Luk 22

A ro Ẹro kpahe Jesu

(Matiu 26.1-5, 14-16; Mak 14.1-2, 10-11; Jọn 11.45-53)

1Asakiephana orẹ rẹ ikara ro jephuo si kẹre re, re se Ewanvrẹn na. 2Ilori rẹ irherẹn kugbe isiẹbe na ke guọnọ obo rẹ ayen ru hwe ghwu; kidie oshọ rẹ ihwo na mu ayen.

3Etiyin Idẹbono da ro evun ri Judas re se Iskariọt, ọvo vwẹ usun rẹ ihwivẹ na; 4ọ yanran ọ vẹ ilori rẹ irherẹn kugbe inotu na da ra jẹ iroro obo ro ru sa she vwọ kẹ ayen. 5Oma da vwerhe ayen, ayen de ve nẹ ayen kẹ igho. 6Ọtiọye ayen da rhọvwe, ọ da guọnọ ọke ro fori rẹ urogho na de jẹ etiyin ẹdia.

Jesu choma rọ cha vwọ re Ẹwanvrẹn na

(Matiu 26.17-25; Mak 14.12-21; Jọn 13.21-30)

7Etiyin ẹdẹ rẹ ikara ro jephuo na de rhi te, ẹdẹ rẹ ẹwanvrẹn na re vwo hwe omogodẹ rẹ izobo na. 8Ọtiọye na Jesu de ji Pita kugbe Jọn, tanẹ, Yanran ra rhuẹrẹ ẹwanvrẹn kpahe otọ kẹ avwanre, rere avwanre riọ. 9Ayen da ta kẹ, Tivọ wọ guọnọre nẹ avwanre da rhuẹrẹ kpahe? 10Ọ da ta kẹ ayen, Nighe, ọke rẹ ovwan da ro orere na, ọshare ro mu ochẹ rẹ ame cha vwa ovwan; nene kpo uwevwi rọ cha ro, 11gba ta kẹ ohwo ro vwo uwevwi na, Oyono na ta kẹ owẹ, Uvun rẹ ọrhorha rhọ, re me vẹ idibo mẹ da re ẹwanvrẹn na? 12Ko che dje uvun rọ hẹ obenu rhuarho kẹ ovwan; kọna wa rhuẹrẹ kpahe. 13Ayen da yanran, ayen da mrẹ kirobo rọ ta kẹ ayen na; ayen da rhuẹrẹ ẹwanvrẹn na kpahe.

Evwomuo rẹ Emu rẹ Ovwọnvwọn rẹ Ọrovwohwo na

(Matiu 26.26-30; Mak 14.22-26; 1 Kọrẹnt 11.23-25)

14Ọke rẹ unọke na vwo te, o de tidia imẹjẹ, ọ vẹ iyinkọn na. 15Ọ da ta kẹ ayen, Me guọnọre gangan re me vẹ ovwan re ẹwanvrẹn na re me ke re oja; 16Kidie me ta kẹ ovwan nẹ me gbe cha riọ ọfa-a bẹsiẹ rọ vwọ gba vwẹ obo uvie rẹ Ọghẹnẹ. 17Ọ da reyọ uko ọvo, ọke rọ vwọ kpẹvwẹ nu ọ da ta, Reyọ ọnana, re wa gharọ kẹ oma rẹ ovwan; 18kidie me ta kẹ ovwan nẹ nẹ ọke nana yanran me gbe cha da emamọ ri vain bẹsiẹ rẹ uvie rẹ Ọghẹnẹ vwọ rhe-e. 19Ọ da reyọ ikara, ọke rọ vwọ kpẹvwẹ nu o de bro ọ da vwọ kẹ ayen, tanẹ, Ọnana oma mẹ.

20Rẹ ayen vwọ re emu rẹ ovwọnvwọn nu, ọ da reyọ uko tanẹ, Uko nana ro hwẹ kẹ ovwan na ọye ọbara rẹ ọphọ ọkpokpọ.

21Ẹkẹvuọvo nighe obọ rẹ ohwo rọ cha shẹ vwẹ na vẹ ovwẹ gba ria vwẹ imẹjẹ na. 22Kidie Ọmọ rẹ ohwo yanran kirobo ra tarọ phihọ otọ; ẹkẹvuọvo ekan kẹ ohwo yena ra wan obọ rọye shẹ! 23Ayen ohwohwo ke

nọ ohwo nẹ, kẹ ọvo vwẹ usun rẹ avwanre ri che ru ọnana.

