Zekaraya 9
9
A Cha vwẹ Ẹgborho rẹ kẹre na Guẹdjọ Epha
1Ota rẹ Ọrovwohwo ta kpahe otọ ri Hadrak ro she kpahe Damaskọs. Kidie Ọrovwohwo ri vwo irere rẹ Aram, kugbe uvwiẹ re Izrẹl ejobi;
2Ji te Ramat ro gbere ughwru na,
Taya vẹ Saidọn, owenẹ ayen ghwanre dede.
3Taya gba ogba yariẹ oma phihọ
ọ ghwẹ idọnọ efuanfon koko kerẹ ubu,
iro kerẹ ikueku rẹ irhuvwu na.
4Ẹkẹvuọvo gbe nighe, Ọrovwohwo cha ghwẹ ekuakua rọye mie
ro de do efe rọye phihọ abadi,
erhanre a cha vwọ guọghọ.
5Ashekelọn cha mrẹ udu ko bro,
te Gaza, kọ gbune vwe evun rẹ oja;
te Ekrọn fikiridie iphiẹrohọ rọye kpoghori.
Ovie che ghwu nẹ Gaza,
ihwo gbe cha dia Ashekelọni-i.
6Ihwo ọguọgua cha dia Ashdọd,
ki mi che fue eheri rẹ Filistia.
7mi che si ọbara rọye nẹ unu rọye,
si akon rọye nẹ ẹgua
umuku ri chekọ ke dia Ọghẹnẹ rẹ avwanre;
kọ họhọ oma vwi Juda,
Ekrọn kọ họhọ ihwo ri Jebu.
8Etiyin re ki mi muerhọn riarẹ-ẹ uwevwi mẹ kerẹ ọrhẹrotọ,
rere ohwo ọvuọvo vwo jẹ yan cha yan kpo vwọ;
ohwo gbi shenyẹ ayen ọfa-a,
kidie Me vwẹ ibiẹro mẹ mrẹ re.
Ovie ri Zayọn rọ cha Re Vwobọ
9Ghọghọ gangan, E ọmọtẹ ri Zayọn!
Kperi gan, E ọmọtẹ ri Jerusalẹm!
nighe, ovie wẹn bru uwe cha
ohwo ro phi kparobọ rẹ omavwerha,
dẹndẹn ọ gua ekẹtẹkẹtẹ,
upene ọmọ rẹ ekẹtẹkẹtẹ.
10Mi che si akpẹrẹ nẹ Ifrem
kugbe iyesi rẹ ofovwi nẹ Jerusalẹm;
e ji si umurhabọ rẹ ofovwi no,
kọ ta nẹ ufuoma dia kẹ ẹgborho na ejobi;
uvie rọye kọ nẹ abadi re te abadi,
ji nẹ Urhie na re te oba rẹ akpọ na.
A Cha vwi Zayọn Rhivwi Rhe
11Je vwọ kẹ wẹ rhe, fiki re ọbara rẹ ọphọ Mẹ ri mi
nene uwe re na,
ki mi siobọ nẹ ighuvwu wẹn re hẹ ukpotọ ọyaya na kpo ọphẹ.
12Rhivwi kpo odjahọ wẹn, E ihwo re he uwodi ri iphiẹrohọ;
nonẹ mi ghwoghwori nẹ mi ru ovwan akuava.
13Mi wurhu Juda kerẹ umurhabọ Mẹ;
Me da vwẹ Ifrem ru edada rọye.
Mi dju emọ rẹ ovwan, E Zayọn,
Me vwẹ emọ rẹ ovwan họnre emọ ri Gris.
mi ru uwe họhọ ọlọkọ rẹ ọgbofovwi.
14Etiyin Ọrovwohwo kọ cha vwẹ oma phia kẹ ayen
odada rọye kọ yanran kerẹ enu rọ nyavwaro.
Ọrovwohwo Ọghẹnẹ che hworo owanre na,
ọ Me yan phia vwẹ odju rẹ ovwre re hẹ obọrhe ọnre.
15Ọrovwohwo rẹ otuofovwi na cha sẹro rayen,
ayen cha guọghọ ji chihi otu ri do ibieragha muotọ;
ayen cha da ebara rayen kerẹ wain,
evun Me vọn ayen kerẹ udjokpo rọ vọnre,
rhuọrhuọ kerẹ orhoma rẹ agbada na.
16Vwẹ ẹdẹ yena Ọrovwohwo Ọghẹnẹ rayen na
che sivwi ayen
kidie ayen igegede rẹ ihwo rọye,
kerẹ irhu rẹ erhu rẹ ovie
ayen che no vwẹ otọ rọye.
17Ghine uyota, mavọ oyovwi te, mavọ o fẹro te!
Emuọre cha nẹrhẹ imighene na rho,
wain ọkpokpọ mi rhe ru emetẹ na rho.
Currently Selected:
Zekaraya 9: UBV77
Highlight
Share
Copy
Want to have your highlights saved across all your devices? Sign up or sign in
Bible in Urhobo © United Bible Societies, 1977.
