Duk 4
4
Setan adidomo Yisọs ke akpautatan
1Ndin Yisọs ke uyọhọ Adisana Sịbidịd amaakpọñ Yọdan, Sịbidịd amaanyʌñ adat anye usʌñ aka ke akpautatan. 2Do, ke afịd usen aba setan amaadomo anye. Ke afịd mme usen ado anye ikidiaagha ñkpọ, ke akpatre, abiọñ amaanekke adọñ anye.
3Setan amaabo anye ate, “Adieke afo adooho Ayịn Abasi, bo itiad ami ekappa ado uyo.”
4Yisọs amaabọọrọ, “Emaewet ete, ‘Idiidooho uyo ikpọọñ ke awo adidat idu uwem.’ ”
5Setan ndin amaaben anye aka anyọñ ekamba abod akewọt anye mme abio ubọọñ ke etək-etək ini. 6Setan amaabo Yisọs, “Nyaayaak afịd ubọọñ ekondo ami ye afịd inie ke esịd unọ fiin, sia emaeyaak afịd ennọ miin; ami mmenyʌñ nnie unen adiyaak anye nnọ ake ami mma adinọ. 7Afo ndin ukputuak iwuod uñkpono miin, nyaayaak afịd ami unọ fiin.”
8Yisọs amaabọọrọ anye ate, “Emaewet ete, ‘Kpono Abọọñ Abasi mfo nyʌñ nam ñkpọ nọ anye ikpọọñ.’ ”
9Ndin setan amaaben anye aka Yerusedem, anyʌñ akenam anye ada ke itie se ikoñ ikan ke tembịd, ate anye, “Adieke Afo adooho Ayịn Abasi, tamma keduọ ke isọñ. 10Sia emaewet ete:
“ ‘Anye ayaanọ mme enyere amọ uyo
nọ ukpeme fiin dek-dek;
11ammọ eyaukama fiin ke ubọk ammọ,
mbaak afo udutuak ukod mfo ke itiad.’ ”
12Ndin Yisọs abọọrọ anye ate, “Emaewet ete: Kuudomo Abọọñ Abasi mfo idomo.”
13Ke setan amaakekweeñe mme idomo ami, anye amaadakka akpọñ anye akebet tutu ufañ mfen.
Esịn Yisọs ke Nasared
14Yisọs amaatịmme anyọñ Kadidi, ye ayọhọ adudu Adisana Sịbidịd, ndin etob amọ amaasuana ayọhọ afịd ñkanñkʌk ado. 15Anye amaakpeeb ñkpọ ke mme sinakọk ammọ, ndin afịd awo emaetooro anye.
16Akekem anye amaadika ke Nasared, abio a-anye aketooho, ndin naña ido amọ akesido, anye amaadika sinakọk ke usen Sabad. Anye akeanyʌñ adakka ada adikood ñwed Abasi, 17emaenọ anye ñwed brọfed Aisaya. Ke anye amaakeatat ikpañwed ami, anye akịt itie ewette ete:
18 “Sịbidịd Abọọñ andoro miin ke idem,
sia anye amaañyet miin adan anịm,
adikwọrọ eti mbʌk nnọ mme uwueene.
Anye amaandọñ miin adikwọrọ uwuọufʌn nnọ mbon ñkpọkọb,
ye aditịmme ñkịdusʌñ nnọ mme nnan
ye ñkpọkñyak nnọ mbon a-mme awo efiighe,
19 ñnyʌñ ñkwọrọ isua mfọnido Abọọñ.”
20Ndin anye amaafʌt ikpañwed ado, ayaak anọ akamautom, anyʌñ asuuk atie. Afịd awo ke sinakọk ekewuuk anyen ese anye. 21Ndin anye amaatọọno ke adibo ammọ ate, “Ikọ Ñwed Abasi ami asu mfịn ami, nte ndufo ekoppo ke utọñ ndufo.”
22Afịd atu awo emaetañ nti ikọ ebaña anye, idem amaanyʌñ akpa ammọ eti-eti, ke utọ nti ikọ a-akewuọọhọ ke inua amọ. Anam ammọ emaebịp ebo, “Idooho ayịn Yosef ido ami?”