Aphro kpahe Ọrho

24Aphro ọvo da rhe dia vwẹ ohri rẹ ayen nẹ, kono vwẹ usun rẹ ayen re ma rho. 25Ọ da ta kẹ ayen, Ovie ri Keferi vwẹ ọrho nyẹ ayen; otu ri vwo ogangan vwẹ enu rẹ ayen ke se ayen iruẹse. 26Ẹkẹvuọvo ọ dia ọtiọye kẹ ovwa-an; kpe rẹ ọtiọye jẹn ohwo rọ ma rho ejobi rhe dia kerẹ omotete ejobi, osun kerẹ ohwo ro gbe odibo. 27Kidie ọrhọ re ma rho, ohwo ro tidia imẹjẹ, eyẹ ọ ro gbe odibo? Ọ dia ọ ro tidia imẹjẹ-ẹ? Ẹkẹvuọvo me hẹ ohri rẹ ovwan kerẹ ohwo ro odibo.

28Ovwan hẹ otu re vẹ ovwẹ gba herọ vwẹ evun rẹ odavwini mẹ; 29kirobo rẹ Ọsẹ mẹ vwẹ uvie mu kẹ vwẹ na, ọtiọye mi ji vwo mu kẹ ovwan. 30rere ovwan re re ovwan ria vwẹ enu rẹ imẹjẹ mẹ vwẹ uvie mẹ, re we tidia ekete mẹ de guẹdjọ rẹ orua ihwivẹ rẹ Izrẹl.

A ta Ota Kpahe Esiansen ri Pita

(Matiu 26.31-35; Mak 14.27-31; Jọn 13.36-38)

31Saimọn, Saimọn, nighe, Idẹbono guọnọ owẹ reyọ, rere o wuye uwe kerẹ ọka, 32ẹkẹvuọvo me da nẹ ẹrhovwo kẹwẹ rere esegbuyota wẹn vwo je she; ẹkẹvuọvo wo de kurhẹriẹ nu, gbe phi udu vwọ hẹ imoni wẹn awọ. 33Ọ da ta kẹ, Ọrovwohwo, me choma me vẹ owẹ che vwo kpo uwodi ji kugbe ughwu. 34Ọ da ta, me ta kẹ owẹ, Pita, ọhọ che bo nonẹ na-a, bẹsiẹ wọ ke sen vwẹ asiarha-a.

Ekpo kugbe Ọlọkọ

35Ọ da ta kẹ ayen, Ọke mi vwo ji ovwan yanran dẹvọ rẹ ovwan ghwa ekpo-o eyẹ isabato-o ye emuọvo kanre ovwan? Ayen da ta, Emuọvo-o. 36Ọ da ta kẹ ayen, Ẹkẹvuọvo Asakiephana, jẹn ohwo ro vwo igho reyọ, ọtiọye je hẹ ekpo. Jẹn ohwo ro vwo ọlọkọ-ọ shẹ okpa rọye re ọ dẹ ọvo. 37Kidie me ta kẹ, owẹ nẹ ọbe ọfuanfon nana cha gba vwẹ oma mẹ, E de kere kugbe igburhi; kidie obo re siri kpahe ovwẹ na rhe gbare. 38Ayen da ta, Ọrovwohwo, Ọrovwohwo, ọlọkọ ivẹ na. Ọ da ta kẹ ayen nẹ, O teri.

Jesu nẹ Ẹrhovwo vwẹ enu rẹ Ugbenu rẹ Ọliv

39Ọ da ro otafe, ọ da yanran, kirobo ro ruẹ jovwo, kpo ugbenu rẹ Oliv; idibo na de nene. 40Ọke ro rhi vwo te asan na ọ da ta kẹ ayen, Nẹ ẹrhovwo rere we vwo jẹ odavwini ẹruọ. 41O de tephe kẹ ayen emerha, o de shiguẹ ọ da nẹ ẹrhovwo, 42Ọsẹ, ọ da dia ẹguọnọ wẹ, gbe jẹ uko nana chọ vwẹ ra; ẹkẹvuọvo ọ dia ẹguọnọ mẹ-ẹ, ẹkẹvuọvo ọwẹn, ọye wo ru. 43Amakashe da vwẹ oma phia kẹ nẹ odjuvwu rhe, rhe vwẹ ogangan kẹ. 44Rọ vwọ hẹ evun rẹ uvwerhe na ọ da nẹ ẹrhovwo gangan; ọdja de rhi fio oma ku kporo kporo kerẹ ọbara ro suẹn te otọ prapra. 45Ro vwo vrẹn nẹ ẹrhovwo rhe, o de bru idibo na rhe ọ da mrẹ ayen re vwerhẹ fiki rẹ oja, 46ọ da ta kẹ ayen, Die wa vwọ vwerhẹ? Vrẹn wa nẹ ẹrhovwo rere we vwo jẹ odavwini ẹruọ.

