Luk 20

Enanẹọ kpahe Ogangan ri Jesu

(Matiu 21.23-27; Mak 11.27-33)

1Ẹdẹ ọvo re, ro vwo yono ihwo na vwẹ uwevwi rẹ ẹga na ro vwo ghwoghwo iyenrẹ esiri na, ilori rẹ irherẹn kugbe isiẹbe vẹ ekpako na de bro rhe 2ayen da ta kẹ, Ta ke avwanre ogangan rẹ ono wo vwo ruẹ imu na, eyẹ ono re kẹ wẹ ogangan nana. 3Ọ da kpahe kẹ ayen, Me je nọ ovwan enanọ tavwe, Asakiephana gba ta kẹ vwẹ, 4Ameẹreyọ ri Jọn odjuvwu o nurhe gbenẹ obọ rẹ ihwo? 5Ayen ke ta ota na vwẹ omoma rẹ ayen, tanẹ, Ọ da dianẹ avwanre tare nẹ, Odjuvwu, kọ ta, Kidie we gbi se gbuyota-a? 6Ẹkẹvuọvo avwanre da ta, Obo rẹ ihwo, ihwo na ejobi phi avwanre hwe; kidie o mu ayen ejobi ẹro nẹ Jọn ọmraro. 7Ọtiọye ayen da kpahe nẹ ayen riẹn asan ro nurhe-e. 8Jesu da ta kẹ ayen, Ye me je sa ta kẹ ovwan ogangan ri mi vwo ruẹ imu nana-a.

Itẹ rẹ Urhe rẹ Vain kugbe Ihwo re yaro otọ na

(Matiu 21.33-46; Mak 12.1-12)

9Ọ de mu itẹ họ ekpe kẹ ihwo nana. Ohwo ọvo da kọn ogba ri vain, ihwo da yarọ mie, o da yanran kpo isiorho krekri. 10Ọke rẹ ọke vwo te, o de ji odibo rọye bru ihwo na, rere ayen kọrọ ibi ri vain na ẹvo rhe; ẹkẹvuọvo ihwo na de hwe, ayen da djẹ kpo vẹ abọ ofefe. 11O de ji odibo ọfa; ayen de ji hwe ayen da phọphọ, ayen da dje kpo vẹ abọ ofefe. 12O de ji ọrerha; ayen da wan ọnana oma ayen de muo kufia. 13Etiyin ọ ro vwo ogba ri vain na da ta, Kidie mi ru? Mi ji ọmọ mẹ ro jevwe na; ọkeọvo ayen mi mu ọghọ kẹ. 14Ẹkẹvuọvo ọke rẹ ihwo na vwọ mrẹ, ayen da ta kẹ omoma rẹ ayen, Ọnana hẹ ọreuku na; e jẹn avwanre hwe ghwu, rere, uku na dia ọ rẹ avwanre. 15Ayen de phio kufia nẹ ogba ri vain na ayen de hwe ghwu. Kidie ọ ro vwo ogba ri vain na che ru kẹ ayen? 16Kọ rhe rhe ghwọrọ ihwo yena, kọ vwẹ ogba ri vain na kẹ ihwo efa. Ọke rẹ ayen vwo nyo ọnana, ayen da ta, Ọghẹnẹ gha! 17Ẹkẹvuọvo o ni ayen ọ da ta, Ọnana re siri na kidie.

Oragha na dẹn rẹ edovwọn uwevwi senre na

ọ rhoma rhe dia ọ ro vwo uyovwi vwẹ ubienyẹ?

18Kohwo kohwo ro she teye oragha yena ko vwirhi ibribro; ẹkẹvuọvo o de rhe she nyẹ ohwo kọ guọghọ vworo vworo.

19Isiẹbe na kugbe ilori rẹ irherẹn na da guọnọ shabọ phihọ vwẹ unọke yena ọvuọvo na, ẹkẹvuọvo oshọ rẹ ihwo na de mu ayen; kidie ayen vwẹ omoma riẹn nẹ o kpe itẹ nana kpahe ayen.

Enanọ kpahe Osa rẹ uyovwi Ehwa

(Matiu 22.15-22; Mak 12.13-17)

