Matiu 27

Jisus lewa o̩gba Pailat

1Oñ abu kʼo̩jo̩ ñwa, amagboji amatama chaka kpai abogijo amone̩ le̩ fʼojuju nyi nyu Jisus, todu ku ma dʼowñ kpa. 2Tak abu ku ma fʼu ji ma mʼu du alo, oñ ma mʼowñ du ñwu Pailat, igo̩bina o̩mo̩.

Uku Judas

3E̩gba le̩ abu ki Judas kʼi dʼu ñwu ma mu le̩ fu li ka ku ma fʼabi kpʼo̩, i chane̩ ejumama oñ i mʼajifa ogue̩gwa le̩ ko dabiwa ñw amagboji amatama kpai abogijo, 4i kakini, U dure me̩, owñ chʼe̩bie̩ ki ma fʼudu n kʼu du ñwu ma mu le̩. Ma muda kakini, E̩wñ chʼe-wa ef uwñ? Uwe̩ nʼe-le̩. 5Tak abu kʼi mʼajifa le̩ ko rikpolo jʼef unyi O̩jo̩ Ejefu, i la kwʼo̩mo̩ le namʼo̩la-wñ du lo̩. 6Tak amagboji amatama mʼajifa le̩ ko, ma kakini, O̩da aje̩ ñw a kʼo jʼef e̩wñ ele O̩jo̩ n, abu kʼi chʼo̩ko̩ e̩bie̩. 7Tak abu ku ma fʼojuju nyi, ma mʼu ko la ane̩ abucha kʼi mud ugbo ku ma kʼabo ononojo ji. 8Lef e-le̩ oñ ma do̩ ane̩ le̩ ko̩ Ane̩ E̩bie̩ gbogbo tʼeñini. 9E̩gba le̩ e̩wñ ku ma ka lefu Je̩re̩maya akache̩ le̩ che̩, kakini, Ma la mʼajifa ogue̩gwa le̩ ko, oñ chʼalaja e̩ne̩ kʼamo̩ma Israe̩l da le̩. 10Oñ ma mʼu ko la ane̩ abucha le̩, alu kʼOndu ñwa ñwu mi.

Jisus dago o̩gba Pailat

11Abe̩le̩ Jisus dago o̩gba igo̩bina le̩; oñ igo̩bina tʼowñ ene kakini, Uwe̩ chʼOnu amaJu? Oñ Jisus ka ñwu kakini, Uwe̩ ka-i. 12Oñ ef o̩la kʼamagboji amatama kpai abogijo gwu-nʼowñ i dohi du n. 13E̩gba le̩ Pailati ka ñw u kakini, E̩ gbo̩ ibenu e̩wñ wewe ku ma gba nyʼuwe̩ n? 14I la dohi du ñw u n, i chaka chʼo̩laʼkate. Todabe̩le̩ oñ igo̩bina le̩ yaye tabale.

15Oñ iko uje̩wñ uyo̩ igo̩bina te̩tatʼe̩namuʼka kʼi dʼo̩wo̩ amone̩ le̩ e̩do̩ no̩ ñwu ma. 16Oñ e̩gba le̩ ma nʼe̩namuʼka kʼi chenʼuwohi, odu-wñ ko̩ Barabas. 17Todule̩ abu ku ma wajo̩ le̩ Pailati ka ñwu ma kakini, E̩ne̩ dʼume̩ e̩do̩ kʼu nato̩no̩ ñwu me̩, Barabas abe̩ku Jisus ku ma do̩ ko̩ Kraisti le̩? 18Todu i chema ka kʼi chʼutodu elie̩na ku ma lie̩na-wñ oñ ma dʼuwñ ñw u mu. 19Oñ abu kʼowñ gugu o̩gba ede le̩, o̩ya-wñ fʼuche̩ kpe̩ nyʼugbo-wñ, kakini, O̩wo̩-we̩ ki do̩ kpʼama ugbo e̩no̩kpakpa ki de̩ n. Todu u li uwa nana ef o̩na kʼu na li owñ eñini. 20Ama amagboji amatama kpai abogijo kʼo̩wo̩ nyu o̩wo̩ amone̩ le̩ efu todu ku ma ki bi Barabas, ku ma la du Jisus kpa tinyo̩. 21Abe̩le̩ igo̩bina dohi ka ñwu ma kakini, Ef ama meji-i e̩ne̩ dʼume̩ e̩do̩ kʼu nato̩no̩ tane̩ ñwu me̩? Oñ ma kakini, Barabas. 22Pailat ka ñwu ma kakini, Mak e̩wñ nache Jisus ku ma do̩ ko̩ Kraisti le̩? O̩chaka-ma kakini, Ma ki mʼowñ du kaba mʼoli. 23Oñ i kakini, Tod e̩wñ? E̩bie̩ne̩ e̩wñ i che? Ma muda kwukwa ololo kakini, Fʼu kaba mʼoli.

