Yọọn 12
12
Eyet Yisọs adan ke Betani
1Usen itiokeed akesʌghọ mbemiso ini Basofa, Yisọs amaaka Betani, itie a-Dasarọs, awo Yisọs akenamma aset ke ñkpa, akedʌññọ. 2Ke mmi ke ekenam usọrọ ndidia ndubi adikpono Yisọs. Mmata amaakeene adeeme ndidia ke ini Dasarọs aketieeghe ke akpokoro ye Yisọs. 3Ndin Mmeri amaaben ata nsọñudua adan keed aduọk Yisọs ke ukod anyʌñ aben ided amọ akwokko anye ukod. Ndin inem utebe nsọñudua adan ado amaayọhọ afịd ufọk.
4Ado keed ke atu mme mbed amọ, a-akekereke Yudas Iskariọd, anye a-akeditappa anye anyam ke akpatre, amaasua anọ ñkpọ ami, abo: 5“Ntak awo miikinyamma adan ami iben akʌk inọ mme uwueene-e? Adan ado amaayọhọ akʌkutom awo ke isuakeed,” 6anye ikitañña sia akemaaha mme uwueene, ado sia anye akedo inọ, nte akama ekpad akʌk, anye amaasisịññe akʌk anwam idem amọ ato se ekesisịn ke ekpad ado.
7Yisọs amaabọọrọ ate, “Kpọñ anye, akena nte anye anịm inem utebe adan ami anọ usen edimbuuk miin. 8Mbon uweene ediisʌk ibabañña ye ndufo, ado ami ndiibaaha ye ndufo afịd ini.”
9Anamma-anam mi uwak atu mme Yuu emaekop ke Yisọs mmọdo ke ndo, anam ammọ emaedi, idooho adikịt Yisọs ikpọọñ, ado adinyʌñ ñkịt Dasarọs a-Yisọs akenamma nọ aset ke ñkpa. 10Mme ikpọ aku emaenyʌñ enam akikere adiwot Dasarọs ñko, 11sia amaato ke ntak amọ uwak mme Yuu ekappa ebịne Yisọs enyʌñ enịm anye ke akpanikọ.
Yisọs adʌk Yerusedem nte adidem
12Edem usen uwak atu awo e-ekedieeghe usọrọ emaekop ke Yisọs adakka Yerusedem. 13Ammọ ekoono akpịn ayob ewuọ eka adisoobo ye anye enyʌñ ebọọñ ete,
“Osana!”
“Emaediọñ anye a-adieeghe ke anyịñ Abọọñ!”
“Emaediọñ adidem Isred!”
14Yisọs amaakịt abaak enañ anyʌñ adọọk atie ke anyọñ kpa naña nte emaekewet.
15“Kuunie ndịk, ayịn awonwaan Sayọn.
Sese, adidem mfo asʌk adi,
atie ke edem abaak enañ mbiomo.”
16Ñkpọ ami ikinwañake mme mbed amọ akpa ado. Ado ke emaekeben Yisọs edọọk ke ubọọñ ke akenwaña ammọ nte ke emaewet mme ñkpo ami ebaña anye, ñko ke enyʌñ enam afịd mme ñkpọ ami enọ anye.
17Atu awo e-ekebaaha ye anye ke ini anye akekoodo Dasarọs ke udi asio ke ñkpa emaeka iso esuan etop ami. 18Mme uwak awo emaeka ebịne anye ke ini emaekekop ke anye anam utịbe idiọọñọ ami. 19Anam mme Farisi ebo idem ammọ ete, “Sese, ñkpọ ami idatta ñnyịn ika itie ndomokeed. Se naña afịd ederimbod ewọññọ ebịne anye.”
Yisọs atañ abaña ñkpa amọ
20Amaaba mbon Krik ke atu mbon e-ekekaaha adikpono Abasi ke ini usọrọ ado. 21Ammọ emaedi ebịne Fidib a-aketooho Bedsaida ke Kadidi, enyʌñ enịm anye ebeeñe ke iso ete, “Ete, ñnyịn ikpaima edikịt Yisọs.” 22Fidib aketañ anọ Andru; Andru ye Fidib emaedakka eketañ enọ Yisọs.
23Yisọs abọọrọ ate, “Ini akem e-ebooho inọ Ayịn awo ubọọñ. 24Ke ata akpanikọ ami ntañ inọ ndufo, ibọhọke ñkpasi abakpa aduọ adʌk isọñ akpa, anye adisʌk ido ñkpasi keed. Ado anye akpekpa, ayaasakka uwak ñkpasi. 25Awo a-amaaha uwem amọ ayaaduọọk uwem, ado awo a-asuaagha uwem amọ ke ederimbod ami ayaanie nsi-nsi uwem. 26Awo ake adodo anamma ñkpọ annọ miin ana añkeene miin; ndin itie nte ami mba, mbed mmi ana eba ke ndo. Ete mmi ayaakpono awo a-anamma ñkpọ annọ.