23Yisọs abo ammọ ate, “Ke akpanikọ ndufo idiitreke aditop ufiid ami imbaña miin ite: ‘Abiaibọk, kọk idem mfo!’ Ndufo eyaenyʌñ embo miin, ‘Nam mi ke idʌñ ndufo se ikop naña akenam ke Kapanọm.’ ”
24Anye adian abo ate, “Ntañ akpanikọ inọ ndufo, brọfed isinieeghe ukpono ke abio emana amọ. 25Ado akpanikọ ke umiañ mme ebekpa emaeba ke Isred ke ayo Edaiya, idaha a-Abasi akesiide ikpaanyọñ ke afịd isua ita ye afiọñ itiokeed, ndin akpọsọñ akañ akeba ke iso isọñ. 26Ado Abasi ikidọññọ Edaiya abịne ammọ ndomokeed ibọhọke ebekpa keed a-akebaaha ke Sarefad ke utịd abio Sidọn. 27Ñkpọ mfen ado, umiañ mme adọñọ akpamfia mmọ ekeba ke Isred ke ini Brọfed Edisa, ado ndomokeed ikibọọhọ ukọk ibọhọke Neman awo Siria.”
28Afịd mbon se ikiba ke sinakọk ikop ikọ ami, emaebịmme iyadesịd. 29Ammọ ebịmme esịd keed emʌm anye esio ke abio, eben anye eka anyọñ abod i-idʌñ ammọ akedoroke nọ ato do ekenək anye eduọọk. 30Ado Yisọs amaasaña ke ufọọd ammọ aboiyo aka ndubeghe amọ.
Yisọs abịn ndedeghe sịbidịd asio
31Anye amaadika Kapanọm, ke abio Kadidi, ndin ke usen Sabad anye atọọñọ adikpeeb mme awo ñkpọ. 32Ukpeebñkpọ amọ amaakpa mme awo idem, sia ikọ amọ akesaña ye adudu.
33Awodeen keed a-dimọn, idiọọk sịbidịd, akeafịnake amaaba ke sinakọk. Anye amaabọọñ ke akpọsọñ uyo ate, 34“Nyọñ mi! Nso-o ke afo ayem ito ñnyịn, Yisọs Ayịn Nasared? Afo adi adisobo ñnyịn? Mmediọọñọ se afo ado: Adisana Ayịn Abasi!”
35Ndin Yisọs amaawuuk anye ate, “Dop uyo! Wuọ anye ke idem!” Ndin dimọn ami amaanək anye atọ ke isọñ ke iso afịd awo, awuọ akpọñ anye, ado inọọhọ anye unan ndomokeed.
36Idem amaakpa afịd awo, ndin ammọ emaeneme ke atu idem ammọ ete, “Nso-o isịne ke mme ikọ awo ami! Sia ke adudu ye uko anye anọ mme ndiọi sịbidịd ewʌghọ ate ewuọọñọ, ndin ammọ ewuọọñọ!” 37Do ndin etob amọ amaasuana ke afịd ñkanñkʌk ado.
Yisọs akọk uwak awo udọñọ
38Akekem Yisọs amaakpọñ sinakọk aka ufọk Saimọn. Eka anwaan Saimọn akenie akpọsọñ ufiobidem, ndin ammọ emaebeeñe Yisọs ebo anwam anye. 39Anye amaasịkke akpere mma ado, asua anọ ufiobidem, ndin udọñọ ado akweeñe anye. Idaha-idaha ado anye amaadaka ada akenam ndidia anọ ammọ.
40Ke utekke ndubi mme awo emaekoono mbon e-ekedọñọke nsio-nsio udọñọ ebịne anye, anye amaadot ammọ keed-e-keed ubọk, akọk ammọ udọñọ. 41Mme dimọn emaenyʌñ ewuọọñọ uwak awo ke idem, ebọñọ ñkpo ete, “Afo ado Ayịn Abasi!” Ado anye amaakpan ammọ inyʌññọ iyak ammọ etañ ikọ, sia ammọ emaediọọñọ ke anye ado Mesaya.
42Ayo akesieere, Yisọs amaakpọñ ndo aka ndobo-ndobo itie. Mme awo emaedʌk eyem anye ndin emaekekịt nte anye atie, emaenwana adinam ke anye akpọñ ammọ. 43Ado anye amaabo ammọ, “Ana ami ñkwọrọ eti mbʌk abio ubọọñ Abasi nnọ mme idịd mfen ñko, sia ke ntak ado ke ekennọ miin ndi.” 44Ndin anye amaaka iso akwọrọ ikọ ke mme sinakọk ke Yudia.
Currently Selected:
Duk 4: NAAM
Highlight
Share
Copy
Want to have your highlights saved across all your devices? Sign up or sign in
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