24Oñ abu ki Pailati li ka ki nʼile ñw u n, chai echi oñ ekuku achi, i mʼomiofo du oñ i fʼo̩wo̩-wñ gwe̩ eju o̩wo̩ amone̩ le̩, i kakini, O̩wo̩-mi dʼef e̩bie̩ e̩no̩kpakpa-i n. Ame̩ go. 25Tak amone̩ le̩ du dohi kakini, E̩bie̩-wñ ki nʼawa kpai amo̩ma-wa oji ke! 26E̩gba le̩ i tu Barabas no̩ ñwu ma, oñ abu kʼi fu Jisus gwo, i mʼu du ñwu ma todu kʼama ki dʼowñ kamoli.

Ma fu Jisus kaba mʼoli

27E̩gba le̩ amisoja igo̩bina mu Jisus du nyʼef unyi Praito̩rium, oñ mafʼo̩gbo̩ abo oje̩go̩-ma do̩ wa adonyʼuwñ. 28Taku ma mʼe̩wñ o̩la-wñ gwo̩ jʼane̩, oñ ma mʼaliche̩ba odufa ekpikpa ko bʼo̩ ubi ma, 29taku ma fʼikeke ta uloko oñ ma mʼu du dʼo oji, taku ma mʼikpo du tunyʼo̩wo̩-wñ awo̩to̩, taku ma tʼokuku kpe̩ o̩gba-wñ, ma chʼo uke̩ kakini, Agba-oo, uwe̩, Onu amaJu. 30Taku ma tito̩ nyʼu o̩la, ma mʼikpo le̩ du agwʼo̩ oji. 31Tak e̩gba ku ma fʼu gwʼuke̩ kpa, ma mʼaliche̩ba le̩ du bʼo̩la-wñ te̩, oñ ma mʼe̩wñ e-wñ ko nyʼu o̩la. Taku ma mʼowñ du alo ku ma fʼu kamoli.

32Oñ abu ku ma dufu alo ma fʼe̩ne̩ Sairiniʼka li, odu-wñ ko̩ Saimon; ma fʼe̩ne̩ le̩ mu todu kʼi nʼoli uku Jisus. 33Tak abu ku ma lewa ugbo ku ma do̩ ko̩ Go̩lgo̩ta, owñ chʼe-ku ma do̩ ko̩ Uña Akokoloji, 34ma mʼomi achiwebe̩te̩ma kʼololo gwe̩gwa nyʼu du ñw u kʼi ñmo̩; oñ abu kʼi dʼu kadalu i dʼowñ e̩do̩ kʼi ñmo̩ n. 35Oñ abu ku ma fʼowñ kamoli ma fʼe̩wñ o̩la-wñ kpe̩ jo̩, ma fʼanya-wñ ro̩. 36Taku ma gugu ane̩ adejutʼowñ o̩mo̩. 37Taku ma fʼolubutu o̩la e̩wñ ki chi du tʼugbo oji-wñ ate̩ kakini: OWÑ-I CHE JISUS, ONU AMAJU. 38E̩gba le̩ ma fʼamadinya meji kamoli manyʼowñ, oka dʼo̩wo̩ awo̩to̩, oka la dʼo̩wo̩ awohi. 39Oñ abo ku ma alale chʼakpabie̩-wñ, ma miʼoji-ma ejo, 40oñ ma kakini, Uwe̩, kʼe̩ gu Unyi O̩jo̩ Ejefu lo̩ kʼe̩ mʼu du ko̩ o̩jo̩ me̩ta, fʼo̩la-we̩ jadu! Iche̩wñ kʼuwe̩ chʼO̩ma O̩jo̩, gwo̩ru kwʼoj oli uku wane̩ ke! 41Abe̩le̩ amagboji amatama manyʼamako̩takada kpai abogijo gwʼu uke̩, kakini, 42I fʼabo ki bo̩ jadu, i aneke jadu o̩la-wñ n; Onu Israe̩l i che, i ki gwo̩ru kwʼoj oli uku wane̩ tak a ake̩do̩nʼowñ. 43I te̩take̩do̩nʼO̩jo̩, i chʼe̩ne̩ ki dʼO̩jo̩ e̩do̩ i che, i ki mʼu gba fai ke, todu i ka kakini, O̩ma O̩jo̩ owñ che. 44Amadinya ku ma kamoli manyʼowñ ño̩ kicha abe̩le̩ ñw u ge̩.

