Duk 3
3
Yọọn Aduọkmmọọñ adiọñ usʌñ
1Ke ayọhọ isua efịd ke ini ukara akwa Adidem Tiberọs Sisa, Bọntiọs Baided akekara ikpeghe Yudia, Herọd akeda iwuod ikpeghe Kadidi, ke ini Fidib, ayịneka Herọd akedaaha ke iwuod ukara Ituria ye Trakonitis ndin Disanias akeda iwuod ke ikpeghe Abidene, 2ñko Anas ye Kaifas ekedoñño mme akwa aku; uyo Abasi amaadisịm Yọọn ayịn Sakaraya ke akpautatan. 3Anye amasaaña ke afịd ñkanñkʌk Yọdan, akwọrọ uduọkmmọọñ ake adikappa esịd, adifeen ke mme idiọọkñkpọ, 4nte ewette ke ñwed Brọfed Aisaya:
“Uyo awo a-abọọñọ ke akpautatan abo,
‘Idiọñ usʌñ inọ Abọọñ,
ineeñe usʌñ inọ anye.
5Afịd itịkke isọñ eyaedọñ ayọhọ,
eyaewen afịd ikpọ abod ye ntək abod.
Mme usʌñ a-akwañake eyaenekke,
mme usʌñ a-adooho ñkrọk-ñkrọk eyaedọnọ.
6Afịd uduudawo eyaekịt adinyaaña Abasi.’ ”
7Yọọn amaabo atu awo e-ekewuọọñọke edi nọ anye iduọk mmimọ mmọọñ, ate, “Ndufo nditọ udʌkikọd! Anie itemme ndufo ibo yak efeeñe iyadesịd Abasi a-aboohoidi? 8Iwọt idiọọñọ a-asañake ye ñkpefiọk ndufo. Ndufo ikiibo idem ndufo ite, ‘Ñnyịn iminie Ebraham nte ete ñnyịn.’ Ami ibo ndufo nte ke Abasi akeme adinam mme itiad ami ekaama nditọ enọ Ebraham. 9Ekọkọñ ekịd ke mme itak eto, ndin eto ake adodo a-ammiinwịmme eti mfịd, eyaekpịkke esio enyʌñ etop esịn ke ikañ.”
10Atu awo emaebịp anye, “Nso-o ndin ke ñnyịn idiinam?”
11Yọọn amaabọọrọ ate, “Awo a-anieeghe afọñ iba yak ayaak keed anọ awo a-ammiinieeghe, awo a-anieeghe ndidia yak awana adia ye ada a-mmiinieeghe.”
12Mme abọ taksi emaenyʌñ edibọ uduọkmmọọñ. Ammọ emaebịp anye ete, “Andikpeeb, nso-o ke ñnyịn idiinam?”
13Anye amaabọọrọ ammọ ate, “Ikiibọ ikan se ebo yak ebọ.”
14Mme anwana ekọñ ñko emaenyʌñ ebịp, “Nso-o ke ñnyịn idiinam?”
Anye amaabọọrọ ammọ ate, “Ikiidịkke awo uwem. Ikiidot awo uyo, Ikiibọ awo ñkpọ ke ñkanubọk, iyʌkkọ ye se ikpe ndufo.”
15Sia mme awo ekedotto anyen ebaña Andinyaaña, ammọ emaekere ke esịd ammọ ebo ete me Yọọn akap ado Mesaya. 16Yọọn amaadọkkọ ammọ ate, “Ami ñkama mmọọñ inịm ndufo uduọkmmọọñ. Ado aba awo a-akponno añkan adidi, a-ami ndiidotto aditat udʌk ikpaukod amọ. Anye ayaiduọk ndufo mmọọñ ke Adisana Sịbidịd ye ikañ. 17Anye ayaakama abufịm afịm idem abakpa, akoono idem abakpa akebono ke ise ado anye ayaafọọmọ ñkpata ke ikañ i-idiiduakka inịme.” 18Ndin Yọọn amaadat mme nsio-nsio ikọitem akwọrọ eti etob anọ mme awo.
