Luka Enjil 23

Bag. 23.

1Tinna jema male imbelligi tekked tasan Bilatusnai. 2Wide tinna shekawigi tekk abidi owolgir wesan: „Ar ingi elsun gebilagi amiligiringon. Wide haracchi gaisarki tirarki amirin. Wide awegongenin, ter komisbul term an, wide orm an.

3Bilatus tekki isig wesum: „Er Yahudichina or terre?“ Yesu tekki widegirtir wesum: „Er awen.“ 4Bilatus fegirina samli duligon jemachigongi wetidirsum: „Ai in zollo urti wekkongi aelminim.“ 5Tiri wide kogorkirka awesan: „Ter gebilagi aagsin Yahudiye maler akurkidingon, Jelilloton ugudirgi indo tanbokon.

6Bilatus Jelilna erigi gijred isigsum: „Ogij Jelillotonde?“ 7Ter wide Hirudusna kemsirerton engi iyiros Yesugi Hiruduskir ishinossum. Mine tekkon mani wattigi Urushalimir esum. 8Hiruduskon Yesugi nalos guresum desenkiyr. Mine watti werroton awerissum tekki nalarki, teddeton urti digri wekki gijred. 9Widegon beddisum, aya wekki aw an. Wide tekki were digri wekked isigsum. Ama wekkonged widegirtirkomnum. 10Fegirina samli duligon abajiligon kute tebsan, tekki shekeru an tinna azum maleged. 11Hirudus Yesugi desen hagresum tenna askarked. Wide tendogor ususan. Wide kade aülil wekki undurossir wide Bilatuskir widegrossum. 12Bilatuskon Hiruduskon tiwri owansan man ugrosirton. Mine manin owollo tinna barer adawa wer dasum.

13Bilatus wide uwesum fegirina samli duligon gebilana samligongi. 14Wide wetidirsum: „Ir in zolgi annai attasun, gebilagi amiliginn an. Ahan aigon tekki nalsim inn owollo. Wala in zollo urti wekki ir tendogor ashekerundoton aelminim. Wala Hiruduskon. 15Mine ter tekki irged arg abidi ishinirsum. Ahangon urti diarki huggel wer tedder damnum. 16Ai tekki edibos bitalgerin.“

17Tekkon jen nutin tirgi wekki atalgetidirsum korer. 18Tir wide malan wigirgi wesan: „Ingi ared argi Barabaski talgedecchiru.“ 19Mangon habsir dabusum fitne werna joro, wide berar werna jorogon. 20Wide uwe wetidirsum Bilatus, Yesugi talgosw an. 21Tir odigir wigirgi wesan: „Soligros, soligros.“ 22Bilatus toskittiged wetidirsum: „Minin mili wekki awingad? Ai tedder urti diarki hugel wekki elbumnim. Ai tekki edibos bitalgosrin.“ 23Tir wide hisichigi soke lagaje birigsan tekki soligringi. Tinna hisichi desen dulansan. 24Bilatus wide tendogor hakmossum tir awerissan nawre. 25Wide talgetidirsum habsir dabuelgi fitnegon wide berarkonna joro, tir birigsangi. Wide Yesugi selimossidirsum tir werissan nawre.

26Tekked nogburangon Siman ogij Kairawandi wekki, manged gurton talebungon, morogirsan, Yesuna berki tenn agabked inj andigi.

27Wide jema digri wer tekki tebaedasan gebilarton, wide ecchigon taruka aoirangon tendogor. 28Yesu tirg abidi dire tebarrigi wesum: „Wo Urushalimna burwi, andogor oimenwe. Innewertichin dogor wide inn affichin 29dogor oiwe! Minergi ugrosi weri bitaran. Tidder biwekandan: ‚Barkebuli miri wide tuchi uskimeneli wide ertichi igidimeneli.’ 30Mani wattigi ugudi gunachigi biwetirkandan: ‚An̄dogochir digir towey’ an, wide gozinigi: ‚Argi tagrirw’ an. 31Ter on jerid deseged ikke aawkiran, won sowodted biminanin?“

32Wide zenbikol owigi attasan, tekkodon beirw an.

33Tekked wide jusan agar urna kid an awerander. Teddogon soligirsan zenbikonigodon, wekkon tenn iyinneged, owittigon tenna mayinneged. 34Yesu wide wesum: „Wo abo, wakossidir. Mine tir aawrangi iyirburun an.“ Wide tenna kadechigi bagijos kulugi tindogochir injisan. 35Gebilagon urwed tebsum. Wide fegirina samli duli tendogor usuka awesan: „Ter echeligi ossum. Tennewertigi eleken os agad, komisbul artina barbul ter ekin.“ 36Askarigon teran tendogor aüsusan. Wide hali wekki attaka atirsan. 37Wide awesan: „Er on Yahudichina or ter ekin, ennewertigi os.“ 38Wide bacchi wekkon tenn urdogor baj solibusum Grigiged wide Rumiged wide Ibriged: „In ahan Yahudichina or teran.“

39Wide zenbikoni solibuligon wer tendogor jedifeka awesum: „Er on komisbul ter ekin, ennewertigi osed, argon ekkodon!“ 40Owitti widegir hede wetirsum: „Er artigi asarkimnu, liukumna kidtogor dabungon? 41Arg ankin, aleged hukumtogor erun. Mine ar awsunna kere teran. Ama in urti wekki awkomnum.“ 42Wide Yesugi wetirsum: „Aigi jile, wo Yesu, enna mulkir tan kello.“ 43Yesu tekki wetirsum: „Aleged ekki awetirrin, olongu er aigodon fardosturanin.“

44Man wattigon shob gorjitti ter esum. Duluma wer arid malegi tagressum shob iskodittinbokon. Masilgon urumanossum. 45Wide kade jamagi bagedagelgon gu owir bashtakkossum. 46Yesu wide hisi dul wekked uwe wesum: „Wo abo, enna ir annewertigi undurossim.“ Ingi weros newertigi osossum. 47Imilgi akiyel ta nogelgi nalos artigi mejidti tiros wesum: „Aleged, in zol serey esum.“ 48Jemachi male teddo jamebueli, ururu an, tirgon jeritakkelgi nalos, widesan, tinna ogigi jomrangon. 49Tenna awtindichi malegon, wide ecchi werigon tekki tebaereli Jelilloton, warirton tebos urwedagsan.

50Ogij Yusif an aweran wer dasum. Tekkon saml esum. Wide ogij adel esum. 51In tirgodon wer ekomnum. Wala tir awsangi dolbukomnum. Tekkon Arimatiya Yahudiyendirton esum. Widegon ter artina mulkigi urwedagsum. 52In Bilatusnai jurgi Yesuna jitagi birigsum. 53Ter wide shugudedtargi kitan wekked garos wide te kulur golbul werro, elgon tedder zol wer tomensinder, undurossum. 54Jihazna ugros ter esum. Wide samtegon tobusum. 55Ecchi Jelilloton tareligon tekki tebaesan, tegi nalw an, wide mine tenna jitagi uskursingi. 56Ecchi wide widergi 56 irsi werigon wide hanuttongi allos samtegi welesossan, sheria weredagin nawre.

Currently Selected:

Luka Enjil 23: XNZ1912

Highlight

Copy