Duk 7
7
Mbuọdidem awo sentudiọn
1Ke Yisọs amaakekweeñe se anye akenie aditañ nnọ mme awo, anye amaaboiyo aka abio Kapanọm. 2Do, ayịnufọk sentudiọn keed e-eteufọk akemaaha eti-eti amaadọñọ akpere ñkpa. 3Ndin sentudiọn ado akekop abaña Yisọs, anye amaadọñ mme etubom mme Yuu ate ekekood anye nọ adikọk ayịnufọk amọ udọñọ. 4Ammọ emaedinekke ekpeiye Yisọs ete, “Mbọk dinwam sentudiọn ami ke anye adot se afo akpenwam, 5sia anye ama abio ñnyịn; amaanyʌñ abọp sinakọk inọ ñnyịn.” 6Ndin Yisọs amaakeene ammọ.
Ado mbemiso anye akesịm ufọk ado, sentudiọn amaasio mme ufan amọ adọñ anọ Yisọs ate, “Abọọñ, mbọk kuukpa idem adidi ufọk mmi sia ami ndotto nte afo akpedʌkkọ ke idak akọm mmi. 7Anye anam nọ ami mmiikikpaaha idem ami aduubịne fiin. Ado tañ sʌk ikọ ke udọñọ ayaakweeñe ayịnufọk mmi. 8Sia ami ke idem mmi ndo andikara mme mbon ekọñ, ñkpebo keed ke atu ammọ ‘Kaa,’ anye aka; mbo anye ako, ‘Di,’ ndin anye adi. Ñnyʌñ mbo ayịnufọk mmi mfen, ‘Nam ami,’ anye anam.”
9Idem amaakpa Yisọs adikop ikọ sentudiọn ami, ndin anye akanna iso atañ anọ mbon atu awo e-ekekeeneke anye ke edem ate, “Ntañ akpanikọ inọ ndufo nte ke kpaanam ñkịtte utọ mbuọdidem a-akponno ntom, kpa ke abio Isred.” 10Ndin mme isʌñutom ami eketịmme enyọñ ufọk, ammọ emaakekịt ayịnufọk ado ke nsọñidem.
Yisọs anam ayịn ebekpa aset ke ñkpa
11Usen ifañ akeboiyo, Yisọs amaasaña ye ibed amọ ye atu awo aka abio a-akereke Neen. 12Anye akekpere inuaatob abio ado, sese naña ebiom ebiom akpo awo ewuọ edi. Eka akpañkpa ami akedo ebekpa, akenyʌñ anie sʌk ayịn keed ado kpọd. Ndin ekamba udịm awo ke abio ado emaekeene mma ami esaña. 13Udʌk amaamʌm Abọọñ ke adikịt ebekpa ami, ndin anye abo anye, “Kuutua.”
14Do ndin anye amaasaña aketuuk ñkpọ e-ekebenne akebeakpo amọ, mme andikibiom etuak eda, ndin anye ate, “Akparawa, ami ubo fiin, dakka da!” 15Ndin akpañkpa adakka ada atie, anyʌñ atọọñọ aditañ ikọ, ndin Yisọs ayaak anye anọ eka.
16Idem amaakpa afịd awo, ndin ammọ emaenyʌñ etooro Abasi ete, “Akwa brọfed awuọ awọt idem ke ufọọd ñnyịn, Abasi adise ikọd amọ.” 17Etob amọ amaasuana akesịm Yudia ye afịd ñkanñkʌk abio ado.
Yisọs ye Yọọn Aduọkmmọọñ
18Mme mbed Yọọn emaetañ mme afịd ñkpọ se Yisọs akenañña ami enọ Yọọn. 19Ndin Yọọn amaasio mbed amọ iba adọñ ekebịp Abọọñ ebo, “Afo ado awo a-akenaaha adi, me ana itie ibet awo mfen?”
20Ammọ ekedikịt Yisọs, ete anye, “Yọọn Aduọkmmọọñ akidọñ ate idubịp fiin ibo, ‘Afo ado awo a-akenieeghe adidi me itie ibet awo mfen?’ ”
21Ukem-ukem idahado Yisọs akesʌk akọk umiañ awo udọñọ, ayọ mfịna ammọ, anyʌñ abịn ndiọi sịbidịd ke idem mme awo asioño, anyʌñ anam umiañ mbon nnan ekịt usʌñ. 22Anye amaabọọrọ ammọ ate, “Itịmme ika ikidọkkọ Yọọn se ndufo ekịt enyʌñ ekop: mme nnan ekịt ñkpọ, mbʌñọ esaña isañ, mme akpamfia esana, inan ekop ikọ, mme akpañkpa eset, enyʌñ ekwọrọ eti mbʌk Abasi enọ mbon uweene. 23Afọfọn anọ awo a-ammiiduọọghọ ke ntak mmi.”
