Matana Enjil 21

Bag. 21.

1Urushalimgir awtan bidargi wide Betfagigir bidasan, zetunna gunan kello. Yesu wide hirani owigi ishin wetidirsum: 2„Neja inn owolged dallo jukrun, teddo bellun hanu kari wekki, digbungon, tenna farahkodon. Kusedirgi aigi attadenwe! 3Wer on urti wekki irgi wetidirkingon, widegirtirwe: ‚Tir tirgi hajen an.’ Tenna watten bishinirin.“ 4In malegon ta nogsum nebina were webulgi timer an: 5„Siyonna burugi wetirwe: ‚Ahan enna or ekk abidi talebun, norogidted eyebun, hanu kari werdogor wide tenna farahdogor egir tegos’.“ 6Hirani tale jurgi Yesu wetidirsin nawre awsan. 7Tiri hanu karigon tenna farahkongi kused tasan. Wide tinna kadechigi hanun dogor kujros, Yesu wide tendogor egir tegsum. 8Zolina bagid edi dul tinna kadechigi darubdogor awidisan. Wide echeli werigon bettin jeridigi merrigi tirgon darubdogor awidisan. 9Jemachi, tenn owolgi arbuligon wide tebaedaligon, uweka awesan: „Wosana, Dawudna tod! Barkebun artin erir atal! Wosana dogochir.“

10Urushalimir tongadgon medine male rijossum wide wesum: „Ni terre in?“ 11Jemachi wesan: „In Yesu nebi teran, Nasira Jelildindi.“

12Yesu wide artin jamar to jurgi teddo ajanosiligon wide ajaniligongi tur ososirsum jamarton. Wide dugugi asarfelina dadichigi obrosirsum. Wide minechigi ajanosilina kursichigi togijossidirsum. 13Wide wetidirsum: „Bajbun: ‚Anna ka salana kam an webun.’ Won irgon magasina magaragirossun.“

14Terin agabir dugrigon fogorachigon tekk abidi jaman tur tale tasan. Tekkon tirgi gengirosirsum. 15Fegirina samli duligon wide abajiligon ayachi ter awsinigi nalos, wide affichigon jaman tur uweka awerangi: „Wosana, Dawudna tod“, tir musulsan. 16Wide wetirsan: „Er agijirmunum ingu awerangi?“ Yesu tirgi wetidirsum: „Eyo, ir kidir geryekomnu affitonin agilloton wide ertigi anilindirton sebehad abelingi?“

17Terin agabir tirgi mugosir medinena bochigir belligi Betanir targi beyossum.

18Fejirki medinegir leftebungon orgossum. 19Uru nalsum tinna jowi wer darubdogor tebingi. Ter wide tekk abidi targi urti wekki tedder elkomnum waragna masir Ter jowigi wetirsum: „Edder tin wer wide belmeninged!“ Tenna watten jowi sowossum.

20Hirani mangi uru nalos ajibe wesan, mine lehdayen tinna jowi sowossingi. 21Yesu rude wetidirsum: „Aleged, irgi wetidirrin, idder on iman dakin, shikemendungon, iri ai awsinn agudegi in tinna jowiged, bawmunun. Ama ir on in gunagi wetirkrun: ‚Indoton kujtakkirgi essir lufe tor an,’ bigijirtidirin. 22Salan tur ir awerisrun malegi, imanged beddikrun, barrun.“

23Jamar bidangad fegirina samli duligon wide gebilana samligon tekk abidi tale targi, akurkidingon, wetirsan: „Gudra edi saïdiged ingi er aawin? Wide ni terre ekki in gudragi tirel?“ 24Yesu tirgi rude wetidirsum: „Aigon irgi were habbekki bisigirrin. Ir on aigi widegirdenkurun, aigon irgi biwidegirtidirrin, gudra saïdiged ingi aawringi: 25Hanana kidirar sayertone? Simerton ema? Wala zolirtone?“ 26Tinnewertichigodon wesan: „Ar on: ‚Simertonm an’ wekrun, argi biwedecchirin: ‚Won ir ma tekked amnemensure?’ Ar on wide wekrun: ‚Zolirtonm an’ gebilagi asarkirun. Mine Hana malenai nebi galg esum.“ 27Yesugi rudetir wetirsan: „Ar aïyirmunu.“ Tekkon tirgi wetidirsum: „Aigon irgi awetidirminim, gudra edi saïdiged ingi aawringi.“

28„Mingi inn ergir werun inder: Id wernai tod owi dasan. Koyaldinai targi wetirsum: ‚Wo anna tod, ta jurgi olongu anna gur jeligi aw.’ 29Ter rude wesum: ‚Ahan, wo tirti, ai juburin,’ jumeningon. 30Owittinai targi ikke wetirsum. Tekkon rude wesum: ‚Ai ajumnim.’ 31Ama agabir nedmos jusum. Edi saï tiddeton tintimbab awersingi awu?“ Tekki wetirsan: „Owitti term an.“ Yesu tirgi wetidirsum: „Aleged irgi wetidirrin, mekisn idigon wide sorosigon irgi binogran artina mulkir. 32Mine Hana innai tasum alen darubked. Irgon tekked amnadti monsun. Ama mekisn idigon wide sorosigon tekked amnesan. Won iri uru nalessunn agabir nedmergi tekked amnekomnun.“

33Metel owitti wekkon gijirwe: „Zol kana tirti wer dasum. Tenna enebna karum wekki ewros, katre wekked goi halegos, tenna tur asara wekkon golsum. Widegon buruj wekki goyos, torbarigi tidiros, safrossum. 34Enebna karjar igitaningad tenna nugdigi ishinirsum torbarinai, enebki attaw an. 35Torbari nugdigi morogirrigi tiddeton werigi tukirsan, werigon beirsan, werigongi kuluged nalijosirsan. 36Widegon owittiged nugdi echeli werigi ishinirsum owoldichin dogor digrichi werigi. Tirged owoldichiged awsangi awsan. 37Agabir tirg abidi tenna todti ishin wesum: ‚Anna todti bihashimeran an.’ 38Ama torbari todti nalos tinna barer wesan: ‚Ahan in awirtel teran. Tawe tekki berosirgi tenna wirtagi baredrun.’ 39Tir wide tekki morogirrigi wide karumna bochir osos berossan. 40Karumna tirti tan kello, min wekki man torbariged bawin?“ 41Tekki wetirsan: „Man milichigi arrigi bijarsirin jarsar mili wekked. Wide karumgi torbari echeli werigi bitidirin, tekki enebki tenna wattir bitiriligi.“ 42Yesu tirgi wetidirsum: „Iri kidir geryekomnun kitabir?: ‚Kulu agoili wakossangi, ter kulu adigril teranossingi. Artinaitonum. Wide ter ajibebun annā misichir.’ 43Inin jiradilo ai irgi awetidirrin, artina mulki innaiton dukitakkirgi uma wekki bitirtakkin, terigi aawil wekki. 44In kulun dogor digrilgon bitogijtakkin. Ter tendogor digrinna tirtigongi bikaiwin.“

45Fegirina samli duligon wide Farisichigon tenna meteligi gijredsann agabir iyirsan tindogochir bainsingi. 46Tir wide seregir kasshan miredirw an. Ama gebilagi sarkossan. Mine tinnai Yesu nebi esinged.

Currently Selected:

Matana Enjil 21: XNZ1912

Highlight

Copy