Luk 23

Jesu vwẹ Obaro ri Pailet

(Matiu 27.1-2, 11-14; Mak 15.1-5; Jọn 18.28-38)

1Etiyin Otu rẹ ayen ejobi de vrẹn, ayen da reyọ vwo rhe Pailet. 2Ayen ke vwẹ urhi muo, tanẹ, Avwanre mrẹ ohwo nana ro kuẹ ẹgborho na rhẹriẹ, rọ djẹ avwanre nẹ a hwa osa rẹ uyovwi kẹ Siza-a, tanẹ ekpuyovwi rọye Kristi na ovie. 3Pailet da nọ, Wẹ hẹ Ovie ri Ju na? Ọ da kpahe kẹ, Wẹ re ta ọtiọye. 4Pailet da ta kẹ ilori rẹ irherẹn na kugbe urogho na, Me mrẹ oruchọ vwẹ obọ rẹ ohwo nana-a. 5Ẹkẹvuọvo kẹ ayen kpakpọ, tanẹ, Ọ kpare ophu rẹ ihwo na, o yono wan Judia ejobi, nẹ Galili rhe tobọ rhi te etinẹ na.

Jesu vwẹ Obaro ri Herọd

6Ọke ri Pailet vwo nyo ọnana, ọ da no sẹ ohwo na ọ rẹ Galili. 7Rọ vwọ riẹn nẹ otọ rhe isuesun ri Herọd o nurhe, ọ da reyọ vwo rhe Herọd, rẹ ekpuyovwi rọye hẹ Jerusalẹm vwẹ ọke yena. 8Ọke ri Herọd vwọ mrẹ Jesu, oma da vwerhọ gangan, kidie ọ guọnọ mrẹ krẹre, fikiridie o nyo usi rọye, ko rhẹro rọ vwọ mrẹ oka ro ruru. 9Ọtiọye na ọ da nọ enanọ krekri; ẹkẹvuọvo ọ kpahere. 10Ilori rẹ irherẹn na kugbe isiẹbe na de mudia etiyin, re chahe urhi muo gangan. 11Herọd vẹ otuofovwi rọye da phọphọ ayen da vwọ jehwẹ; etiyin, ayen de ku ewun rẹ ododo phihọ, ọ da rhoma suo rhe Pailet. 12Herọd vẹ Pailet da ghwa rhuẹrẹ kugbe vwẹ ẹdẹ yena, kidie rhi te ọke na ayen ivẹ na gba-a.

Ebrorhiẹ rẹ Ughwu hwe Jesu

(Matiu 27.15-26; Mak 15.6-15; Jọn 18.39–19.16)

13Pailet da rhoma se ilori rẹ irherẹn na kugbe isun rẹ ihwo na, 14ọ da ta kẹ ayen We mu ohwo nana rhe vwe kerẹ ohwo ro kuẹ ihwo rhẹriẹ; re me rha vwọ davwọ ni vwẹ irharo rẹ ovwan nu na, nighe, me rha mrẹ ohwo nana rọ reabe rẹ urhi ru we vwo muo naa; 15Herọd je mrẹ emuọvo kpahọ-ọ, kidie ọ rhoma vwo rhe avwanre, Nighe, a mrẹ obo ri fo ughwu vwẹ obọ rọye-e; 16vwẹ ọtiọye na ke me de fa rere mi siobọ nọ.

17Asakiephana uruemu rọye ro vwo siobọ nẹ ohwo ọvo kẹ ayen vwẹ orẹ na.

18Ẹkẹvuọvo ayen ejobi de koko kuvwie, A vwẹ ohwo nana yanran, re siobọ nẹ Barabas kẹ avwanre– 19ohwo ọvo re mu phihọ uwodi fiki rẹ ozighi egbe, kugbe ozighẹ. 20Pailet da rhoma ta ota kẹ ayen obọ ọfa, rọ vwọ guọnọ obọ siẹnẹ Jesu. 21Ẹkẹvuọvo ayen de kuvwie, kanrọ mu agbagba, kanrọ mu agbagba! 22Obọ rerha ọ da ta kẹ ayen, Die, didi umwemwu o ruru? Me mrẹ oruchọ ro ruru ro fo ughwu-u, vwẹ ọtiọye na ke me de fa rere mi siobọ no. 23Ẹkẹvuọvo kẹ ayen kpakpọ, re guọnọ vẹ ekuvwie nẹ ọ kanrọ mu agbagba. Ekperẹ rayen da kparobọ. 24Ọtiọye Pailet de bru kẹ ayen ọ da rhọvwe phihọ obo rẹ ayen guọnọre. 25O de siobọ nẹ ohwo re mu họ uwodi fiki rẹ ozighi egbe kugbe ozighẹ, rẹ ayen nọre; ẹkẹvuọvo o de siobọ nẹ Jesu kẹ ayen nẹ ayen gbe ru obo ri je ayen.

