Matana Enjil 19

Bag. 19.

1Yesu in weregi bajkirosingad, Jelilloton belligi Yahudiyen esheir tasum, Urdunin jerro. 2Jemachi digrichi weri tebaedarangon, teddo gengirirsum.

3Farisichi tekk abidi tasan, tekki jeriberu an. Wide wetirsan: „Ogicchi hiletirna tenna engi mugarki sebeb malen jiradilo?“ 4Ter widegir wetidirsum: „Ir geryekomnun arti koyallo tirgi awsingi ondigon karigongi, wide wesum: 5‚Inin jiradilo ogij timbabkon wide tinengongi mugosir tenn enged bidigtebin? Tiri wide owirangon jita habbern idim.’ 6Ikke bundo tiri owankomnan. Ama jita habbern idim. Inin jiradilo arti jamegirsingi ogij wer bagmen agad.“ 7Tir wide wesan: „Won Muse ma bajsum: ‚Engi tenna mugarna waragki tiros ishinosw an?’“ 8Ter widegirsum: „Inna achina kogorkanena jiradilo Muse irgi wetidirsum: ‚Inn ecchigi mugw an.’ Ama koyalloton ikke bumnum. 9Elekengon ai irgi awetidirrin, wer on tenna engi mugkin, soroskanena masir, wide owitti wekki edkin, ter soroskanegi aawin. Mugbul wekki edilna tirtigon soroskanegi aawin.“

10Hirani tekki wetirsan: „Ter on ogicchodon ikke turubkin engodon, engi edkomenkiran serey esum.“ 11Ter wetidirsum: „Zol male in weregi agolimnan, ama mangu agude tirtakkelig anmenkin. 12Mine hasyebuli tinecchina tuchirton aeltakkiran. Ama echeli weri daran, ogji ahasyeirran. Wide hasyebuli werigon daran, tinnewertichigi ahasyeran simechina mulkin jiradilo. Zol eske bigolil gol agad!“

13Manin aharro affichi kinatoni werigi tekki attatirsan, tenna ichigi tindogochir kujros barkeir an. Hirani attareligodon alagajesan. 14Yesu wetidirsum: „Ter affichi kinatonigi mugosirwe. Wala gobrirmenwe, annai taru ankiran. Mine simechina mulki tirgi ashebihelindum.“ 15Ter wide tenna ichigi tindogochir kujrosirgi teddoton talossum.

16Tekk abidi awtandigi zol wer tekki wetirsum: „Wo tir sere, min wekki awkirin, ayar dimendigi bellin?“ 17Ter tekki widegirtirsum: „Er ma aigi serem an awen? Wer agude serem. Tekkon arti teran. Er on ayarro torarki aweriskin, tenna sheriagi hafade.“ 18Tekki isigsum: „Edi saïgi?“ Yesu widegirtirsum: „Ingugi: Bemen. Soroskanegi awmen. Magmen. Shahada zurki shehedemen. 19Imbabkon inengongi kermeir. Wide enn awtindigon ennewerti nawite dolu.“ 20In ogij jahal tekki wetirsum: „In malegi harse awsin ann affikanerton. Min aigi elgon mirbudenin?“ 21Yesu tekki widegirtirsum: „Er on kamilaningi aweriskin, jurgi er kon malegi janos dugugi hajebuligi tidiros. Mani wattigi simer er hazin wekki belkanin. Terin aharro targi aigi tebae!“ 22Ogij jahal in werechigi gijred tenn agi desen miligred talossum. Mine shei digri wekki kosinged.

23Yesu mani wattigi tenna hiranigi wetidirsum: „Aleged ai irgi wetidirrin, sheigi kolna tirtina torar simechina mulkir gasima. 24Eyo, irgi widegir wetidirrin, kam werna torar ittilena urburked sahalum sheigi kolna tirtina torardogor artina mulkir.“ 25In werechiged hirani habilossan. Wide wesan: „Ni terre elon bidukibelil?“ 26Yesu tirgi widegirtidirsum, tirgi urwedagiringon: „Ogjinai in esketakkimnum. Ama artinai male esketakkibun.“

27Butrus Yesugodon bain wide wetirsum: „Won ari haja malegi wakos ekki tebaesun. Min wer ban̄danin?“ Yesu tirgi widegirtidirsum: 28„Aleged irgi wetidirrin, haja male eran awtakkinn ugrosir, zolna tod mejidna kursin dogor tegoskin, irgon teran, aigi kelloton tebaereli, kursi diminde owin dogor bitegrun. Wide Israelna ka dimind owigi bihukmerun. 29Wide wer on ann erina jiradilo wakoskin kachi werigon, timbesi werigon, tinisichi werigon, timbab wekkon, tinen wekkon, affichi werigon, guchi werigongi wakosel inin dogor digrigi barkanin. Wide ayar dimendigi biwirtekanin. 30Owolirton digrichi weri bagabandan. Wide agabn idirtongon digrichi weri bowolankandan.“

Currently Selected:

Matana Enjil 19: XNZ1912

Highlight

Copy