Markusna Enjil 7

Bag. 7.

1Farisichi tekk abidi jame tasan, wide abajlirton werigon. Male Urushalimirton tale tasan. 2Tenna hiranirton bagid wekki kalgi akallangi nalos ichigi ewmentag, lumeirsan. 3Mine Farisichigon wide Yahudichi malegon, tir on tinna ichigi seregir ewmenkiran, akalminan, kurselina gelidadti morogredagrangad. 4Wide sugirton, tir on ewmenkiran, akalminan. Widegon hajachi echeli digrichi werigi kurselirton morogredagran, dibitechin ewar, ebrigin ewar, kizbin ewar, wide kar dabunn urdi malena ewarkon. 5Farisichigon wide abajiligon tekki isigsan: „Enna hirani ma atebaemendan kurselina gelidadti? Widegon kalgi akallan ichin ewarkiyir?“ 6Rude tirgi wetidirsum: „Seregir Eshaya idder nebyesum, iri koi owikoni, bajbun nawite: ‚In gebila tenna shundichiged aigi akermen. Ama tenna a annaiton desen warim. 7Wide sudir aigi aabden. Won tiri zolina sheriachigi akurkidirrangon.’ 8Iri artina sheriagi mugos zolindigi morogredagrun.“ 9Wide wetidirsum: „Seregir artina sheriagi mugossun, inna teglidigi hafaderu an! Musegon wesum: 10‚Imbabki kermer an wide inengon. Wide timbabki didel, wala tinengi, diarked di agad.’ 11Ama iri awerun ‚Zol wer on timbabki wala tinengi wetirkin: Kurbanum — artigi tirtakkisum ane teran — 12tendogor damnum haja wekki timbabkon wide tinengon awtidirar.’ 13Artina weregi jagin lufossun gelidad iri akurkidiminged. Amri echeli digrichi werigon ini galgiligi aawrun.“

14Wide jema malegi uwetiros wide wetidirsum: „Aigi gijir fehmewe, ir male! 15Haja bochindi, zolna agilged tur tol, tekki anejisemnum. Ama haja tenna turton belil, tekki anejisen. 16Ulugki kol gijrarna joro, gijr agad.“

17Jemarton bel kar tongad, tenna hirani tekki metelna gisagi isigsan. 18Tirgi wetidirsum: „Irgon terre ikke fehemkiyichi erun? Ir afehmemnu zollo bochirton tol male tekki anejisemeningi? 19Mine in tenna an tur atomnum, turg anmenkin. Wide halayan ashugrin.“ Ter ingi wesum, kale malegi adelgirri an. 20Wide wesum: „Ama haja zolloton belil, man zolgi anejisen. 21Mine aren turton wide zolna arton abelin ergi usi, soroskane, magaskane, berar, 22tamaï, uskane, gishad, fejarachi, mekri, misikattikane, jedifad, ana dorogid, doshkane, habiskanegon. 23In sharichi male aren turton abellan, wide zolgi anejiseran.“

24Mandoton wide imbelligi Surkon wide Saidagonna keligir jusum. Wide ka werro tosum. Wide birigsum zol wer ter mandor engi iyirmeningi. 25Ama bokarki marossum. Mine tenna saayen ter teddor engi gijred, en wer tennai to targi tenn osichinai digirsum. Tenna burugon newerti nijis wekked degbusum. 26In engon jehliy esum, wide en Fenigiye Shamdirton esum. En tekki beddisum, shetangi tenna bururton osos an. 27Ama Yesu tekki wetirsum: „Eleken mugir affichigi berw an. Adelmunum affichina kalgi injirgi wide weligi lufetidirar.“ 28En rude wide wetirsum: „Alem, wo arif. Ama weligon tawlana togorton tomattichi affichinaiton digriligi akallan.“ 29Yesu tekki wetirsum: „In weretodna joro ju. Shetan enna bururton bolossum.“ 30En tenna kagir jurgi elsum tenn affigi tenna nibiddogor bungon, shetangon teddoton bolossingi.

31Widegon Surroton belligi Saidaged nog ta Jelilna essin garro tasum, medinechi dimningarina seler. 32Teddo attatirsan mumud ulug kobbul wekki. Wide Yesunaiton birigsan tenna igi tendogor kujur gengiringi. 33Jemana barerton agar wekkir arejju wide tenna subagi tenn ulugdogor kujur, wide jumbud wekki tufos, tenna nedti kumisum. 34Wide tenna misichigi simegir sokos duki newos wetirsum: „Efatah“ — kusan ane teran. 35Tenna saayen ulgi kustakkisan, wide tenna nedna digitti kustakkisum. Wide sewagir bainsum. 36Yesu tirgi weseirsum zol wekki wetirmendangi. Ama tirgi weseirsinn ukkotterro tiri desen degrigir aüwesan. 37Tir desenkiyr ajebir torgi wesan: „Ter awsin male tenn agarror esum. Ulgi kobbuligi akussum. Mumdigi abainwansum.“

Currently Selected:

Markusna Enjil 7: XNZ1912

Highlight

Copy