Duk 6
6
Yisọs ado abọọñ Sabad
1Ke usen Sabad keed Yisọs amaasaña aboiyo ke mme inwañ akpakpa, ndin mme ibed amọ emaetọọñọ adiwaak mfịd akpakpa nta. 2Ubaak mme Farisi emaebịp ammọ ebo, “Ntak a-ndufo enamma ñkpọ ami ibed akpanna adinam ke usen Sabad-a?”
3Yisọs amaabọọrọ ammọ abo, “Nte akenam ndufo ikoodo se Defid ye mme nsaña amọ ekenam ke ini abiọñ akedọññọ ammọ? 4Anye amaadʌk ufọk Abasi anyʌñ asio uyo emaekediọñ ata, uyo a-adooho mme aku kpọd ekenie unen adita. Anye amaanyʌñ ayaak ubaak anọ mme nsaña amọ.” 5Yisọs amaadian do abo ammọ, “Ayịn Awo ado Abọọñ Sabad.”
6Ke usen Sabad mfen, anye amaadʌk aka ke sinakọk anyʌñ akekpeeb ñkpọ; ndin awodeen keed u-ubọk udom amaakekpa amaaba do. 7Mme Farisi ye mme akpeeb ibed emaeyem se ekpedat ebiom Yisọs ikpe, ado anam ammọ emaetịñ anyen ese me anye ayaakọk udọñọ ke usen Sabad. 8Ado Yisọs amaadiọọñọ se ammọ ekekere, ndin abo awodeen a-akenieeghe ikpa-ikpa ubọk ate, “Dakka da ke iso afịd awo.” Awo ado amaanyʌñ adakka ada.
9Yisọs ndin abo ammọ ate, “Yak ibịp ndufo ñkpọ ise: ake-e ido se ibed atemme abo enam ke usen Sabad, adinam eti me adinam idiọọk, adinyaaña uwem awo me adisobo?”
10Anye amaakanna anyen aseed afịd awo, ndin abo awo u-ubọk amaakekpa ate, “Sio ubọk mfo nyan.” Anye ñko amaanam se Yisọs akebo anye anam, ndin ubọk amaakappa adeghe. 11Ado mme Farisi ye mme akpeeb ibed emaekop iyadesịd enyʌñ etọọñọ adidiomo ye keed-a-keen se ammọ ekpenam Yisọs.
Yisọs amek mme mbed duob ye iba
12Akedo usen keed, Yisọs amaawuọ aka ukañ abod-abod aketie afịd akonayo abọñ akam anọ Abasi. 13Ayo akesieere, anye amaakood mme ibed ammọ akpere idem ndin anye amaamek awo duob ye iba ke atu ammọ a-anye akekoodo mme abọsịd:
14Saimọn (anye akekoodo Bita), ayịneka amọ Andru,
Yemsi,
Yọọn,
Fidib,
Batodomiu,
15Matiu,
Tọmọs,
Yemsi ayịn Afiọs,
Saimọn a-ekekoodo Sidọd.
16Yudas ayịn Yemsi,
ye Yudas Iskariọd, a-akedidooho anditap Yisọs.
Mme adidiọñ ye mme nsueñ
17Akem anye amaasọiyọ ye ibed amọ edida ke unaisọñ. Ata uwak mbed ye eka atu awo emaeto ke afịd Yudia, eto Yerusedem, ye mben esʌk Taya ye Sidọn edi, 18e-ekedieeghe adikop ikọ amọ ye adibọ ukọk udọñọ. Anye amaakọk mme awo a-ndiọi sịbidịd ekefịnake, 19ñko afịd awo emaenwana adituuk anye, sia adudu akesʌk awuọ anye ke idem anyʌñ asʌk akọk afịd ammọ udọñọ.
20Ke anye amaakebenne anyen ase mme mbed amọ, anye amaabo:
“Afọfọn inọ ndufo e-edooho uweene,
sia abio ubọọñ Abasi inie ndufo.
21 Afọfọn inọ ndufo e-etieeghe abiọñ idahami,
sia eyaedia eyʌkkọ.
Afọfọn inọ ndufo e-etuaaha ayịd idahami,
sia eyaesak imam.
22 Afọfọn inọ ndufo a-mme awo esuaaha,
esara ke atu, esuenne ndufo
enyʌñ esịn anyịn ndufo nte idiọọk ñkpọ,
ke ntak Ayịn Awo.
23 “Idaara kebaña usen ado inyʌñ ikop ata inemesịd, sia utịb ndufo akpon ke abio ubọọñ Abasi. Sia ukem ado ke mme eteete ammọ ekenam mme brọfed.
24 “Ado ifọnnọ inọ ndufo e-edoññoke mme imọ awo,
sia ndufo emebọbọ idọñesịd ndufo.
25 Ifọnnọ inọ ndufo e-ediaaha eyʌkkọ idahami,
sia abiọñ ayaidọñ ndufo.
Ifọnnọ inọ ndufo e-esakka imam idahami,
sia ndufo eyaefʌghọ enyʌñ etua ayịd.
26 Ifọnnọ inọ ndufo a-mme awo etañña nti ikọ ebaña,
sia ntodo ke mme eteete ammọ ekesinam mme brọfed abiaaña.
