Duk 11
11
Yisọs akpeeb abaña ubọñ akam
1Usen keed Yisọs akebọñ akam ke itie keed. Anye akebọñ ama, mbed amọ keed abo anye ate, “Abọọñ, ikpeeb ñnyịn naña ebọñ akam, kpa naña Yọọn akekpeeb mme mbed amọ.”
2Anye amaabo ammọ, “Imaibọñ akam, ibo:
“ ‘Ete,
ukpono anie anyịñ mfo,
yak abio ubọọñ mfo adi.
3 Inọ ñnyịn se idia ke usen ke usen.
4 Feen inọ ñnyịn ke mme ndiọiñkpọ ñnyịn,
kpa naña ifeen inọ mbon e-edueeghe ñnyịn.
Kuuyak ñnyịn idʌk ke idomo.’ ”
5Akema Yisọs amaabo ammọ, “Akpedo anam awo ndufo keed anie ufan, akem ufan ado adidi ke ufọọd akoneyo ate, ‘Ufan, ñwọọd ebəgho uyo ita, 6ke nnie ufan a-atooho anyanusʌñ isañ adi, ndin nnieehe ñkpọ se nnọ anye.’ 7Akpenam ufan amọ asịne ke esịd ufọk abọọrọ, ‘Kuumfịna miin. Ñnyịn imaikọkọp usʌñ; ñko ami ye nditọ mmi imidọdʌk idab. Mbooho ñkan ndakka nda ndunọ ñkpọ ndomokeed idahami.’ 8Idọkkọ ndufo ke akpesʌk ado anye mmiidiidakkake ida ke ntak a-anye adooho ufan amọ, ado ke ntak ufan amọ asʌkkọ asọñ ayịre anye, anye ayaadakka ada akenọ anye se anye ayeyem.
9 “Ke ntak ado, ami ibo ndufo: ibeeñe ke eyainọ; iyem ke eyaekịt; ikọñ ke eyaebeere usʌñ inọ. 10Sia afịd awo se ibeeñe ebọ; awo a-ayemme akịt; anye a-akọññọ usʌñ eyaebeere usʌñ enọ.
11 “Anie ke atu ndufo e-edoññoke mme ete, ke ayịn ndufo akpibeeñe iyak anye aben udʌkikọd anọ? 12Me akpebeeñe ñkwaunen anye aben ikpeyen anọ? 13Adieke ndufo e-edoññoke mme ndiọi awo ediọọñọke adinọ nditọ ndufo nti enọ, nwaanwa di se Ete ndufo ndin a-abaaha ke anyọñ, anye ayaanọ Adisana Sịbidịd asọk mbon e-ebeeñeke.”
Yisọs ye Bedsibọb
14Yisọs akebịn dimọn imuum asio awo ke idem. Dimọn ado akewuọ, imuum ado atañ ikọ; idem akpa afịd atu awo. 15Ado ubaak awo emaebo, “Anye akama Bedsibọb, abọọñ ndiọi sịbidịd, abịn ndiọi sịbidịd asio?” 16Usʌk awo emaedomo anye idomo ke adiyem idiọọñọ a-atooho anyọñ.
17Yisọs amaadiọọñọ akikere ammọ, ndin abo ammọ ate, “Abio ndomokeed a-abakkake ada ke idem ammọ ikpọọñ inieeghe nsọọñọnda; ufọk u-ubakka abaaha ana aduọ. 18Setan akpenwana ekọñ ye idem amọ, abio ubọọñ amọ abiisaña die ida? Ntañ ami sia ndufo ebo ke ñkama Bedsibọb mbịn ndiọi sịbidịd nsio. 19Akpedo ndat Bedsibọb mbịn ndiọi sịbidịd nsio, nso-o adudu ke mme ibed ndufo ekama ebịn esio? Ke ntak ami, ammọ eyaedo mme abiireikpe ndufo. 20Ado akpedo ndat adudu ake ubọk Abasi mbịn ndiọi sịbidịd nsio, abio ubọọñ Abasi isịm ndufo.
21 “Akpọsọñ awo a-amaakama ñkpọ uko ekọñ amọ ikpeme ufọk amọ, inie amọ ana ke emem. 22Ado awo a-asọññọ adudu akan anye akpediñwana ye anye, akan anye ubọk, abọi anye mme ñkpọ uko ekọñ a-anye akedotto anyen, anyʌñ abakka ñkpoduoho se anye ama adat.
23 “Awo a-mmiidaaha ye ami, anwanwana ye ami, anye a-mmiinyʌññọ iñkeene miin itañ ibək, asuasuan.
Aditịmme ndi idiọọk sịbidịd
24 “Idiọọk sịbidịd amaauwọ ke idem awo, anye ayooñ ke nsaad itie, ayem itie nte abọ nduọkadudu. Ke ini anye mmiikịtte itie, anye ate, ‘Ñyaatịmme ñnyọñ akpa itie añkebaaha.’ 25Ndin anye amaato idi, adikịt naña emaekekwọọk itie ado asana, etuum ñkpọ ebono. 26Anye aka akekoono mme ndiọi sịbidịd itiaba mfen se idiọdiọi ikan anye, ndin ammọ eka ekedʌñọ do. Utịd awo ado akappa adiọọk akan ake akpa.”
27Ke ini Yisọs asʌkkọ atañ mme ikọ ami, awonwaan ke atu ado amaabo ke akpọsọñ uyo, “Afọfọn anọ eka a-akumanna anyʌñ ubọọk fiin.”
28Anye amaabọọrọ, “Afọfọn akap anọ mbon ekoppo ikọ Abasi enyʌñ enam se ekop.”
