Luk 12

Unuẹphẹphẹ kpahọ Omeru

1Vwẹ ọke yena, rẹ ihwo uriori buebu rhi vwo koko gbidi rẹ ohwohwo vwo chiyi ohwohwo, o de ke muhọ ẹta kẹ idibo rọye, Wa kẹnoma kẹ iphuephu ri Farisi, rọ vọnre vẹ ophiẹvwe. 2O vwo emu ọvuọvo re rhurhuru ro jẹ phia-a, eyẹ re sinu re jẹ riẹ-ẹn. 3Kota kota rẹ ovwan tare vwẹ evun rẹ egho ke nyo ayen vwẹ evun rẹ uvo, obo wa bẹbẹ ta vwẹ evun rẹ uvun ke ghwoghwo ayen vwẹ okpo rẹ uwevwi.

Ohwo ra djẹ Oshọ Rọye

(Matiu 10.28-31)

4Me ta kẹ wẹ, igbeyan mẹ, wọ djẹ oshọ rẹ ayen otu ri hwe ugboma-a, o de hwe nu yẹ ogangan rọye reri. 5Ẹkẹvuọvo mi dje ohwo rẹ ovwan djẹ oshọ rọye kẹ ovwan; Djẹ oshọ rẹ ohwo ro de hwe nu o mi vwo ogangan ro vwo mu phihọ erhanre; e, Me ta kẹ wẹ, djẹ oshọ rọye! 6Ọ dia igue iyori a shẹ ikọba ivẹ-ẹ? Jẹ ọvuọvo rọye sa chọrọ Ọghẹnẹ ẹro-o. 7Kidie, vwevwe rẹ ogẹto ọvuọvo rọ hẹ uyovwi rẹ ovwan na ejobi ekere ayen. Wa djẹ oshọ-ọ, ovwan ghare nọ igue buebu.

Rhọvwọ Kristi vwẹ irharo rẹ Ihwo

(Matiu 10.32-33; 12.32; 10.19-20)

8Me ta kẹ ovwan, kohwo rọ rhọvwe ovwẹ vwẹ obaro rẹ ihwo, ọye Ọmọ rẹ ohwo je rhọvwe vwẹ obaro rẹ emakashe rẹ Ọghẹnẹ. 9Ẹkẹvuọvo ohwo rọ sen vwẹ vwẹ obaro rẹ ihwo ka je siọn vwẹ obaro rẹ emakashe rẹ Ọghẹnẹ. 10Kohwo rọ ta ota kpahe Ọmọ rẹ ohwo ke vwọ ghovwo; ẹkẹvuọvo ọ rọ ta ota omiomiovwi kpahe Erhi Ọfuanfon e se vwo ghovwo-o. 11Ọke rẹ ayen de mu we rhe Sinagọg, vwo rhe ivie kugbe isun, wo ro ẹnwan rẹ obo re wọ kpahe-e eyẹ obo re wọ ta-a; 12Kidie Erhi Ọfuanfon che yono uwe vwẹ ọke yena obo ru wọ cha ta.

Itẹ rẹ Ọdafe Ẹkpa na

13Ọvo vwẹ usun rẹ urogho na da ta kẹ, Oyono, ta kẹ oniọvo mẹ na re avwanre ghare uku na. 14Ẹkẹvuọvo ọ da ta kẹ, Ohwo na, ono vwẹ ovwẹ ma oguẹdjọ kugbe aghare kẹ ovwan? 15Ọ da ta kẹ ayen, Jomaotọ, re wo si oma wẹn nẹ urhuru evwo; ọ dia efe buebu rẹ ohwo vwori ọye urhuarhọ rọye epha-a. 16O de kpe itẹ ọvo kẹ ayen tanẹ, udju rẹ ọghwẹrẹ ọvo de yovwi emu gangan; 17O de roro kẹ oma rọye, Die mi ru vwọ, kidie mi vwo asan ri mi vun ekankọn mẹ na phihọ-ọ? 18Ọ da ta, Ọna mi ru. Me guọghọ erhu mẹ na, re me tọn ọfa rọ rhonọ ọtiọna; kẹ etiyin me ghwẹ eka mẹ vẹ ekuakau mẹ phihọ. 19Ke me ta kẹ erhi mẹ, Erhi mẹ, wo vwo emu buebu wọ vwọ choma hẹrhẹ ikpe buebu rọ cha; gbe rovwoma, re, da, ghọghọ. 20Ẹkẹvuọvo Ọghẹnẹ da ta ke, Ekpa! Ason nana a reyọ erhi wẹn mie we; ekuakua re wọ ghwẹ koko na, kono ri vwo ayen? 21Ọtiọye ọ epha kẹ ohwo ro koko efe kẹ oma rọye, o gbi rhe fe vwọ kẹ Ọghẹnẹ-ẹ.