Ekanrọ mu Agbagba

(Matiu 27.32-44; Mak 15.21-32; Jọn 19.17-27)

26Rẹ ayen vwo suo yanran, ayen de shabọ họ ọvo Saimọn ri Sairini, ro ghwe nẹ obo orho cha, ayen de mu agbagba na nyẹ, rọ ghwa nene Jesu. 27Urogho rẹ ihwo na de tue nene, kugbe eya ri beroma kugbe e re viẹ. 28Ẹkẹvuọvo ri Jesu vwọ rhẹriẹ oma ku ayen ọ da ta, Emetẹ ri Jerusalẹm, wa viẹ kẹ vwẹ-ẹ, ẹkẹvuọvo viẹ kẹ oma rẹ ovwan kugbe emọ rẹ ovwan. 29Kidie nighe, ẹdẹ cha rẹ ayen da cha ta, Ebruba kẹ ẹga, kugbe evun rẹ ọmọ je ro dẹvo-o, kugbe evie re ji vie dẹvo-o! 30Etiyin ayen ke cha ta kẹ igbenu na, Shenyẹ avwanre; igbenu itete na, rhurhu avwanre. 31Kidie ayen de ru ọnana ke urhe ọkpokpọ, kidie re cha phia kẹ urhe oghweghwu?

32Ivẹ efa je herọ, izighẹ, e de sun ayen yanran ra vwọ ba re hwe ghwu. 33Ọkẹ rẹ ayen rhi vwo te asan na re se Ekpehruyovwi kẹ etiyin a da kanrọ mu agbagba, kugbe izighẹ na, ọvo hẹ obọrhe ọvo hẹ obọhwẹre. 34Jesu da ta, Ọsẹ, vwo ghovwo ayen; kidie ayen riẹn obo rẹ ayen ruẹ-ẹ. Ayen da vwẹ ewun rọye vwo duvwu itẹ. 35Ihwo na de mudia, re rhẹrẹ; ẹkẹvuọvo isun na de mienu phihọ, tanẹ, O sivwi ihwo efa; gbe jẹn o sivwi oma rọye, ọ da dianẹ ọye hẹ Kristi rẹ Ọghẹnẹ, Ọvuọvo rọ Jẹreyọ na. 36Isodje na da je vwọ jehwẹ rhe, i bruro rhe e da vwẹ origbo kẹ, 37tanẹ, Ọ da dia owẹ hẹ Ovie ri Ju na, gbe sivwi oma wẹn! 38E de si isiesi vwọ tamuo, Ọnana hẹ Ovie ri Ju na.

39Ọvo vwẹ izighẹ na re churu si de do kuo, tanẹ, Ọ dia owẹ hẹ Kristi na? Sivwi oma wẹn kugbe avwanre ! 40Ẹkẹvuọvo ọrivẹ da ghwọ kuo, tanẹ, Wọ djẹ oshọ rẹ Ọghẹnẹ-ẹ, ọ dia orhiẹ rẹ ughwu ọvuọvo na e bru hwe vẹ avwanre-e? 41Orhie ọsoso e bru hwe avwanre na; kidie osa rẹ umwemwu avwanre reyọ na; ẹkẹvuọvo ohwo nana ru emuọvo chọ-ọ. 42Ọ da ta, Jesu karohọ ovwẹ vwẹ ọke wo de te uvie rẹ ogangan wẹn na. 43Ọ da ta kẹ, Uyota me ta kẹ owẹ, nonẹ na me vẹ owẹ dia vwi Paradais.

Ughwu ri Jesu

(Matiu 27.45-56; Mak 15.33-41; Jọn 19.28-30)

44Asakiephana yọ jẹ oma te unọke esan re, ebri de rhi mu vwẹ otọ na ejobi rhiri rhi te unọke irhiri, 45Rẹ ọnre vwo she re; amwa ra vwọ tan uwevwi rẹ ẹga na de mu bẹre ẹbẹre ivẹ. 46Etiyin Jesu, rọ vwọ van kperi, ọ da ta, Ọsẹ, obọ wẹn mi phi erhi mẹ phihọ! Rọ vwọ ta ọnana nu o de phi ẹnwẹ họ. 47Asakiephana rẹ isodje na vwọ mrẹ obo re phiare, o de jiri Ọghẹnẹ, ẹ da ta, Omuẹro, ohwo nana ọvwata ọ ruẹ! 48Urogho na re ghwẹ koko rhi ni ughe, re vwọ mrẹ obo re phiare de rhivwi kpo re vwẹ abọ teye udu. 49Eriẹnvwẹ rọye kugbe eya na ri nenire nẹ Galili rhe de mudia vwẹ ogboko e da mrẹ imu nana.

Esho ri Jesu

(Matiu 27.57-61; Mak 15.42-47; Jọn 19.38-42)

50Asakiephana ọshare ọvo herọ re se Josẹf ro nẹ Arimatia rhe rhe orho rẹ ihwo ri Ju. Ọdiaguare, ohwo esiri kugbe ọvwata, 51ọ rhọvwe phihọ iroro kugbe uruemu raye-en, o ro phiẹrohọ uvie rẹ Ọghẹnẹ na. 52Ohwo nana de bru Pailet ra ra nọ ekpẹn rẹ orivwi ri Jesu. 53Etiyin o de muo te otọ ọ da vwẹ ukpoyibo vwọ pharọ, o de sho phihọ ushi ta tọn phihọ evun rẹ oragha, re ji shi ohwo phihọ dẹvo-o. 54Ọ da dia ẹdẹ rẹ Omaẹcha, yẹ ẹdidjala ghwe ro te. 55Eya na ri nenire nẹ Galili rhe da vwọ kpahọ, ayen da mrẹ ushi na, vẹ obo re shi orivwi rọye wan; 56Etiyin ayen de rhivwi kpo, re chere ori kugbe ishani ri gbo ọnrhe ororo. Vwẹ ẹdidjala na ayen de rovwoma kirobo rẹ urhi epha.

Currently Selected:

Luk 23: UBV77

Highlight

Copy