Idiọọñọ Yọna
29Ke mme atu awo emaekenekke ewak, Yisọs ate, “Emana ami ado ndoom emana. Anye ayem utịbe idiọọñọ, ado idiikịtte idiọọñọ mfen ikan anye e-ekenọọhọ Yọna. 30Sia kpa naña Yọna akedo idiọọñọ anọ mbon Ninife, kpa ntodo ke Ayịn Awo adido inọ emana ami. 31Abọọñanwan Usuuk ñko ayaadakka ada anyʌñ abiom emana ami ikpe, sia anye amaato ke ata utịd ederimbod adi adikop aniọñ Sọdọmọn; idahami, se ikpon ikan Sọdọmọn mmọ mi. 32Mbon Ninife eyaetie ke ikpe ebaña mbon emana ami enyʌñ ebiom ammọ ikpe; sia ammọ emaekappa esịd ato ke ukwọrọ ikọ Yọna; idahami, se ikpon ikan Yọna mmọ mi.
Unwana ikañ idem awo
33 “Awo ndomokeed isidomoke utuenikañ inịm ke ndịbe itie, me iben isịn ke abañ ikʌp. Ado edomo utuenikañ edot ke ñkpọ udodikañ, nọ mbon se idʌk idi emọọnọ unwana ado. 34Anyen mfo ado utuenikañ idem mfo. Anyen mfo amaafọn, afịd idem mfo ayọhọ ye unwana. Ado anyen mfo miifọnnọ, afịd idem mfo anyʌñ ayọhọ ye akịm 35Kpeme, mbaak unwana a-abaaha ke idem mfo akuudo akịm. 36Ndin adieke afịd idem mfo ayọhọke ye unwana, inyʌññọ iba itie akịm abaaha, afịd itie ayaayamma kpa naña unwana ikañ ayamma atọ awo.”
Isuuñọ anieeghe mme Farisi ye mme ata akpeeb ibed
37Yisọs aketañ ikọ ama, Farisi keed amaakood anye ufọk ate adidia ñkpọ ye imọ, ndin anye amaaka aketie abekke abere ke akpokoro ndidia. 38Farisi ado akekịt ke anye ikitooho iye ubọk mbemiso adia ñkpọ (naña ido mme Yuu asido) idem amaakpa anye.
39Ndin Abọọñ amaabo anye ate, “Ndufo mme Farisi esieeyet edem usan ye edem iko, ado esịd ndufo ayọhọ ye udʌditọñ ye ibak. 40Ndufo mme ndisịme! Idooho andikinam esịd anam kpa edem ñko? 41Ado amaado se isịne ndufo ke idem, ifọn ido ye mbon uwueene, ndin afịd ñkpọ ayaado adisana inọ ndufo.
42 “Ifọnnọ inọ ndufo mme Farisi, sia ndufo enọ Abasi ubaak keed ke itie duob ke sutọ-sutọ ñkpọ inwañ, ado ndufo efre unen ye ima Abasi. Ekpesʌk enọ-ọnọ Abasi ubaak keed ke itie duob enyʌñ edian unen ye ima.
43 “Ifọnnọ inọ ndufo mme Farisi, sia ndufo emaaha ikpọ itie ke sinakọk ye ekọọm ke mme anwa udua.
44 “Ifọnnọ inọ ndufo mme Farisi, sia ndufo etie nte udi a-awo mmiinịmme idiọọñọ, ndin mme awo esaña ke anyọñ ado eboiyo ke unana ifiọk.”
45Ataifiọk ibed keed amaabọọrọ Yisọs ate, “Andikpeeb, afo umautañ mme ñkpọ ami, afo amisọñ ñnyịn anyen ñko.”
46Yisọs amaabọọrọ anye ate, “Ifọnnọ inọ ndufo mme ntaifiọk ibed, sia ndufo efiighe mme awo ye mbiomo a-ammọ mmiikanna ibiom; ndin ndufo inwamma ammọ ke usʌñ ndomokeed.
47 “Ifọnnọ inọ ndufo, sia ndufo ekọọk udi enọ mme brọfed, ado mme eteete ndufo ekewood ammọ. 48Awuọ ndufo etie ntiense esọọñọ se mme ete ndufo ekenam; ammọ emaewot mme brọfed, ndin ndufo edikọọk udi enọ mme brọfed ado. 49Ke ntak ami, Abasi ke aniọñ amọ amaabo ate, ‘Ñyaanọ mme brọfed ye mme abọsịd esọk ammọ, ubaak mme brọfed ye mme abọsịd ammọ eyaewot, usʌk ammọ eyaetʌkkọ.’ 50Ke ntak ado, eyaebịp mbon emana ami ebaña iyiib afịd mme brọfed se ekewowot tọọñọ ke ntọọñọ ederimbod, 51tọọñọ ke iyiib Ebeed tutu awuọ ake Sekaraya, e-ekewotto ke ufọọd itie uwa ye esịd tembịd. Ih, ke akpanikọ, emana ami ayaabọọrọ mbiime abaña afịd mme ñkpọ ami.
52 “Ifọnnọ inọ ndufo mme ntaifiọk ibed, sia ndufo emeben ukpọhọde ifiọk. Ndufo idʌkkọ, enyʌñ eda ebiọñọ mbon mfen e-ekesʌkkọ edọñọ.”
53Yisọs akekpọñ itie ado, mme Farisi ye mme akpeeb ibed emaefaaña se anye aketañ enyʌñ eka iso etọ anye mme mbiime, 54ebet adimʌm anye ke se anye aditañ.
Currently Selected:
Duk 11: NAAM
Highlight
Share
Copy
Want to have your highlights saved across all your devices? Sign up or sign in
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
