Matiu 17
17
Ukpʌghọ uduod
1Usen itiokeed amaakeboiyo, Yisọs amaadat Bita, Yemsi, ye Yọọn, ayịneka Yemsi akedọọk anyan abod keed enyʌñ eba do ke idem ammọ ikpọọñ. 2Do ke uduod amọ akekpəho. Iso amọ akediyayamma nte utịn, afọñ amọ adifia nte unwana. 3Ndin ete ise, Moses mme Edaiya ewuọọñọ eda, ammọ eneme nneme mme Yisọs.
4Ndin Bita abo Yisọs ate, “Abọọñ, afọn ñnyịn adiba mi. Adieke afo amaaha nyaabọp atayad ita, keed ake mfo, keed ake Moses, keed ake Edaiya.”
5Ke ini anye asʌkkọ atañ ntom, nyamma-nyamma ntọñanyọñ adifʌk ammọ akanna; ndin uyo ato ntọñanyọñ ami ate, “Anye ami ado Ayịn mmi a-mmaaha, nnyʌñ nnem esịd ye anye. Ikpañ utọñ inọ anye.”
6Ke ini mbed amọ ekoppo ami, ammọ emaeduọọñọ ke isọñ efʌk iso ammọ ke ndịk. 7Ado Yisọs adituuk ammọ ate, “Idakka ida, ikiinyek idem.” 8Ke ini ammọ ebenneke iso ammọ, ikikịtte awo ndomokeed aba, ibọhọke Yisọs.
9Naña ammọ esʌkkọ esọiyọ abod ado, Yisọs adʌt ammọ utọñ ate, “Ikiitañ se ekịt inọ awo ndomokeed tutu enam nọ Ayịn Awo aset ke ñkpa.”
10Ndin mbed ebịp anye, “Ntak a-mme andikpeeb mbed ebooho ke ana Edaiya abem iso adi-e?”
11Anye abọọrọ, “Ke akpanikọ, Edaiya asʌk adi adituum afịd ñkpọ mboon naña akesido. 12Ado ami idọkkọ ndufo, Edaiya adidi, ado ammọ ikidiọọñọke anye, ndin etịmme enam anye se ammọ ema. Kpa ukem usʌñ ami ke Ayịn Awo adibọ ufen ke ubọk ammọ.” 13Ke ini ado mbed amọ ekekere ke anye aketañ ikọ ami anọ ammọ abaña Yọọn Aduọkmmọọñ.
Yisọs akọk akparawa a-anieeghe dimọn
14Ke ini ammọ edisịmme atu awo, awo keed amaasaña akpere Yisọs anyʌñ atọọñọ edọñ ke iso amọ ate. 15Anye abo, “Abọọñ, tua ayịn mmi mbọm, anye ado ndukpi anyʌñ abọ ufen eti-eti. Anye asiduọ adʌk ikañ ye mmọọñ. 16Mmaaben anye nsọk mbed mfo ado ammọ ikikanna ikọk anye.”
17Yisọs abọọrọ ate, “Ndufo mbon unana mbuọdidem ye ñkwaña uwem emana anye ami, ndiiba ye ndufo ñkpeene die? Ben ayịn ado nsọk.” 18Yisọs amaawuuk dimọn ado ndin dimọn amaawuọ ayịn ke idem, idem anyʌñ asọñ anye tọọñọ ke ebe ado.
19Akem mbed edibịne Yisọs ndịbe-ndịbe enyʌñ ebịp anye ete, “Ntak a-ñnyịn mmiikikemeke adibịn ado nsio-o?”
20Anye abọọrọ, “Sia mbuọdidem ndufo ado ata etək-etək. Ntañ akpanikọ inọ ndufo, ekpenie mbuọdidem akpesʌkkọ asịp nte ñkpasi mọstad, emekeme ibo abod ami, ‘Dakka ke itie ami kaa ko, ndin anye ayaadakka.’ Ñkpọ ndomokeed idiikanna ndufo. 21Ado ekeme adibịn dimọn anye ami ke akam ye utreudia.”
Yisọs atañ abaña ñkpa amọ ayọhọ ñkañ iba
22Ammọ emaekedisịm Kadidi, Yisọs abo, “Eyaetap Ayịn Awo esịn ke ubọk mme awo. 23Ammọ eyaewot anye, ndin ke ayọhọ usen ita eyaenam anye aset ke ñkpa.” Ndin mbed amọ emaefʌhọ eti-eti.
Taksi ake tembịd
24Yisọs ye mbed amọ emaekedisịm Kapanọm, mme abọ taksi tembịd a-akedooho drasma iba, edibịp Bita, “Eteufọk ndufo isikpeeghe taksi tembịd?”
25Anye abọọrọ, “Asikpe.”
Ke ini Bita adʌkkọ ufọk, Yisọs akedo akpa awo aditañ ikọ. Anye abo, “Saimọn nsido akikere mfo? Mme ndidem ederimbod ebọ isob ye taksi eto mmọ-ọ: me ebọ eto mme amanaisọñ me ebọ eto mbon mfen?”
26Bita abọọrọ, “Mbon mfen.”
Yisọs abo anye, “Ndin esio mme amanaisọñ efep. 27Ado mbaak ñnyịn ididue ammọ, ka ibiok ako, ke top uwaam sịn. Ben akpa iyak a-afo uduumʌm, tat anye inua, ndin ayaakịt drasma inaañ. Ben anye sọk ammọ ke taksi mmi ye ake mfo.”
Currently Selected:
Matiu 17: NAAM
Highlight
Share
Copy
Want to have your highlights saved across all your devices? Sign up or sign in
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
