Matiu 28

Jisus mudaji kwane̩

1Abu kʼo̩jo̩ uñmi le̩ le, kʼo̩jo̩ ejodudu o̩jo̩ mebie omune̩ me̩ru eñwa, Me̩ri Magdalini kpai Me̩ri ekeji lewa ku ma go oji le̩. 2E̩ la go, ane̩ chane̩ emiejo nana; todu onuche̩ Ondu gwo̩ru kwʼefojale wa, oñ i lewa fʼokuta le̩ li wʼubi, tak i kwogugu oji-wñ. 3E̩ go i dab o̩mamanya eju, e̩wñ kʼi la ko bʼo̩la ma chʼefufu dabu sno. 4Oñ ailo-wñ ki mu abo ku ma dide le̩ je̩ ñw o̩la-ma ga, taku ma jo̩ dabe̩ne̩ kʼabo ki ku. 5Tak onuche̩ le̩ dohi ñw abobule̩ kakini, Ame̩ ki railo n; todu u chema ka ku me̩ feju Jisus ku ma mʼu du kamoli le̩. 6I dʼemi n; todu ma mʼu du kwane̩ alu kʼi ka le̩; me̩ lewa go ugbo ku ma dʼu dachi. 7Taku me̩ nalo piopio ku me̩ ka ñw amako̩che̩-wñ, kakini, Ma mʼu du kwane̩ kwef abo ku ma ku; me̩ la go, i adʼo̩gba-me̩ alo ti Galili, o̩mo̩ me̩ aliʼu. Go, u ka ñwu me̩ me̩. 8Taku ma kwo bʼoji le̩ te̩ piopio, ailo-wñ naba ma, ma la ayo̩ ololo. Oñ ma fule alo ku ma mʼu du ka ñw amako̩che̩-wñ. 9E̩ la go, Jisus de kpai ama, i kakini, Me̩ gba-oo! Taku ma lewa gwo̩nyʼowñ e̩re̩, oñ ma dojikane̩ ñw u. 10E̩gbale̩ Jisus ka ñwu ma kakini, Me̩ ki railo n. Me̩ lo ku me̩ mudu ka ñw amo̩maye-mi todu kʼama ki nyi Galili; o̩mo̩ ma la ali mi.

11Oñ abu ku ma alo, me̩ go, iche̩ka ef abo ide le̩ wʼef ewo, ma mʼe̩wñ du ki wache le̩ duka ñw amagboji amatama. 12Tak abu ku ma wajo̩ manyʼabogijo, ku ma la fʼojuju nyi, ma kʼo̩ko̩ ñw amisoja le̩ e̩kute̩; 13ma kakini, Me̩ ki ka kakini, Amako̩che̩-wñ lewa odu abu kʼa jʼalolu oñ ma mʼowñ ji lo. 14I la che̩wñ kʼe-le̩ tʼigo̩bina eti, a agbʼo̩ ibe, oñ ache kʼame̩ ki we enʼejiji eda. 15Tak abo le̩ mʼo̩ko̩ ajifa gba oñ ma che alu ku ma ko̩ ma. Tak o̩la-i mukpatuka rʼef amaJu gbogbo tʼeñini.

Jisus kwotejugede iiw amako̩che̩ Galili

16Abe̩le̩ amako̩che̩ me̩gwaka le̩ nyi Galili ugbo uwo ki Jisus ka ñwu ma. 17Tak abu ku ma fʼowñ li ma dojikane̩ ñw u; e̩do̩ iche̩ka muda chʼe̩jiji. 18Taku Jisus lewa ko̩la ñwu ma kakini, Ma mʼo̩da du efojale kpai oj ane̩-ile̩-i du ñwu mi me̩. 19Todule̩ me̩ nyʼafʼabo uche̩ichi uche̩ichi du chʼamako̩che̩; me̩ nache ma baptism tef odu Ata kpai e-O̩ma kpai e-Afu Kiafo̩; 20me̩ nako̩ ma ku ma dejute̩ e̩wñ du kʼu fʼuko̩-wñ te̩ ñwu me̩. Me̩ la go, omi dʼugbo me̩ o̩jo̩ du gbogbo tʼukpoji o̩kpanachi-i.

Currently Selected:

Matiu 28: IGL70

Highlight

Copy