Ẹshẹ kugbe Emuo ri Jesu

(Matiu 26.47-56; Mak 14.32-42; Jọn 18.3-12)

47Rọ je ghwa vwọ ta ota na, otu de bro rhe, ohwo re se Judas na, ọvo vwẹ ihwivẹ na, o ro suẹn ayen cha. O de si kerẹ Jesu re ọ ọfiọnfiọn unu; 48Ẹkẹvuọvo Jesu da ta kẹ, Judas, wọ vwẹ unu ẹ fiọnfiọn shẹ Ọmọ rẹ ohwo? 49Ọke rẹ otu re vẹ ọye gba herọ na vwọ mrẹ obo re cha phia kẹ, ayen da ta, Ọrovwohwo, ma vwẹ ọlọkọ nyavwe ayen? 50Ọvo vwẹ usun rẹ ayen da nyavwe orhọn rẹ ọviẹn rẹ orherẹn rode na bru kufia. 51Ẹkẹvuọvo Jesu da ta, me guọnọ ọnana-a! Ọ vwẹ obọ te orhọn rọye ọ da vwọ tamu. 52Etiyin Jesu da ta kẹ ilori rẹ irherẹn na kugbe inotu rẹ uwevwi rẹ ẹga na kugbe ekpako na, re rhere rhe vwọ suọ na, Wa rhere kerẹ ohwo rọ vwọ so igbunegbu vẹ elọko, vẹ egbẹn? 53Ọke re me vẹ ovwan vwọ herọ kẹdẹ kẹdẹ vwẹ uwevwi rẹ ẹga na, we shabọ họ ovwẹ-ẹ. Ẹkẹvuọvo ọnana hẹ unọke rẹ ovwan, kugbe ogangan rẹ ebri.

Pita Sen Jesu

(Matiu 26.57-58, 69-74; Mak 14.53-54, 66-72; Jọn 18.12-18, 25-27)

54Etiyin ayen de shabọ họ ayen de suo yanran, ayen da reyọ vwọ rhe uwevwi rẹ orherẹn rode. Pita de nene vwẹ obuko shesheri; 55rẹ ayen vwo koko erhanre phihọ uherevie rẹ ọguan na ayen de tidia kugbe, Pita de tidia ohri rẹ ayen. 56Etiyin ọmọtẹ ọvo, rọ mrẹrẹ ro vwo tidia rẹ erhanre vwo la muo na kọ tọn ẹro vio, ọ da ta, Ohwo nana vẹ ọye je hẹ usun rhe. 57Ẹkẹvuọvo ọ da phrọ, tanẹ, Aye, me riẹnrẹ-ẹ. 58Ọmọke ọfa ohwo ọfa da je mrẹ ọ da ta, Wẹ je hẹ ọvo vwẹ usun rẹ ayen. Ẹkẹvuọvo Pita da ta, Ọshare na, me dia ọye-e. 59Kerẹ emu rẹ unọke ọvo vwọ wan nure ohwo ọfa ki je vwra, nẹ, Omuẹro ohwo nana vẹ ọye je herọ rhe; kidie ohwo ri Galili o ruẹ 60Ẹkẹvuọvo Pita da ta, Ọshare na, mẹ riẹn obo wọ ta na-a. Siẹvuọvo na, ro je ghwa vwọ ta ota na, ọhọ de ghwe bo. 61Ọrovwohwo da rhẹriẹ oma o de ni Pita. Pita da karohọ ota rẹ Ọrovwohwo, obo rọ ta kẹ, Tavwe rẹ ọhọ ki bo nonẹ na, wọ sen vwẹ asiarha. 62Ọ da ro otafe ọ da viẹ gangan.

A vwẹ Jesu Jehwẹ A teyerọ

(Matiu 26.67-68; Mak 14.65)

63Asakiephana ihwo ri mu Jesu na da vwọ jehwẹ ayen de hwe; 64ayen da gba opharo ayen da nọ, Mraro, ono re fa wẹ na? 65Ayen da ta eta efa buebu kpahọ, je ghwọ kuo.

Jesu vwẹ Obaro rẹ Ẹguare na

(Matiu 26.59-66; Mak 14.55-64; Jọn 18.19-24)

66Okẹ rẹ ayen vwọ rhe, ọghwẹgbe rẹ ekpako rẹ ihwo na de koko kẹ, te ilori rẹ irherẹn vẹ isiẹbe; ayen de suo kpo ẹguare rayen, ayen da ta, 67Wọ da dia Kristi na, ta kẹ avwanre. Ẹkẹvuọvo ọ da ta kẹ ayen, Me da ta kẹ ovwan, we segbuyota-a; 68ọ da dianẹ me nọ ovwan, ovwan cha kpahe-e. 69Ẹkẹvuọvo kẹ ọke na yanran Ọmọ rẹ ohwo che tidia vwẹ obọrhe rẹ ogangan rẹ Ọghẹnẹ. 70Ayen ejobi da ta, Wẹ kẹ Ọmọ rẹ Ọghẹnẹ heyọ? Ọ da ta kẹ ayen, Wẹ re tare nẹ Mẹvwẹ ọye. 71Ayen da ta, Didi iseri ọfa avwanre rha guọnọ? Avwanre ọvo ri nyoro nẹ unu robọ rọye rhe.

Currently Selected:

Luk 22: UBV77

Highlight

Copy