Ẹnwan vẹ Oshọ

(Matiu 6.25-34)

22Ọ da ta kẹ idibo rọye, Me ta kẹ ovwan, wa ro ẹnwan rẹ arhọ rẹ ovwa-an, obo wa cha re, eyẹ ugboma rẹ ovwan, obo ru we che rhuo. 23Kidie arhọ ghare nọ emuọre, ugboma ghare nọ emwa. 24Roro okpemu; ayen kọ-ọn ayen vuẹ-ẹ, ayen vwo uwevwi rẹ emu-u eyẹ erhu-u, dede yẹ Ọghẹnẹ ghẹrẹ ayen. Ovwan gbe ghare nọ emephran na! 25Ono vwe usun rẹ ovwan na re ro ẹnwan ro se bru kubit ba urhuarhọ rọye? 26Ọ da dianẹ ovwan se ru obo re hanvwere ọtiọye na-a, kidie ovwan vwọ ro ẹnwan rẹ obo ri chekọ? 27Ovwan gbe roro eyareya na, obo rẹ ayen rhua; ayen wia-an ayen ruẹ emuọvo-o; dede ye me ta kẹ wẹ, nẹ ekpuyovwi ri Solomọn vwẹ evun rẹ urinrin rọye se rhuo emwa ri yovwi te aye-en. 28Ẹkẹvuọvo ọ da dianẹ Ọghẹnẹ se rhuo ẹbe rẹ aghwa na rọ rhua bodo bodo nonẹ odẹ rọ cha na a nyavwe ayen ghwẹ phihọ erhanre, komavọ o rhuo ovwan te, E ihwo ri vwo esegbuyota tutuno na? 29Ovwan guọnọ obo rẹ ovwan re-e kugbe obo rẹ ovwan da-a, eyẹ ovwan ro ẹnwa-an. 30Kidie ẹgborho rẹ akpọ na ejobi guọnọ imu nana; Ọsẹ rẹ ovwan je riẹn nẹ ovwan guọnọ ayen. 31Ẹkẹvuọvo, gba ka guọnọ uvie rẹ Ọghẹnẹ tavwe, ka vwẹ imu nana ba kẹ wẹ rhe.

Efe vwẹ Odjuvwu

(Matiu 6.19-21)

32Wa djẹ oshọ-ọ, imigegede mẹ, kidie evun esiri rẹ Ọsẹ na rọ vwọ vwẹ uvie na kẹ ovwan. 33Shẹ eyere wẹn, ru ẹse, kọn phihọ ekpo ro jẹ bẹrẹ, efe rẹ odjuvwu ro je re, asan rẹ oji se te-e rẹ eghwọghwọ da ria-a. 34Kidie asan rẹ efe wẹn epha, etiyin iroro wẹn je dia rhe.

Idibo ro rhẹrẹ

35Chobiẹ amwa wẹn re urhukpẹ wẹn la, 36re wa dia kerẹ ihwo re ra hẹrhẹ onini rayen ro nẹ orẹ rẹ ọpha na cha, rere ọke rọ da rhe ro de hworo ayen mi ghwe rhie ẹchẹ kẹ. 37Ebruba kẹ idibo yena rẹ ọke rẹ onini na da rhe rọ da vwa ayen re rhẹrẹ; uyota, me ta kẹ ovwan, kọ chobiẹ amwa rọye kọ vwẹ ayen tidia udoemu, ko mu emu kẹ ayen re. 38Ọ da dianẹ ọ rhere vwẹ ovwọnvwọn eyẹ uherevie ason, ebruba kẹ idibo yena.

39Ẹkẹvuọvo gba riẹn ọnana, nẹ ọ ro vwo uwevwi na da riẹn nẹ oji cha, mane ka rhẹrẹ a gbe sa fọ nẹ a tọn uwevwi rọye fi-i. 40Ovwan ji muegbe rhe; kidie ọmọ rẹ ohwo cha rhe vwẹ ọke wo roro phihọ-ọ.