Ma mme asua
27 “Ado ami ntañ ami inọ ndufo e-ekpañña utọñ ennọ miin: ima mme asua ndufo, inam nti ñkpọ inọ mbon i-isuaaha ndufo, 28idiọñ mbon i-isueeñe ndufo, ibọñ akam inọ mme awo i-inamma ndufo idiọọk. 29Awo akpiisiaak ndufo ufia ke mfʌk keed, ikanna edem mfʌk uko inọ anye. Awo akpiiwappa ewʌra ndufo ibọ, iyak anye adat afọñidem ndufo ñko. 30Awo akpiibeeñe ñkpọ inọ anye, ndin awo akpeben ñkpọ ndufo ikiiyem aba. 31Inam inọ mbon mfen se ndufo ekpema ammọ enam inọ ndufo.
32 “Adieke ndufo emaha mbon i-imaaha ndufo, nso-o ido udod ndufo? Akab ado ndiọi awo esʌkema mbon e-emaaha ammọ. 33Ñko ndufo ekpenam nti ñkpọ enọ mbon awo e-efọnnọ ido ye ndufo, nso-o ido udod ndufo, sia mme ndiọi awo enam ukem ado. 34Ñko ndufo ekpewuọd mme awo e-ediikan imaana ikpọñ ñkpọ ado inọ ndufo, nso-o ido udod ndufo? Mme ndiọi awo ewuọd akpo ammọ ke idodanyen ke eyaekpọñ inọ mmimọ ayọhọ-ayọhọ. 35Ado ima mme asua ndufo, inyʌñ isio ammọ usieene eti, iwuọd ammọ ñkpọ, ikiinyʌñ inie idodanyen aditịmme mbọ. Ndin utịb ndufo ayaakpon, ndufo eyaedoñño nditọ Andikoñ Ñkan, sia anye afọn ido ye mme anana esịd ekọọm ye mbon ndoom. 36Itua awo mbọm, kpa nte Ete ndufo atuaaha mbọm.
Ubiireikpe nnọ awo
37 “Ikiibiire ikpe inọ awo, mbaak awo idibiire ikpe inọ ndufo. Ikiisuuk awo uyo, mbaak awo idinyʌñ isuuk ndufo uyo. Ifeen inọ awo, ma awo afeen inọ. 38Inọ ke eyainọ ndufo. Eti udomo, efiik enyeghe anekke ayọhọ aduọiyọ, adido udeme ndufo. Sia ukem udomo ñkpọ a-ndufo ekamake edomo, ke ediinyʌñ ikama idomo inọ.”
39Anye amaanyʌñ atop ñke ami anọ ammọ: “Nte nnan akeme adidat nnan usʌñ? Nte ammọ mba idiiduọññọke idọñọ ube? 40Ayịn ufọkñwed ikponno ikan andikpeeb amọ, ado anye a-abọọhọ eti ukpeeb ayaatie nte andikpeeb amọ.
41 “Ntak a-ndufo ekịtte etək mbio ke anyen nditọeka ndufo, ado ikịtte adukpọk a-abaaha ke anyen ndufo-o? 42Esaña die ebo nditọeka ndufo, ‘Yịneka, yak usio etək mbio ke anyen,’ ado ukereke ubaña eka adukpọk ke anyen mfo? Ndufo mbon ndubịk, isio eka adukpọk ke anyen ndufo nọ etịm emọọnọ etək mbio a-asịneke ke anyen nditọeka ndufo.
Eto ye mfịd amọ
43 “Ibaaha eti eto a-anwịmme idiọọk mfịd, inyʌññọ iba idiọọk eto a-anwịmme eti mfịd. 44Ediọọñọ eto ekeene mfịd a-anye anwịmme. Sia awo isikịppeke fik ito eto ñkukịm, awo inyʌññọ ikịppe sokoro ito eto udañaya. 45Eti awo asiooño nti ñkpọ a-adọñọke anye ke esịd, ukem ado idiọọk awo asiooño ndiọiñkpọ a-adọñọke anye ke esịd. Sia inua asio se ifịghe awo ke esịd atañ.
Mme afiọkñkpọ ye mme ndisịme abọbufọk
46 “Ntak a-ndufo eñkoodo miin, ‘Abọọñ, Abọọñ,’ ado inamma se ami ibo-o? 47Nyaaben iwọt ndufo nte udomo ñkpọ naña awo a-adiighe ambịne miin, akop ikọ mmi anyʌñ aben asịn ke adinam aba. 48Ammọ eba nte abọbufọk a-amaakedọk isọñ atəñọ ndin asịn itiad idakisọñ. Atọ amaadi, mmọọñ anyʌñ aditọ ufọk ado ikiwuudo ufọk ado, sia emaenekke ebọp anye. 49Ado awo a-akoppo ikọ mmi ndin ibenne isịn ke adinam atie nte awo a-akebọppọ ufọk ado isịnne itiad idakisọñ. Ke ini atọ amaakedi aditọ ufọk ado, anye amaaduọ afịd-afịd.”
Currently Selected:
Duk 6: NAAM
Highlight
Share
Copy
Want to have your highlights saved across all your devices? Sign up or sign in
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