19Ado Yọọn amaakesua anọ Herọd andikara ke ntak Erọdias, anwaan ayịneka a-anye Herọd akedatta adọ, ye mme ndiọi-ndiọi ido mfen anye Herọd akenaññake, 20ke adidian ke afịd ndiọiñkpọ ami, Herọd amaamʌm Yọọn akesịn ke ufọk ñkpakọb.
Uduọkmmọọñ ye ntịppe emana Yisọs
21Ke ini Yọọn akeduọkkọ umiañ awo mmọọñ, Yisọs amaanyʌñ abọ uduọkmmọọñ ñko. Yisọs akebọ uduọkmmọọñ ama anye amaabọñ akam. Nte anye akebọññọ akam, ikpaanyọñ amaabeere, 22ndin Adisana Sịbidịd amaasọiyọ adoro anye ke idem nte ibiom. Uyo ñko ato ke anyọñ ate, “Afo ado Ayịn mmi, a-ami mmaaha, mmenekke ñkop inemesịd ye afo.”
23Yisọs akedo ñkpọ nte awo isua edịb ye duob ke ini anye aketọọñọke adikpeeb mme awo ñkpọ mbaña Abasi. Mbon awo ekekere ebo ke anye akedo ayịn Yosef:
Yosef a-akedooho ayịn Hedi, 24Hedi akedo ayịn Mattat,
a-akedooho ayịn Difai, a-akedooho ayịn Medki,
a-akedooho ayịn Yannai, a-akedooho ayịn Yosef,
25a-akedooho ayịn Matatias, a-akedooho ayịn Emọs,
a-akedooho ayịn Nahum, a-akedooho ayịn Esri,
a-akedooho ayịn Nakkai, 26a-akedooho ayịn Maat,
a-akedooho ayịn Mattatias, a-akedooho ayịn Semein,
a-akedooho ayịn Yosek, a-akedooho ayịn Yoda,
27a-akedooho ayịn Yoanan, a-akedooho ayịn Resa,
a-akedooho ayịn Serubabed, a-akedooho ayịn Sietied,
a-akedooho ayịn Neri, 28a-akedooho ayịn Medki,
a-akedooho ayịn Addi, a-akedooho ayịn Kọsam,
a-akedooho ayịn Edmadam, a-akedooho ayịn Er,
29a-akedooho ayịn Yosua, a-akedooho ayịn Ediesa,
a-akedooho ayịn Yorim,
a-akedooho ayịn Mattat, a-akedooho ayịn Difai, 30a-akedooho ayịn Simiọn,
a-akedooho ayịn Yuda, a-akedooho ayịn Yosef,
a-akedooho ayịn Yonam, a-akedooho ayịn Ediakim,
31a-akedooho ayịn Medea, a-akedooho ayịn Menna,
a-akedooho ayịn Matata, a-akedooho ayịn Natan,
a-akedooho ayịn Defid, 32a-akedooho ayịn Yesi,
a-akedooho ayịn Obed, a-akedooho ayịn Boasi,
Boasi akedo ayịn Saamọn, a-akedooho ayịn Nasọn,
33Nasọn akedo ayịn Aminadab, a-akedooho ayịn Ram,
Ram akedo ayịn Esrọn, a-akedooho ayịn Peres,
Beres akedo ayịn Yuda, 34Yuda akedo ayịn Yekọb a-akedooho ayịn Aisik,
Aisik akedo ayịn Ebraham a-akedooho ayịn Terah,
Terah akedo ayịn Nahọ,
35Nahọ akedo ayịn Seruk a-akedooho ayịn Reu,
Reu akedo ayịn Pedek a-akedooho ayịn Eber,
Eber akedo ayịn Seda, 36Seda akedo ayịn Kainan,
Kainan akedo ayịn Afasad a-akedooho ayịn Sem. Sem akedo ayịn Nua,
Nua akedo ayịn Damek a-akedooho ayịn Metuseda,
37Metuseda akedo ayịn Inọk,
Inọk akedo ayịn Yared a-akedooho ayịn Mahadaded,
a-akedooho ayịn Kenan. 38Kenan akedo ayịn Enọsi,
a-akedooho ayịn Sed, a-akedooho ayịn Adam,
Adam akedo ayịn Abasi.
Currently Selected:
Duk 3: NAAM
Highlight
Share
Copy
Want to have your highlights saved across all your devices? Sign up or sign in
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