Odibo rẹ esiri eyẹ Odibo umwemwu na

(Matiu 24.45-51)

41Pita da ta, Ọrovwohwo, avwanre ọvo wo kpe itẹ nana kẹ vwo gbenẹ ihwo ejobi? 42Ọrovwohwo da ta, Kono hẹ odido rẹ esiri rọ ghwanre na, rẹ onini rọye cha vwọ hẹ enu rẹ uwevwi rọye, rọ cha vwẹ emuọre rayen kẹ ayen vwẹ ọke rọye? 43Ebruba kẹ odibo yena rẹ onini rọye cha vwa ro ruẹ ọtiọye. 44Uyota me ta kẹ ovwan, kọ vwọ hẹ enu rẹ obo ro vwori ejobi. 45Ẹkẹvuọvo odibo yena da ta kẹ oma rọye nẹ, Onini mẹ cha fobọ rhee, ko hwe idibo rẹ emeshare vẹ emetẹ ri chekọ, ọ mia ria ọ mia da idi mie muo, 46onini rẹ odibo yena cha rhe kpregede vwẹ ọke ro roro phihọ-ọ, ko hwẹ, ko kere phihọ orharhe rẹ ohwo. 47Odibo yena rọ riẹn uruemu rẹ onini rọye jovwo, ẹkẹvuọvo o rhe muegbe-e eyẹ o ruru kirobo rẹ ọhọre rọye epha-a, ke hwe gangan. 48Ẹkẹvuọvo ọ rọ riẹnre-e, ro de ru emu ro fo ehwe, ehwe rọye kọ dia frae. Kohwo kohwo ra vwẹ emu buebu ke, emu buebu a je nọ ekpẹn vwẹ obọ rọye; ohwo ra vwẹ ọrho rode kẹ emu rode a je nọ ekpẹn vwẹ obọ rọye.

Jesu ọ sua oghare

(Matiu 10.34-36)

49Me rhere rhi phi erhanre phihọ akpọ na; mane kẹ erhanre na mu nure vwenẹ! 50Mi vwo ame mẹ vwọ kẹ ihwo; komavọ me nyẹ oma te bẹsiẹ ro vwo ru gba! 51We rori nẹ mi rhi phi ufuoma phihọ akpọ na? Ẹjo, Me ta kẹ ovwan, ẹkẹvuọvo ohẹriẹ. 52Ke etinẹ a ra re ihwo iyori re hẹ uwevwi cha ghare, erha cha vwọ so ivẹ ivẹ cha vwọ so erha; 53ayen cha ghare, ọsẹ vwọ so ọmọ ọmọ cha vwo so ọsẹ, oni vwọ so ọmọtẹ ọmọtẹ vwọ so oni, oniorọvwe cha vwọ so aye rọye aye cha vwọ so oniorọvwe rọye.

Evugbe rẹ Ọke na

(Matiu 16.2-3)

54Ọ da rhoma ta kẹ urogho na, Ọke rẹ ovwan da mrẹ egho rọ biẹ cha vwẹ obuko ọnre, ovwan me ghwa ta, Osio cha rhọ; ọ me ghene rhọ. 55Wa da rha mrẹ odju ro djuẹ nẹ obọrhe ọnre cha, wa me rha ta, oheri na cha gan; ọ me ghene phia. 56Ovwan imemesi na! Wa riẹn obo ra fan otọ rẹ aruọke vẹ enu; ẹkẹvuọvo kidie ovwan gbe riẹn obo ra fan otọ rẹ ọke nana-a?

Wọ vẹ Ivwighrẹ wẹ Rhuẹrẹ kugbe

(Matiu 5.25-26)

57Kidie ovwan gbe vwẹ oma rẹ ovwan guẹdjọ rẹ obo ri shephihọ-ọ? 58We de nene ohwo ro mu ovwan kpo obo rẹ oguẹdjọ, wọ vẹ ọye me rhuẹrẹ kugbe vwẹ idjerhe, o dia ọtiọye-e ko kpono uwe rhe oguẹdjọ, oguẹdjọ na kọ vwẹ owẹ kẹ ọnọkpa, ọnọkpa na ko mu we kpo uwodi. 59Me ta kẹ wẹ, e se siobọ nẹ uwe-e bẹsiẹ wọ vwọ hwa osa wọ rere nu.

Currently Selected:

Luk 12: UBV77

Highlight

Copy