Markusna Enjil 3

Bag. 3.

1Widegir jama werro tosum. Teddogon id i sowibulkol wer dasum. 2Tekki uru harsedasan, ter on samten tur bigengirkin, tekki shekeru an. 3Yesu id i sowibulkolgi wetirsum: „Imbel, seler kute teb!“ 4Wide tirgi wetidirsum: „Seregi awar samter hilena? wala uski awar? Newertigi osaro? wala berar?“ Mumudossan. 5Tenna hawalendo daligi tinna achina dulkanen joro misi urumeged urwosir wide idti wetirsum: „Enna igi mide!“ Tenna igi midengad i rude owitti nawre genansum. Farisichi tenna saayen belsan. 6Hirudusdichigodon tenna jihar shuresan, tekki dabirw an.

7Yesu tenna hiraniged essin garkir nogosingad jema dul wer tenn aharro tebaesan Jelilloton, wide Yahudiyerton, 8wide Urushalimirton, wide Adumiyerton, wide Urdunina jerroton, widegon Surkon wide Saidagonna hawalendoton. In jema digri tenna awid ukkottekki gijred tennai tasum. 9Yesu tenna hiranigi wetidirsum, kub kinatoddekki haderew an jemana zahmaged, tekki urimendanna jiradilo. 10Digri werigi gengiringad wide shari wekki koi male tendogor adigirtosan kumiranna joro. 11Wide newertichi nijisi tekki nallann agarro arekaetirsan. Wide biybiyagi jomka awesan: 12„Er artina tod teran.“ Wide tirgi digri wekki weseirsum, tekki shehremenw an.

13Wide jebelgir kujsum. Wide ter birigsinigi uwetidirsum. 14Tekk abidi jusan. Wide diminde owigi ebirsum — tirgon ishinbuliy an undrirsum — tekkodon kewidrangir, wide tirgi ishinirri an, beshirew an. 15Wide gudrakolgirirsum, odechigi gengirw an, wide shetanigi osirw an. 16Wide Simangi eri wekki undursum, Butrus an. 17Wide Yagub Zabadina tod wide Hana Yagubna timbes, tiddogon undursum, Boanerges an, ingon kajfogorna toniy ane teran. 18Wide Andrawuskon, wide Filibuskon, wide Bartulamawuskon, wide Matagon, wide Tumagon, wide Yagub Halfana todton, 19wide Tadawuskon, wide Siman Kanandigon, wide Yahuda Isharyuti, tekki biselimenna tirti.

20Wide kar tosum. Jema wer owittiged jamesum. Tinna digrikaneged kalegi kalarki marossan. 21Tenna awtindichi gijredirgi belsan, tekki morogirw an. Mine tir wesan tekki sabbun an.

22Ama abajili Urushalimirton shugur taleri wesan: „Ter Balazabulged degbun. Wide shetanina dulged teran shetanigi aosin.“

23Tirgi uwetidir wide meteliged wetidirsum: „Won mine eskergi shetan shetanigi aosin? 24Saltana wer tenn an dogor bagtakkikin, in saltana bikewidmunum. 25Ka wekkon tennewertin dogor bagtakkikin, in ka bikewidkanmunum. 26Ikkegon shetan on tennewertin dogor karsigkin, wide bagtakkikin, eske bikewidmunum. Tenna kemal bitan. 27Wekkon eskergi kogor werna kar torgi wide biganimemnum, ter on owolgi kogorki ketifosmenkin. Manin aharro teran kagi biganimen.“

28„Aleged irgi wetidirri, zenbi male zolin tonigi bigafirtakkitidirkandan, wide jedifadi ajedifeligi. 29Ama newerti gadisebuldogor jedifel, in gafrad wekki komnum dimen bokon. Ama tendogor wejbebun dinad dimendi.“

30Ikke Yesu wetidirsum tiri werangad: Tekkodon newerti mili wer dan an.

31Mani wattigi tasan tinengon wide timbesigon. Wide bochiged tebos ishin uwetirsan. Jemagon tenna hawalendo agsum. 32Tekki wetirsan: „Ahan bochir inengon wide imbesigon ekki akashran.“ 33Rude wetidirsum: „Ni terre indi? Wide nigu terre ambesi?“ 34Wide tenn awtir agiligi urwir wide wesum: „Ahan indigi wide ambesigi. 35Arti awersingi awinna tirti, in zol ambes teran wide anisi teran wide indi teran.“

Currently Selected:

Markusna Enjil 3: XNZ1912

Highlight

Copy