Matiu 2

Oyan rẹ evwaghwanre

1Ọke re vwo vwiẹ Jesu vwi Bẹtlẹhẹm ri Judia vwẹ ọke ri Herọd vwọ hẹ ovie, nighere, evwaghwanre rẹ eshare erha de nẹ obaro ọnre rhe Jerusalẹm, 2tanẹ, Tivọ e de vwiẹ ovie ri Ju na? Kidie avwanre mrẹ isio rọye vwẹ obaro ọnre, kọye avwanre vwọ rhe re ga na. 3Ọke ri Herọd ovie vwo nyo, ivun de miovwo, kugbe ihwo ri Jerusalẹm ejobi 4O de se ilori rẹ irherẹn kugbe isiẹbe na ejobi koko, ọ da nọ ayen asan re de vwiẹ Kristi na. 5Ayen da ta kẹ nẹ, Bẹtlẹhẹm ri Judia; kidie ọtiọye otu rẹ emraro na siro nẹ;

6Wẹ Bẹtlẹhẹm, vwẹ otọ ri Juda

Ọ dia owẹ re ma hanvwe vwẹ isun ri Juda ejobi;

Kidie ohri wẹn osun che nurhe ro che sun ihwo mẹ Izrẹl.

7Herọd da bẹbẹ se evwaghwanre erha na, ọ da nọ ayen nẹ ọkevọ isio na vwọ phia; 8Ọ de ji ayen kpo Bẹtlẹhẹm, tanẹ, Yanran ra nabọ guọnọ ọmọ na, ovwan da mrẹ wa gba rhe vuẹ vwẹ, rere okpuyovwi mẹ je ra ga rhe. 9Ovie na vwọ vuẹ ayen nu, ayen da yanran; nighe isio rẹ ayen mrẹre jovwo na, ọ da karo kẹ ayen, o de rhi mudia enu rẹ asan rẹ ọmọ na epha. 10Ọke rẹ ayen vwọ mrẹ isio na ro mudia, ayen da ghọghọ gangan. 11Ayen da ro uwevwi na, ayen da mrẹ ọmọ na kugbe Meri rẹ oni rọye, ayen de diguẹ ayen da vwarọ, ayen de rhie ekpo rayen, ayen de ru ẹse kẹ, ọvo kẹrẹ oro, ọrivẹ adjija ọrerha ugboduma. 12Rẹ Ọghẹnẹ vwọ kpokpa kẹ ayen vwẹ evwerhẹ nẹ ayen rhivwi bru Herọd ra-a, ayen da wan idjerhe ọfa kpo.

Onẹ ẹdjẹ kpo Ijipt

13Rẹ ayen vwo kpo nu nighe amakashe da vwẹ oma phia kẹ Josẹf vwẹ evwerhẹ ọ da ta, Vrẹn wo mu ọmọ na re wọ djẹ kpo Ijipt, kugbe oni rọye, wọ dia oboyi bẹsiẹ me vwọ vuẹ ovuẹ rhe wẹ, kidie Herọd guọnọ ọmọ na hwe. 14O de ghine vrẹn ọ da reyọ Meri kugbe ọmọ na ayen da djẹ kpo Ijipt. 15Oboyi kọye ayen diare rhiri bẹsiẹ ri Hẹrọd vwo ghwu; rere ota rẹ omrarọ na tare vwọ gba, ra tare nẹ, Evun rẹ Ijipt mi de se ọmọ mẹ.

Ehwo rẹ Emọboba

16Ri Herọd vwọ riẹn nẹ ihwo na phiẹ ọye phihọ, ivun de miovwo gangan, o de ji ikọn nẹ e rẹ hwe emọboba rẹ eshare re hẹ Bẹtlẹhẹm ejobi, kugbe eko rọye ejobi, emọ rẹ ikpe ive rhe otọ, nẹ okẹ re vwo vwiẹ ọmọ na rhe na. 17Kọye aroẹmrẹ ri Jerimaya vwọ sẹ nẹ,

18Enyo urhuru vwi Rama,

Edo rẹ oviẹ kugbe omemuohọ,

Reshẹl ra viẹ kẹ emọ rọye;

O gbe rhọvwe nẹ e bru ọye uche-e,

kidie emọ na gbe herọ-ọ.

Ehirhe nẹ Ijipt cha

19Ẹkẹvuọvo ọke ri Herọd rhi vwo ghwu nu, amakashe rẹ Ọghẹnẹ da vwẹ oma phia kẹ Josẹf vwẹ evwerhẹ vwẹ Ijipt nẹ, 20Vrẹn wo mu ọmọ na kugbe oni rọye, ri we rhivwi kpo otọ rẹ Izrẹl, kidie ọvweghrẹ rẹ ọmọ na ghwu nure. 21O de vrẹn o de mu ọmọ na kugbe oni rọye, ọ da rhe otọ rẹ Izrẹl. 22Ẹkẹvuọvo ro vwo nyo nẹ Akiẹlus ọ ria vwẹ ẹdia ri Herọd ọsẹ rọye, osho ro vwo kpo oboyi de muo; vwẹ oka rẹ Ọghẹnẹ vwọ phia kẹ vwẹ evwerhẹ, o de kpo Galili. 23Ọ da ra dia Nazarẹt, rere ota rẹ ọmraro na tare vwọ mrasan sẹ nẹ, e che se ohwo ri Nazarẹt.

Currently Selected:

Matiu 2: UBV77

Highlight

Copy