24Mme isʌñutom Yọọn ekenyọñọ, Yisọs amaatọọñọ aditañ ikọ nnọ mme awo ado mbaña Yọọn ate, “Nso-o ke ndufo ekewuọọñọ eka ke akpautatan adikikịt? Me ñnyanyaaha ake afịm anyeeñeke? 25Mmiidooho ntodo, nso-o ndin ke ekewuọọñọ eka adikịt? Awo a-asịneke uyaiya-uyaiya afọñidem? Iyoh, mbon usiine nti afọñ ñnyʌñ nnie umiañ nti ñkpọ ebañña ke ufọk adidem. 26Nso-o ndin ke ndufo ekewuọọñọ eka adise? Brọfed? Ih, ami ntañ inọ ndufo, anye idooho ñkaña brọfed kpọd. 27Anye ke ñwed Abasi aketañ abaña, abo:
“ ‘Sese, Ami ñyaadọñ isʌñutom mmi
uboiyo fiin iso nọ ato do adiọñ usʌñ unọ fiin.’
28 Ami ibo ndufo nte, ibaaha awo ndomokeed ke afịd mbon se eka aman a-akponno akan Yọọn, ado awo andisịp ñkan ke abio ubọọñ Abasi akpon akan anye.”
29(Afịd mbon se ikikop ikọ amọ ye mme abọ taksi ñko emaedaara adinyaaña Abasi ke adikibọ uduọkmmọọñ Yọọn. 30Ado mme Farisi ye mme nta akpeeb ibed emaesịn uduak Abasi ke idem ammọ sia ikibọọhọ uduọkmmọọñ Yọọn.)
31Yisọs amaamaana abo ate, “Nso-o ke ñkpedat ndomo emana ami? Ammọ ebit so-o? 32Ammọ ebit ntəkayịn e-ebonoke ke añwa udua etañ mme emọ-emọ ete:
“ ‘Ñnyịn imaifịt adʌk unọ,
ado afo umaaha inek;
imaikwọ ikwọ ikpo unọ,
ado afo umaaha itua ayịd.’
33 Sia Yọọn Aduọkmmọọñ amaadi, idiaaha ñkpọ inyʌññọ inwọñ ukọd, ndin ndufo ete, ‘Anye anie dimọn.’ 34Ayịn Awo amaadi, adia ñkpọ anyʌñ añwọñ mmịn, ndin ndufo ete, ‘Kap se adiọọkitọñ ye ukọdnnaam, ufan mme abọ taksi ye ndiọi awo.’ 35Ado edat utom ifiọk ediọọñọ ifiọk eto ubọkutom amọ.”
Awonwaan anam idiọọkñkpọ ayet Yisọs adan
36Awo Farisi keed amaakood Yisọs ufọk, anye amaaka aketie, akanna abere ke akpokoro ndidia ke ufọk awo ami. 37Mma keed ke abio ado a-akedooho anam idiọọk, akekop ke Yisọs mmọ ke ufọk awo Farisi ami, amaaben anemufịk adan ke ekpeme adabasta adi. 38Naña anye akeadaaha ke edem Yisọs atua ayịd aduọk, mmọọñayịd ado amaaduọihọ ke ukod Yisọs. Ndin anye amaakama ided amọ akwokko mmọọñayịd ado, atʌm inua ke ukod Yisọs anyʌñ adat anemufịk adan ado afiọññọ anye ke ukod.
39Awo Farisi a-akekoodo anye ufọk akekịt ami, anye amaatañ ke idem amọ abo, “Akpedo awo ami ado brọfed akpa adiọọñọ se utọ awo awonwaan a-atuuhọ anye mi ado, ke anye ado anamidiọọk.”
40Yisọs amaadiọọñọ akikere amọ, ndin abo anye, “Saimọn, mmenie se mbo ntañ unọ.”
Saimọn ate, “Andikpeeb, tañ.”
41Yisọs amaabo anye ate, “Awo akenie mme akamaisʌñ iba, keed akama anye kọbọ ikie ition, anye ako akama kọbọ aba ye duob. 42Sia ammọ ba keed mmiikikanna isʌñ ami ikpe, anye amaafeen anọ ammọ. Anie ke atu iba ami adima anye ikan?”
43Saimọn ate, “Ñkere mbo anye e-ekefeene isʌñ se iwak ikan.”
Yisọs ate, “Amenen.”
44Ndin Yisọs amaawọññọ ase mma ado anyʌñ abo Saimọn ate, “Amekịt a-mma ami? Ñkedʌk ufọk mfo, ukunnọọhọ mmọọñ uyieukod, ado a-mma ami adat mmọọñayịd amọ anyet ukod anyʌñ adat ided iwuod amọ akwokko ukod mmi. 45Ukuntʌmmọ inua, ado tọọñọ ñkedi a-mma ami itreke aditʌm inua ke ukod mmi. 46Ukuñfiọọñọke adan ke iwuod, ado a-mma ami amfiọọñọ anemutebe adan ke ukod. 47Ke ntak ado, ubo fiin ke akpesʌk ado nte idiọọkñkpọ amọ awakka, efeen enọ anye sia anye awọt ekamba ima. Adodo awo e-efeene etək-etək ndudue, ima amọ anyʌñ ado etək-etək.”
48Akema, anye ate a-mma ado, “Efeen mme idiọọkñkpọ mfo unọ.”
49Do ke mbon e-ekebaaha ke akpokoro ndidia ye anye ebo emọ-emọ ete, “Awo ami ado anie afeene anọ awo, kpa ke mme idiọọkñkpọ?”
50Ndin Yisọs ate a-mma ado, “Mbuọdidem mfo unyaaña fiin; nyọñ ke emem.”
Currently Selected:
Duk 7: NAAM
Highlight
Share
Copy
Want to have your highlights saved across all your devices? Sign up or sign in
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
