Matana Enjil 24

Bag. 23.

1Yesu jamarton belligi warianosingad, tenna hirani tale targi amintirsan jamana goitichigi. 2Mani wattigi wetidirsum: „Ir anallun malerton, ai irgi awetidirrin, aleged kulu wer kulu werdogor bikewidkanmunum. Male biborshugurkanin.“

3Terin agabir talin jurgi zetunna gunan dogor tegossum. Hirani tenn awtandigi wide agarwekkir ojjurgi isigsan: „Argi wedecchiru, sittagki in hajachi bitanograngi, wide er bitanna amara saï ter engi, widegon dunyana bajar sittagk engi.“

4Yesu tirgi widegirtidirsum: „Innewertichigi harsewe zol wer irgi doshkirmeningi. 5Mine digrichi weri ann erir bitaran. Wide biwekandan: ‚Ai anna kidir komisbul terrim an.’ Wide ogji digrichi werigi bidoshkirkandan. 6Ir bigijirkandun karsigechirton, wide karsigechina biybiyagi. Innewertichigi harsewe sarkimentag. Mine in malena ta nogar lezmebun. 7Ama kemal termunum. Mine gebila wer owittin dogor bimbelin, wide mulki wer mulki owittin dogor. Widegon orgidi bitaran, wide odarigon, aridna kerkerarigon agari werir. 8In malegon tajarna ugudar teran.“

9„Mani wattigi irgi habsir bilufundurirran. Wide bibeirran. Widegon bitisitakkikandun umachi malerton ann erina jiradilo. 10Mani wattir digrichi weri biuretakkiran. Ittiwrigon bihuneran wide bitisigongendan. 11Wide nebichi mursaji digrichi weri bimbelkandan. Wide digrichi werigi bidoshkirirkandan. 12Miligidna digrikaneged digrichina dole borokekanin. 13Ama kelbokon newertigi nosogred tebil, inin tirti bidukitakkikanin. 14In enjil mulkindi alam maler beshirtakkoskin, shehadagir gebilachi malen dogor, mani wattigi kel bitan.“

15„Iri sikidigon wide borarigongi, nebi Danyal wekosingi, targi agar gadisebullo tebrangi nalkurun“ — ingi ageryel fehmer agad — 16„mani wattigi Yahudiyer dali gunachigir dosw agad. 17Kan dogor dalgon kute shugurmen agad, urti wekki tenna karton injiri an. 18Gur dalgon agabkir widemen agad, tenna kadegi injiri an. 19Habar eshum mewin dogor, wide ertigi aïgidilin dogor, man ugrosir. 20Saliwe inna dosar shiteranmeningi, wala samten tur. 21Mine dig desen bikosanin. Dunya awtakkisindo ter galig ta nogkomnum elekenbokon. 22Wala bitanogmunum. Man ugrosigon urtunanmenkiran, jita wekkon bisochebelmunum. Ama barbulina jiradilo man ugrosi burtunandan.“

23„Manin agabir wer on irgi wetidirkin: ‚Ahan komisbul indom an,’ wala: ‚Ahan mandom an,’ tekki ‚alegirmenwe.’ 24Mine komisbuli wide nebichi mursaji bimbelkandan. Widegon ayachi duligon ajebigongi bawkandan, mine, tir on eskekran, barbuligi biberigrirran. 25Ahan ai irgi owolgir wetidirossim.“

26„Tir on irgi wetidirkran: ‚Ahan, ter halarm an,’ bel jumenwe! Wala: ‚Ahan, ter kan tur dabun’ ankiran alegirmenwe! 27Mine barig maltiged belka tingarkir ajun nawite, ikke teran zolna todna tarar bawtakkikanin. 28Minerg ankomnun, diel dann agarro, teddo nisri adetijameran.“

29„Lehdayen, man ugrosina dign agabir, masilgon anattigon tinna dawigi bosminan. Wissichigon simerton bidigirran. Wide simechina gudrachi bikujtakkiran. 30Mani wattigi zolna todna amarachi bibineran simer. Man ugrosir aridna gebilachi bitaruran. Wide binallan zolna todti, simena gemir tabungon gudraged wide mejid dul wekked. 31Ter wide tenna malaikarigon bishinirin nefir dul wekked, barbuligi jamegrirw an aridna kochi kemsingarirton, wide simena kochi werroton kochi owittir junbokon.“

32„Tinna jowirton metelgi iyirwe: Tenna baki rahasanoskin, wide waragki ososkin, teddeton biyirrrun sef awtanossingi. 33Irgodongon ikke teran biturbin. Ingu male targi nogoskiran, iyirwe zolna tod awtanossingi, wide babdogor tebingi.“

34„Aleged irgi wetidirrin, in jil binogmunum, ingu male ta nogmenkiran. 35Simegon aridton binogran. Ama anna werechi binogminan. 36Man ugroskon wide man saagongi wekkon iyirmunum, wala simechina malaikari, wala tod, abo agudeg anmenkin.“

37„Nuhna ugrosir awtakkisin nawre ikkegon bawtakkikanin zolna todna tararro. 38Kidirarna ugrosin owollo akalsan wide anisan, aedsan wide aedkirsan, man ugros tedder Nuh kubir tosindo junbokon. 39Wala iyirbukomnan, essi targi malegi kidiririnbokon. Ikke terangon bawtakkin zolna todna tararro. 40Ogj owi gu werro agrangon, tiddeton wekkon bartakkin, owittigon biwaketakkin. 41Owi jugi ajograngon, tiddeton wekkon bartakkin, owittigon bimugtakkin.“

42„Inin jiradilo bichi tegwe! Mine iri aïyirmunun saa edi saïder inna tirti bitangi. 43Ingon iyirwe: Kana tirti on iyirkokin, bagid edi saïder ugun tur magas bitangi, bibichitegsum. Wala tenna ka bimagtakkikomnum. 44Inin jiradilo irgon innewertichigi alled tegwe. Mine saa tedder ir jilebumendunder zolna tod bitan.“

45„Ni terre ter nugud amanakol wide erigkol, tekki tenna tirti tenna nugdin dogor ebrel, tirgi tinna kalegi tenna wattir tidir an? 46Barkebun man nugud, tekki, tenna tirti takin, ikke aawingon belin. 47Aleged irgi wetidirrin, ter tekki tenna shei malen dogor bebrin. 48Ama nugud mili tenna an tur wekin: ‚Anna tirtina tarar elgonm an,’ 49wide nugdi, tenna tiwrichigi, jomdigarki ugudikin, wide bikalin, wide binin asekreligodon, 50man nugudna tirti bitan ugros ter tekki urwedagmeninder, wide saa ter iyirbumeninder. 51Ter tekki gu owir merrigi tenna nasibkon koi owikonigodon bitirin. Mando arwijarkon wide nelina duskarkon dan.“

Currently Selected:

Matana Enjil 24: XNZ1912

Highlight

Copy