 16Adieke ammọ mmiikoppo unọ, dat awo keed me iba saña, nọ ato do ‘afịd ikọ anaasọọñọ ada ke inua ntiense awo iba me ita.’ 17Ado anye akpesịn adikop nnọ ammọ, ke tọt nọ ufọkabasi, ñko adieke anye asịnne adikop se abio etañ, dat anye nte yentaid me abọ taski.
18 “Ke akpanikọ ke idọkkọ ndufo, se adodo ake ndufo ebọppọ ke isọñ, eyaebọp ke anyọñ, se adodo ndufo etatta ke isọñ, eyaetat ke anyọñ.
19 “Ke akpanikọ ke mmaana idọkkọ ndufo, adieke awo iba ke atu ndufo ke isọñ enyịmmeke adibeeñe ñkpọ akeedodo, Ete ndufo ke anyọñ ayaainọ ndufo. 20Sia itie awo iba me ita ebohoke ke anyịñ mmi, ami mmọdo mba ke atu ammọ.”
Mbʌk ñke anana mbọm ayịnufọk
21Ndin Bita amaabịne Yisọs akebo, “Abọọñ, akañ ifañ ke ami nnie adifeen nnọ ayịneka mmi awodeen me awonwaan adieke anye andueeghe? Me ñkpọ nte akañ itiaba?”
22Yisọs amaabọọrọ anye ate, “Ami ubo fiin idooho akañ itiaba, ado akañ ata ye duob ye itiaba.
23 “Ke ntodo, abio ubọọñ Abasi atie nte adidem a-akenamma ibad akʌk amọ ye nditọufọk amọ. 24Ini unam ibad amaakedisịm, ammọ emaeben awo a-akekamake tọsịn taden duob edi. 25Anye ikinieeghe usʌñ adikpe isʌñ ami. Ke ntodo, eteufọk amọ amaanọ uyo ate enyam anye ye anwaan ye nditọ ye afịd inie amọ, nọ eben ekpe isʌñ ami.
26 “Ke ayịnufọk ami akoppo ami, anye amaaduọ ke iso eteufọk, akpeiye, abo ‘Nie ime ye ami, ke ñyaukpe afịd akʌk ami.’ 27Ndin eteufọk amọ amaatua anye mbọm, akpịkke isʌñ amọ asio, anyʌñ ayak anye anyọñ.
28 “Ado ke ini ayịnufọk ami anyọññọ, anye amaadibommo ayịnufọk mfen a-akekamake anye taden ikie anyʌñ amʌm anye itọñ, atọọñọ adifʌt anye itọñ, anyʌñ abo anye ate, ‘Ñkpe se afo añkama.’
29 “Ayịnufọk ami amaaduọ anye ke ukod anyʌñ akpeiye anye abo: ‘Nie ime ye ami ke ñyaukpe.’
30 “Ado anye ikinyịmmeke. Utu ke ado, anam esịn anye ke ufọk ñkpakọb tutu anye akpe isʌñ ado. 31Mme nditọufọk mbon ako emaenekke efʌghọ ke idaha ammọ ekịtte se ikitịppe, ndin ammọ emaeka ekedọkkọ eteufọk ammọ afịd ñkpọ ami.
32 “Ndin eteufọk amaadọñ abo ekood awo ami adi, anyʌñ adibo anye, ‘Afo ibak ayịnufọk, ami mmaadooro afịd isʌñ mfo nsio ke idaha afo akeñkpeiyeke miin. 33Nte afo ñko ukpunieeghe mbọm ubaña ayịnufọk mfen nte ami ñkenieeghe mbọm ubaña fiin?’ 34Ke iyadesịd, eteufọk amaakappa anye anọ mme anọ awo ufen, tutu anye akpe afịd isʌñ amọ.
35 “Ntom ke Ete mmi ke anyọñ adinam ye ndufo, ibọhọke ndufo efeen enọ ayịneka ndufo ke afịd esịd ndufo.”
Currently Selected:
Matiu 18: NAAM
Highlight
Share
Copy
Want to have your highlights saved across all your devices? Sign up or sign in
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