Jisus Uku

45Oñ akwo agogo me̩gweji gbogbo wa agogo me̩ta e̩chubi lewa bʼugbo du ane̩ le̩ ma. 46Oñ i dabe̩ne̩ kʼiko agogo me̩ta Jisus dʼomu nyate̩ kwa nana kakini, Elai, Elai, lama sabaktani? Owñ che: O̩jo̩-mi, O̩jo̩-mi, e̩wñ chi kʼe̩ hi umi tinyo̩-i? 47Oñ abu kʼabo iche̩ka ku ma dago jʼo̩mo̩ gbʼo̩, ma kakini, E̩ne̩ le̩ ado̩ E̩laija. 48Tak ababa le̩ e̩ne̩ʼka ef uma fule namʼugbo̩che̩ du, i mʼu du tunyʼomi e̩ka kʼi ñmʼo̩ nyʼo̩la e̩ko̩, tak i mʼu du tunyʼoj elikpo, oñ i dʼu ñw u kʼi ñmʼe̩. 49Oñ abo ki bo̩ kakini, Tʼo̩ no̩, kʼa ali abe̩k Elaija awa jadu-wñ. 50Oñ abu ki Jisus ño̩ dabi dʼomu nyate̩ akwa nana, i tʼafu-wñ no̩.

51Me̩ la go, ukpo ugbeju Unyi O̩jo̩ Ejefu le̩ mukpana meji akwo oji-wñ ate̩ gbogbo wa ane̩; tak ane̩ kwomiejo, apata apata la kpana. 52Tak ojinoji ojinoji mʼalu chi te̩, oñ año̩la abo kiafo̩ wewe ku ma mʼolu du kwane̩; 53oñ abu kʼi kwane̩ ma kwʼef ojinoji ojinoji dufu, oñ ma mugudu tʼef ewo kiafo̩ le̩, ma la kwotejugede ñw amone̩ wewe. 54Oñ abu kʼagboji amisoja ogume̩lu le̩ kpai abo ku ma manyʼowñ adejute̩ Jisus le̩, li ane̩ ki amiejo kpai e̩wñ ki wache le̩, ma railo nana; ma kakini, Ochochi, e̩ne̩-i chʼỌma e-O̩jo̩.

55Abobule̩ wewe ku ma kwo Galili atu Jisus ubi ache e̩wñ ñw u jʼo̩mo̩ agʼo kwʼo̩najiji. 56Me̩ri Magdalini la dʼef uma kpai Me̩ri iye Jeme̩s kpai Jose̩f, kpai iye amo̩ma Ze̩be̩di le̩.

Ma dʼoku Jisus tef ura

57Oñ abu kʼane̩ lo̩, ananaʼka kʼowñ ño̩ chʼako̩che̩ Jisus, kwo Arimatia wa; odu-wñ ko̩ Jose̩f. 58E̩ne̩-i lewʼugbo Pailati kʼi bi oku Jisus. Taku Pailati ñwa ñwu ma ku ma mʼu du wa ñw u. 59Taku Jose̩f mʼoku-wñ gba oñ i dʼu tef ukpo line̩n efufu ki de̩ hiolo, 60tak i mʼu du dachi ef oji e-wñ etito̩, owñ chʼe-kʼi da ef apata. Tak abu kʼi fʼokuta lile li wa alu oji le̩, i le owñ. 61Me̩ri Magdalini kpai Me̩ri ekeji le̩ la jʼo̩mo̩, ma kpejuru ura le̩ gugu.

62Oñ o̩jo̩ñwa O̩jo̩ Emʼo̩latane̩ ucholo le̩, amagboji amatama kpai amaFarisi wajo̩ ugbo Pailati. 63Ma kakini, Odu, a rewa ka kʼadone̩la le̩ ka e̩gba kʼi deju ta kakini, O̩jo̩ me̩ta tak u nakwane̩. 64Todule̩ e̩ nañwa ñwu ma ku ma fʼoji le̩ ñwo̩che kpaka gbogbo tʼo̩jo̩ e̩ke̩ta, tode̩gba kʼamako̩che̩-wñ lewa ku ma mʼoku-wñ ji lo, ku ma la aka ñw amone̩ ka kʼi kwane̩ kwef abo ki ku me̩. Tak uko̩bi e-ubiane̩-i atʼe-ejodudu le. 65Pailati ka ñwu ma kakini, Ame̩ chene̩ abo ide; me̩ lo ku me̩ fʼu che kpaka alu ku me̩ ma. 66Oñ ma le manyʼabide le̩ nañwʼoji le̩ che kpaka, ma fʼokuta-wñ hiuko̩.

Currently Selected:

Matiu 27: IGL70

Highlight

Copy