Duk 10
10
Yisọs adọñ mbed ata ye duob ye iba utom
1Ke mme ñkpọ ami amaakebọiyọ, Abọọñ Yisọs amaasio awo ata ye duob ye iba mfen, ate esaña iba-iba, ebem imọ iso eka ke mme abio ye mme itie imọ ke idem imọ iduakka adika. 2Anye ndin amaabo ammọ ate, “Idọk akpon, ado mme anam utom iwakka. Ke ntodo, ibeeñe abọọñ idọk, ibo anye anọ mme anam utom eka ke inwañ utom amọ. 3Idahami, ndufo ikaa! Ado itoiyo ke ami isio ndufo ndọñ nte mme edọñ ke atu mme ekpeikọd. 4Ikiikama akʌk me ekpad ndidia, me ikpaukod; ikiinyʌñ ikọọm mme awo ke usʌñ.
5 “Ke ufọk ake adodo a-ndufo edʌkkọ, yak akpa ikọ ndufo ado, ‘Yak emem aba ke ufọk ami!’ 6Ndin akpedo ayịn emem aba do, emem ndufo ayaaba ye ammọ; akpedo ayịn emem ibaaha do, emem ado ayaatịmme ikeene ndufo. 7Inyʌñ iba do ke ufọk ado, idia inyʌñ inwọñ ñkpọ se ammọ inọ, sia anam utom adot adibọ akʌkutom. Ikiinyʌñ isaaña kwa ufọk awo.
8 “Ndin ke abio keed ake adodo a-ndufo edʌkkọ, ammọ ekpinyịmme ndufo, ibọ se inọ idia. 9Ñko ikọk mbon udọñọ e-ebaaha do, inyʌñ ikwọrọ inọ ammọ ibo, ‘Abio Ubọọñ Abasi akpere ndufo idem.’ 10Ndufo emaedʌk abio ndin ammọ inyịmmeke ndufo, ikpọñ do idʌk ke mme efaak abio ado, isian ammọ ite, 11‘Ñnyịn imikeñ kpa ntan abio ndufo a-ayịreke ke ikpad ñnyịn ma ado nte ubiomikpe inọ ndufo: Ndin itʌm idiọọñọ ibo ke abio ubọọñ Abasi akpere ndufo.’ 12Ami idọkkọ ndufo, ayaafọn ye Sọdọm ke akpatre usen ubiire ikpe akan utọ abio ado.
13 “Ifọnnọ unọ fiin, Korasin! Ifọnnọ unọ fiin, Bedsaida! Sia ekpekenaññake utọ ikpọ utom adudu e-enaññake ke atu ndufo ke Taya ye Sidọn, ammọ ekpaekekappa esịd to ike, esịne afọñ ikpo, etie ke ntọñmfʌhọ. 14Ñkpọ ayaafọn ye Taya ye Sidọn ke usen ubiire ikpe ikan ndufo. 15Amaado afo Kapanọm, ado nte afo ayem udịppe fiin ekedot ke ataa ikpaanyọñ? Iyo, eyausuuhọ fiin enịm ke Abioekpo.
16 “Awo ake adodo a-akoppo uyo ndufo, akop uyo mmi; awo ake adodo i-isịnne ndufo, ansịn miin; ndin awo a-ansịnne miin, asịn anye a-akendọññọ miin.”
17Mbed ata ye duob ye iba emaenyọñ edi ye idaara, ete, “Abọọñ, ke anyịñ mfo, kpa ndiọi sịbidịd emaesuuk iwuod inọ ñnyịn.”
18Anye ate ammọ, “Mmaakịt Setan naña ato ke ikpaanyọñ adiduọ nte akepkep. 19Ami mminọ ndufo adudu adifiik udʌkikọd ye ikpeyen ke ñkpad, ñnyʌñ inọ ndufo adudu adikan afịd adudu mme asua; ñkpọ ndomokeed idiikommo ndufo ke usʌñ ake adodo. 20Ado ikiidaara sia mme sịbidịd esuuk iwuod inọ ndufo, ikap idaara sia ewet anyịñ ndufo ke abio ubọọñ Abasi.”
21Ke ukem ini ado, Yisọs ye ayọhọ idaara a-atooho Adisana Sịbidịd amaabo, “O Ete mmi, Abọọñ anyọñ ye isọñ, mmukọọm fiin naña afo adịp mbon aniọñ ye mme adiọọñọ ñkpọ mme ñkpọ ami, ado ayaara anọ ntəkayịn. Ih, Ete, sia ami ado se unem fiin esịd.
