Yọọn 13
13
Yisọs ayet mme mbed amọ ukod.
1Akedo ke idaha eyemme itọọñọ Usọrọ Basofa. Yisọs amaadiọọñọ ke ini akem anye adikpọñ uwem ami mbịne Ete amo. Sia anye amaakemama ikọd amọ e-ekebañnake ke ederimbod, anye amaama ammọ akewuọ akpatre.
2Ekesʌk edia ndidia ndubi, ndin Setan amaadọdʌk esịd Yudas Iskariọd, ayịn Saimọn aditap Yisọs. 3Yisọs amaadiọọñọ ke Ete amaayaak ukeed ñkpọ asịn ke adudu imọ, ñko ke imọ ikito Abasi idi, idiinyʌñ inyọñ ibịne Abasi; 4ndin anye amaadakka ada ke itie ndidia, asio anyọñ afọñidem, adat tọwịd akịne ke isịn. 5Akekweeñe ado, anye atọkkọ mmọọñ asịn ke besịn, atọọñọ adiyet mbed amọ ukod keed-e-keed; ndin akama tọwịd a-anye akekịneke ke isịn akwokko ammọ ukod.
6Akediwuọ itie Saimọn Bita, anye ado abịp anye, “Abọọñ, afo ayem inyet miin ukod?”
7Yisọs amaabọọrọ anye ate, “Se ami nnam idahami unwañake fiin; ado ke ini iso ayaunwaña.”
8Bita amaafaaña ate, “Iyo-o, ndiiyakka afo añyet miin ukod.”
Yisọs amaabọọrọ, “Ami mmuuyette fiin ukod awuọọñọ ke afo unieeghe ewana ndomokeed mme Ami.”
9Saimọn Bita amaabọọrọ Yisọs ate, “Sia adooho ntodo, Abọọñ, kuuñyet ukod kpọd ado ñyet ubọk mme iwuod kọrọ.”
10Yisọs amaabọọrọ anye ate, “Mbon e-emaakeyeyie idem inieeghe ntak adimaana nyie afịd idem, eyie ukod kpọd; afịd idem ammọ asasana. Ndin afo amesana, akpesʌk ado idooho afịd ndufo esana.” 11Sia anye amaadiọọñọ awo a-adiitap anye, ntak ado akenam anye abo ke idooho afịd ammọ esana.
12Ke anye amaakeyet ammọ ukod ama, anye amaaben afọñ amọ asịne atịmme aketie ke itie amọ. Ndin anye amaabịp ammọ ate, “Inwaña se nnam ado inọ-ọ ndufo? 13Ndufo eñkood miin ‘Andikpeeb’ ye ‘Abọọñ,’ emenen ñko sia se ami ndo ado ado. 14Idahado ami, ami Abọọñ ye Andikpeeb ndufo, mmaiyet ndufo ukod, ndufo ñko inyʌñ iduyette emọ-emọ ukod. 15Mminọ ndufo uwọd-ñkpọ nte enam ukem-ukem naña ami nnam inọọ ndufo. 16Ke ata akpanikọ ami ntañ inọ ndufo, ayịnufọk ndomokeed ikponno ikan eteufọk amọ, isʌñutom inyʌññọ ikpon ikan awo andikidọñ anye utom. 17Idaha emaediọọñọ mme ñkpọ ami, eyaidiọñ ndufo emaeben esịn ke adinam.
Yisọs atañ ke eyaetap anye
18 “Idooho afịd ndufo ke ntañ mbaña; mmediọọñọ mbon se ami mmek. Ado nọ ikọ Abasi e-ekewette asu, ‘anye a-awanake ubọk ndidia ye ami adisio ukod amọ antịgha miin.’
19 “Nnam ndufo ediọọñọ idahami, mbaak amaatịppe ndufo enịm ke akpanikọ ke ami ndo ndudu. 20Ke ata akpanikọ ami ntañ inọ ndufo, awo ake adodo a-anyịmmeke awo ami ndọññọ añnyịmme miin; awo ake adodo anyʌññọ añnyịmme miin, anyịmme anye a-akendọññọ miin.”
21Ke Yisọs amaaketañ ami ima, Sịbidịd amọ amaatịmede anye, anye ate, “Ke ata akpanikọ ami ntañ inọ ndufo, keed ke atu ndufo ayaantap miin.”
22Mme mbed eduseere emọ-emọ ke ñkpaidem, enyʌñ ekere me anie ke anye atañ abaña. 23Keed ke atu mme mbed a-Yisọs akemaaha aketie adiana anye. 24Ndin Saimọn Bita amaatappa mbed amọ keed abo anye ado ate, “Bịp anye me anie ke anye atañ abaña.”
25Anye ado akenyʌkkọ abere Yisọs, amaabịp anye ate, “Abọọñ, anie ke ado?”
26Yisọs amaabọọrọ, “Awo a-andiinọ uyo ami mmaadeeb ke usan.” Ndin anye akedeeb uyo ke usan amaayaak anọ Yudas Iskariọd, ayịn Saimọn. 27Ke ndo-ndo ado Yudas akebọ uyo, Setan adʌk anye esịd.
Yisọs amaabo Yudas ate, “Se afo ayem adinam, sọp idem nam.” 28Ado awo ndomokeed ke itie ndidia ado ikidiọọñọke ntak Yisọs aketañña ikọ ami ye anye. 29Sia Yudas akedooho akama akʌk ammọ, usʌk ammọ ekekere ke Yisọs akebo anye akedep ñkpọ se ediikama inam Usọrọ Basofa me adiyem ñkpọ nnọ mbon uweene. 30Yudas akesʌk abọbọ uyo ado, anye amaawuọ. Idahado akedo akoneyo.
Yisọs atañ abaña ekaña Bita
31Ke Yudas amaakewuọ, Yisọs amaabo ate, “Idahami ke Ayịn Awo abọ ubọọñ, Abasi ñko abọ ubọọñ ato anye. 32Adieke Abasi abọọhọ ubọọñ ato anye, Abasi ayaanọ Ayịn ubọọñ ke idem amọ, ndin ayaanọ anye ubọọñ ado ini keed.
33 “Nditọ mmi, ndiiba mme ndufo ke etək-etək ini. Ndufo eyaenyem miin, ado kpa daña ñkedọdọkkọ mme Yuu, mmidọkkọ ndufo ñko idahami: itie nte ami ñka ndufo idiikanna idi.
34 “Ufa ewʌhọ ke ami inọ ndufo: idumakka idem ndufo. Kpa naña ami ima ndufo, ana ndufo edumakka keed eken. 35Emaenam ntom, afịd awo eyaediọọñọ ke ndufo edoñño mme mbed mmi, emaedumakka idem ndufo.”
36Saimọn Bita amaabịp anye ate, “Abọọñ, uke ke adika?”
Yisọs amaabọọrọ, “Itie nte ami ñka, afo uduukanna uñkeene idahami, ado amaamaana ko ayaañkeene.”
37Bita amaabịp anye ate, “Abọọñ, ntaha mmeñkanna ukeene idahami-e? Mmebeeñe idem adikpa ke ntak mfo.”
38Yisọs amaabọọrọ anye, “Amenekke abeeñe idem adikpa ke ntak mmi? Ke ataa akpanikọ ami ntañ unọ fiin, mbemiso akikọ akpọk, afo ayaañkañ miin ukpa ita!
Currently Selected:
Yọọn 13: NAAM
Highlight
Share
Copy
Want to have your highlights saved across all your devices? Sign up or sign in
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
