Markusna Enjil 8

Bag. 8.

1Owittiged watti wer tasum man ugrosir, tedder jema desen digri esum. Yesu hiranigi uwos wide wetidirsum: 2„In jemagi ashefegerin. Ahan ugros toskansum aigi talgadti monburan. Wide kallan wekkon tirgodon damnum. 3Wide ai on ishinirkri tinna kachigir, derti kagrangon, darbir bidigirran. Mine tiddeton bagid wer warirton tasan.“ 4Tenna hirani rudetirsan: „Sayerton wer eskergi ingugi biberkidirin kalloton, indo agar halar?“ 5Tirgi isigirsum: „Mukkotter innai dan kalloton?“ Tir wesan: „Tube kolod.“ 6Ter jemagi amresum, ariddogor tegw an. Wide tube kolodingarigi ared wide shukros birtisum. Wide tenna hiranigi tidirsum, gedimew an. 7Tirgon jemagi tidirsan. Tirgodongon dasum gelil wer kare kinatonirton. Barkos wide wesum: „Ingon gedimetidirwe!“ 8Kalligon bersan. Wide sokesan tomattichirton kewidbulirton shibir kolodti. 9Akaleligon eluf kemisn igit esum. Terin aharro ishinirsum. 10Tenna saayen kubir toros tenna hiranigodon tasum Dalmanusana awtir.

11Farisichi bel targi tekki jadladti ugudisan. Tennaitongon aya wekki simerton werissan, tekked tin jeriberu an. 12Tennewertir duki newos wesum: „Minnai in jil aya wekki awersin? Aleged irgi wetidirri, in jilgi aya wekkon bitirtakkimnum.“ 13Tirgi mugosir owittiged kubir tosum, essin jerkir belli an.

14Wide kalgi tirgodon injarki iwossan. Tirgodongon kubtur, tube habbekk anmenkin, dakomnum. 15Weseir wide wetidirsum: „Farisichina hamirarton innewertichigi wayewe, wide Hirudusna hamirartongon.“ 16Tiri ittiwrigodon metile wesan: „An̄nai kal damnum an.“ 17Yesu iyiros wide tirgi wetidirsum: „Ir ma ittiwrina barer ametilerun, innai kal damnum an? Ir elgon ahisemnun wala afehmemnun? 18Ittagbokon inna achi ma kombanburan? Idder misichi tebrangon analmunun. Wide ulgigi korungon agijirmunum. 19Wala ajilemnun, tu be dicchi togijsinna wattigi eluf dijna joro, shibir mukkottekki sokesure tomattichirton?“ 20Tekki wetirsan: „Diminde owigi.“ „Wide tube kolodti eluf kemisna joro togijringad, shibir mukkottekki eyebungon sokesure tomattichirton?“ 21Wesan: „Kolodti.“ Tirgi wide wetidirsum: „Ir elgon fehmekomnu?“

22Wide Betsaïdar tasan. Teddogon dugur wekki gedimetirsan. Wide Yesunaiton birigsan tekki kumingi. 23Ter dugurki irton kiyed, wide bochigir medinerton osos, wide tenna misichir tuf unduros, wide tenna ichigi tendogor kujros, isigsum: „Er urti wekki analna?“ 24Ter wide ururgi wesum: „Zoligi analli jowichi nawre taleburangon.“ 25Wide owittiged tenna ichigi tenna misichin dogor kujros urwansum. Wide genanos haja malegi kudegir nalsum. 26Tenna kagir ishinos wetirsum: „Mediner tomen.“

27Widegon Yesu tenna hiraniged belsum Gaisariye Filibusdig abidi. Wide darbir tenna hiranigi isigir wide wetidirsum: „Zoli aigi ni term an aweran?“ 28Rudetirsan: „Weri aweran: ‚Er Hana akidiril term an.’ Wide echeli werigon: ‚Eliya term an.’ Wide echeli werigon: ‚Nebichirton werm an.“ 29Ter wide tirgi wetidirsum: „Won iri mingi awerun adder?“ Butrus rude wide wetirsum: „Er komisbul teran.“ 30Ter nadetidirsum zol wekki ter min engi wetidirmendangi.

31Wide tirgi kurkidirarki ugudisum: „Zolna toddogor dan digrigir wejatakkingi. Wide samligon fegirina samli duligon abajilirtongon lufetakkos wide: bibetakkin. Ama ugros toskin aharro bimbelkanin.“ 32In weregi bāyingir wesum. Butrus tekki jenbi wekkir arejju wide ugudisum tekki rejiadti. 33Ama Yesu dirergi wide tenna hiranigi ururgi Butruski nehre wetirsum:: „Annaiton warian, wo shetan. Enna in erig artindumnum. Zolindum.“

34Jemagon tenna hiranigodon uwos wetidirsum;. „Ann aharro, tararki awersil, tennewertigi gubos wide tenna berki, soke injed aigi tebaer agad. 35Minergi tennewertigi halisadti awersil tekki bihejken. Wide tennewertigi ahelkelgon anna joro wide enjilna jorogon, in teran bihalsel. 36Won zolgi minde nefaen, ter on dunya malegi kesbed wide tenna newertigi dabroskin? 37Wala, mingi zol tennewertin agarro bitirin? 38Mine aiged iwide anna wereged istahel in jil fesdebul wide zenbikolna barer, zolna tod tekked bistahen timbabna mejdir malaikari gadisebuligodon tanna wattigi.“

Currently Selected:

Markusna Enjil 8: XNZ1912

Highlight

Copy