Zekaraya 10
10
Ọrovwohwo Cha Tan Ihwo Rọye Hirhe
1Nọ ekpẹn rẹ osio mie Ọrovwohwo vwẹ ọke-evwru,
mie Ọrovwohwo rọ ru ogiribo vẹ egho
rọ vwẹ eghwẹghwẹ re osio kẹ ihwo,
rọ nẹrhẹ ẹbe djẹ vwẹ udju ri kohwo kohwo,
2Kidie ama ta ogbeta,
emraro je mrẹ efian rhe,
evwerhẹewerhẹ ta evwerhẹ re efian
ọ me kẹ uchebro ofefe.
Ọtiọye na ihwo na da hra kerẹ igegede;
a wan ayen oma kidie ayen vwo osuigegede-e.
3Ophu mẹ tua kpahe isuigegede na,
mi che ru isun na gangan;
kidie Ọrovwohwo rẹ otuofovwi vwẹ ẹro rẹ igegede rẹ uwevwi ri Juda,
re dia igodẹ rọye na,
ọ cha vwẹ ayen yoma vwẹ evun rẹ ofovwi
4Oma rayen oragha rẹ ubienyẹ che nu rhe,
oma rayen ichivwo rẹ utughẹ che nu rhe,
oma rayen umurhabọ rẹ ofovwi che nẹ cha,
oma rayen osun kosun che nẹ cha.
5Ayen che kuomagbe dia kerẹ egba vwẹ ofovwi,
de chihi ivwighrẹ na phihọ ibehre rẹ irhuvwu na
ayen cha họnre fikiridie Ọrovwohwo vẹ ayen herọ,
kẹ ayen che kpogho otu re djẹ iyesi na.
6Me cha kẹ uwevwi ri Juda ogangan,
mi ji che sivwi uwevwi ri Josẹf.
Me cha ghwẹ ayen hirhe rhe fikiridie mi ni aruẹdọn rayen,
ayen ke cha dia kerẹsiẹ rẹ a mrẹ nẹ Me je sen ayen dẹvo-o;
kidie mẹvwẹ hẹ Ọrovwohwo Ọghẹnẹ rayen mi che nyo kẹ ayen.
7Etiyin re Ifrem kọ cha họhọ ọgbọfovwi rode,
udu rayen cha ghọghọ kerẹsiẹ ra mrẹ nẹ ayen da wain.
Emọ rayen da mrẹ, oma kọ vwerhe ayen,
udu rayen ke ghọghọ vwẹ evun rẹ Ọrovwohwo na .
8Me riẹn obọ kẹ ayen mi de koko ayen hẹ uwevwi,
kidie Me tan ayen hirhe nure,
ayen ki bu kirobo rẹ ayen buru jovwo.
9Owenẹ Me hra ayen phihọ ohri rẹ ẹgborho na,
yẹn ayen cha karohọ ovwẹ vwẹ orho shesheri na,
ayen vẹ emọ gba dia ji rhivwi rhe.
10Mi che si ayen nẹ otọ rẹ Ijipt rhe uwevwi,
koko ayen ne Asiria rhe,
Me Me vwẹ ayen rhe otọ rẹ Giliad vẹ otọ ri Lebanọn,
bẹsiẹ re asan vwo jẹ ayen ẹgba.
11Ayen cha wan urhie rẹ Ijipt vrẹn,
ka teye ọgbogho rẹ urhie na,
ru ikokodo rẹ Nile ejobi yamu.
A vwẹ eheri rẹ Asiria totọ,
ọkpọ rẹ uvie rẹ Ijipt gbe dia-a.
12Mi ru ayen goma vwẹ evun rẹ Ọrovwohwo
ayen che vwo urinrin vwẹ ode rọye, Ọrovwohwo tare.
Currently Selected:
Zekaraya 10: UBV77
Highlight
Share
Copy
Want to have your highlights saved across all your devices? Sign up or sign in
Bible in Urhobo © United Bible Societies, 1977.