27 “Idahami ukpọñ mmi atịmede, ndin nso-o ke ñkpetañ? Ete, mfak miin sio ke awa ami? Idooho, sia ado ke ntak ami ke ami ñkediwuọ awa ami. 28Ete, nọ anyịñ mfo ubọọñ.”
Ndin uyo amaato abio ubọọñ Abasi ate, “Mmenọ anye ubọọñ, ndiisʌk mmamaana nnọ anye ubọọñ.” 29Mme atu awo e-ekebaaha do ekop ñkpọ ami ekebo ke ado aduma; ubaak awo ete ke ado enyere aketañ ikọ ye anye.
30Yisọs ate, “Uyo ado akedo ke ufọn ndufo, ikidooho ke ufọn mmi. 31Ini ubiire ikpe nnọ ederimbod ami akem; idahami eyaebịn akpan abọọñ ederimbod ami esio. 32Ado ami, ke ini emaemben miin idọọk ke anyọñ, nyaakoono afịd awo ndat nnọ idem mmi.” 33Anye aketañ ami adiwọt utọ ñkpa a-anye adiikpa.
34Atu awo emaesio uyo ete, “Ñnyịn imikop ito Ibed ite ke Mesaya adiiba ke nsi-nsi, afo anam die abo, ‘Eyaeben Ayịn Awo edọọk ke anyọñ’? Anie ido ‘Ayịn Awo ami?’ ”
35Ndin Yisọs abo ammọ ate, “Ndufo eyaekaiso ekịt unwana ke etək-etək ini. Isaña idaha unwana abaaha do, mbemiso akịm ifʌk ndufo. Awo a-asañake ke akịm idiọọñọke nte anye aka. 36Buọd idem ke unwana ini akịtte unwana do, nọ ato do ndufo ekappa nditọ unwana.” Ke ini Yisọs amaaketañ ikọ ami ama, anye amaakpọñ itie ado anyʌñ asop ammọ ke anyen.
Adinịm ye unana adinịm ke akpanikọ ke atu mme Yuu
37Akpesʌk ado Yisọs amaakenam afịd utịbe ñkpọ mme idiọọñọ ami ke iso ammọ, ammọ ikisʌkkọ inịm anye ke akpanikọ. 38Ami akedo adinam ikọ a-Brọfed Aisaya aketañña asu:
“Abọọñ, Abọọñ, mme anie awo ekeenịm etob ñnyịn ke akpanikọ,
ñko, anie awo ke eyaara adudu Abasi ewọt?”
39Ke ntak ami ammọ ikikanna inịm ke akpanikọ sia nte Aisaya atañña ke itie mfen:
40“Anye akịm ammọ anyen, anyʌñ asọñ ammọ esịd,
anam ammọ ikanna ikịt ñkpọ ke anyen ammọ,
ñkpọ inyʌññọ ikan iñwaña ammọ ke esịd ammọ,
inyʌññọ ima ikappa esịd
nọ ñkpekọk ammọ udọñọ.”
41Aisaya aketañ ikọ ami sia anye amaakịt ubọọñ Yisọs anyʌñatañ ikọ abaña anye.
42Ado kpa ye ado uwak awo ke atu mme adaiwuod emaenịm anye ke akpanikọ. Ado ke ntak mme Farisi ammọ ikikanna itañ mbuọdidem ammọ anwa-anwa mbaak edisio ammọ ke sinakọk, 43sia ammọ ekemaaha itooro awo ekan itooro Abasi.
44Ndin Yisọs amaabọọñ akpọsọñ uyo ate, “Awo a-annịmme miin ke akpanikọ, innịmme miin ikpọọñ ke akpanikọ, ado anịm andikindọñ miin ñko ke akpanikọ. 45Awo ake anse miin, akịt andikindọñ miin. 46Ami ndi ke ederimbod ami nte unwana nọ ato do awo a-annịmme miin ke akpanikọ akuuba ke akịm aba.
47 “Ama ado awo a-akoppo ikọ mmi ado inamma, ami mbiireke ikpe nnọ anye. Sia ami ñkedieeghe adibiire ikpe nnọ ederimbod, ado ñkedi adinyaaña anye. 48Andikpe ikpe aba anọ awo a-ansịnne miin, a-mmiinyʌññọ inịm ikọ mmi ke akpanikọ; kpa mme ikọ ado a-ami ntañña adido ubiomo ikpe inọ ammọ ke akpatre usen. 49Sia ñketañña nto ke adudu mmi, ado Ete a-akendọññọ akennọ se ntañ ye naña ntañ anye. 50Mmediọọñọ ke ikọ amọ adat awo akesịm uwem nsi-nsi. Ke ntodo se adodo a-ami ntañña ado se Ete abo yak ntañ.”
Currently Selected:
Yọọn 12: NAAM
Highlight
Share
Copy
Want to have your highlights saved across all your devices? Sign up or sign in
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