22 “Ete mmi amaayaak afịd ñkpọ ansịn ke ubọk. Awo ndomokeed idiọọñọke ake awo Ayịn ado, ibọhọke Ete ikpọọñ, awo ñko idiọọñọke se Ete ado, ibọhọke Ayịn ye mbon a-Ayịn amekke adiyaara anye nnọ.”
23Yisọs ndin awọññọ iso aneme ndịbe-ndịbe ye mbed amọ ate, “Afọfọn anọ mme anyen e-ekịtte se ndufo ekịt. 24Ndin ami ntañ inọ ndufo nte ke umiañ mme brọfed ye mbọọñ emaeyem adikịt mme ñkpọ se ndufo ekịt, ado ammọ ikikịtte, ye adikop mme ñkpọ se ndufo ekop, ado ikikoppo.”
Ñke eti awo Sameria
25Awo akpeeb ibed keed amaadakka ada adidomo Yisọs idomo, usen keed. Anye amaabịp Yisọs ate, “Andikpeeb, nso-o ke ami nnie adinam nọ nnie nsi-nsi uwem?”
26Yisọs amaabịp anye, “Nso-o ke Ibed atañ? Afo akood anye die?”
27Anye abọọrọ ate, “ ‘Ma Abọọñ Abasi mfo ke afịd esịd mfo ye ke afịd ukpọñ mfo ye ke afịd adudu ye akikere mfo’; nyʌñ, ‘Ma mbọhọidʌñ mfo naña afo ama idem mfo.’ ”
28Yisọs amaabo anye ate, “Amebọọrọ afọn. Nam ntodo ndin ayaadu uwem.”
29Ado anye adiyem adiwọt naña imọ inekke ifọn, abo Yisọs, “Anie ado mbọhọidʌñ mmi?”
30Yisọs ndin amaatop ñke ami anọ anye: “Ete keed aketo abio Yerusedem ayem adika Yeriko, ado ke usʌñ, mbon amauke emaemʌm anye etịm, ewak anye afọñ, enọññọ anye unan, ndin ekekịt ke anye akpere ñkpa, edakka ekpọñ anye. 31Aku keed amaadisaña usʌñ ado aboiyo, ado anye akekịt awo ñkpọnnam ado, abọọk idem ke mben usʌñ uko, afrọ. 32Ukem-ukem ado ñko, awo keed a-aketooho ubon Difai, adiboiyo, akọkkọ anyen ase anye, anyʌñ asaña afrọ ke mbeñ ikọd uko. 33Awo Sameria, a-akekaaha isañ ke usʌñ ado, adikịt anye, ndin udʌk amọ amʌm anye. 34Anye akeyet anye mme unan ado, anye amaatọkkọ adan ye mmịn adọñ ke mme anyen unan, abọp mme anyen unan ado, aben anye adot ke enañ amọ aka akenịm ke itie usọbọ anyʌñ atie ase anye anyen. 35Edem usen, anye akebiinyọñ, asio akʌk anọ anie itie usọbọ ate, ‘Kaa iso se anye anyen, ke mmaanyọñ ndi, ñyaadikpe se adodo afo adibiad.’
36 “Ke atu awo ita ami, anie ke akikere mfo akeado mbọhọidʌñ inọ awo a-mbon amauke eketịmme mi?”
37Ata akpeeb ibed ami abọọrọ ate, “Awo a-akeanieehe mbọm anọ anye.”
Yisọs ate anye, “Afo nyọñ nyʌñ kenam ntodo.”
Ke ufọk Mmeri ye Mmata
38Naña Yisọs ye mme ibed amọ ekeesʌkkọ esaña ke usʌñ, anye amaadiwuọ idʌñ a-awonwaan keed a-akekereke Mmata akebeereke usʌñ ufọk amọ anọ anye. 39Anye amaanie ayịneka awonwaan a-akerekereke Mmeri, a-akeketieehe adiana Abọọñ akop ukpeebñkpọ amọ. 40Esịd ikinemme Mmata akeene umiañ ñkpọ se Mmeri akeyaak anọ anye ikpọọñ anam. Ami asịn anye amaadi adibo Yisọs ate, “Abọọñ, ukereke ke akpaafọn ayịneka mmi Mmeri adidiñkeene nnam ñkpọ? Bo anye yak adisịn unwam annọ!”
41Abọọñ Yisọs amaabọọrọ anye ate, “Mmata, Mmata, afo amefịna idem anyʌñ adutịme esịd mfo abaña umiañ ñkpọ, 42ado ñkpọ keed ke awo akpenekke ayem. Mmeri amek anye a-afọnnọ akan, a-adooho awo ndomokeed idiibọọhọ anye.”
Currently Selected:
Duk 10: NAAM
Highlight
Share
Copy
Want to have your highlights saved across all your devices? Sign up or sign in
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