20Ọtiọye na kẹ ayen rhẹrẹ, ayen de ji ọrhẹ, re vwẹ oma nẹ nẹ ayen ihwo rẹ uyota, rere ayen mrasan vwẹ obọ rọ tare yọnrọn, rere ayen vwo muo rhe otu ri vwo ogangan rẹ orhiebro vwẹ otọ rẹ osun na. 21Ayen da nọ, Oyono, avwanre riẹnre nẹ wọ ta wo ji yono yoyovwi, wọ ghwẹ oma hẹ abọvo-o, ẹkẹvuọvo wo yono idjerhe rẹ Ọghẹnẹ na vwẹ ọ rẹ uyota. 22Ọ wan urhi kẹ avawnre re a vwọ hwa osa rẹ uyovwi kẹ Siza, gbenẹ ẹjo? 23Ẹkẹvuọvo rọ vwọ riẹn ona rayen, ọ da ta kẹ ayen, 24Vwẹ igho nẹ vwẹ. Ono vwo uhoho nana kugbe isiesi re herọ na? Ayen da ta, E rẹ Siza. 25Ọ da ta kẹ ayen, Gba vwẹ ẹkẹn ri Siza kẹ Siza, vwẹ ẹkẹn rẹ Ọghẹnẹ kẹ Ọghẹnẹ. 26Ayen gbe sa vwẹ obọ rọ tare vwẹ irharo rẹ ihwo na vwo muo-o; ẹkẹvuọvo rẹ ẹkpahọ rọye vwo gbe ayen unu ayen de rhurhu unu.

Enanọ kpahe Evrẹnushi

(Matiu 22.23-33; Mak 12.18-27)

27Etiyin ihwo ri Sadiusi de bro rhe, ayen otu re sian nẹ evrẹnushi herọ-ọ, 28ayen da nọ enanọ, tanẹ, Oyono, Mosis siro kẹ avwanre nẹ oniọvo rẹ ohwo de ghwu, o vwo aye jẹ o vwiẹ emọ-ọ, Oniọvo rọye gba reyọ aye rọye ro vwiẹ emọ kẹ oniọvo rọye. 29Asakiephana iniọvo ighwrẹ herọ; ọ rẹsosuọ da reyọ aye, o de ghwu o vwiẹ emọ-ọ; 30ọrivẹ da rọvwọ; 31ọrerha da reyọ, ayen ighwrẹ na ejobi da reyọ ayen vwo emọ-ọ ayen de ghwu. 32Ukuko rọye aye na de ji ghwu rhe. 33Vwẹ evrẹnushi na, vwẹ ọtiọye na, kẹ aye rẹ ono aye na cha dia? Kidie ayen ighwrẹ na rọvwerọ gba?

34Jesu da ta kẹ ayen, Emọ rẹ oge nana rọvwọ ayen ji vwo bregọ; 35ẹkẹvuọvo otu re keri ri fori ri che te oge yena kugbe evrẹnushi rẹ ihwo ri ghwuru na e rọvwọ-ọ eyẹ e ji vwo bregọ-ọ, 36Kidie ayen gbi che se ghwu ọfa-a, fikiridie ayen vẹ emakashe na kẹ abavo ayen kẹ emọ rẹ Ọghẹnẹ, ayen kẹ emọ rẹ evrẹnushi. 37Ẹkẹvuọvo nẹ irivwi vrẹn, mrẹmrẹ Mosis vwe rọ phia, vwẹ asan re seri vwẹ oma rẹ aghwa na, asan ro de se Ọrovwohwo Ọghẹnẹ rẹ Ẹbraham Ọghẹnẹ rẹ Aizik Ọghẹnẹ ri Jekọp. 38Asakiephana ọ dia Ọghẹnẹ rẹ ihwo ighweghwu-u, ẹkẹvuọvo ọ rẹ ihwo ekpokpọ; kidie ayen ejobi rhọ vwọ kẹ. 39Ẹvo vwẹ isiẹbe na da kpahe, Oyono, wọ riẹn ta. 40Kidie ayen gbi yivwi nọ enanọ ọfa-a.

Enanọ kpahe Ọmọ ri Devid

(Matiu 22.41-46; Mak 12.35-37)

41Ẹkẹvuọvo ọ da ta kẹ ayen, Mavọ ayen vwọ sa ta nẹ Kristi ọmọ ri Devid? 42Kidie Devid vẹ ekpuyovwi rọye tare vwẹ Ọbe rẹ Une rẹ Ejiro, Ọrovwohwo ta kẹ Ọrovwovwe, Tidia vwẹ obọrhe mẹ, 43bẹsiẹ me vwọ vwẹ ivwighrẹ wẹn hwaọto kẹ wẹn chiyi. 44Devid vwẹ enẹ se Ọrovwohwo; komavọ o ru rha vwọ dia ọmọ rọye?

Jesu harhe Isiẹbe na

(Matiu 23.1-36; Mak 12.38-40; Luk 11.37-54)

45Vwẹ erhọn rẹ ihwo ejobi na ọ da ta kẹ idibo rọye, 46Kẹnoma kẹ isiẹbe na, ri ku edagba igrogro vwọ yan, re guọnọ uyere rẹ afieki kugbe asan ro mẹ yovwi vwi sinagọg kugbe asan ro vwo ọghọ vwẹ asan orẹ, 47re ghwọrọ iwevwi rẹ eyauku re vwẹ omeru nẹ ẹrhovwo ogrogro. E che bru hwe ayen rhuarho gangan.

Currently Selected:

Luk 20: UBV77

Highlight

Copy