Luka Enjil 24
24
Bag. 24.
1Ama jumana koyallo, fejirki, ecchi irsigon hanuttongi kagrangon tenai tasan. 2Tir elsan kulugi ten agilloton gergijbungon. 3Ecchi tēr torgi Yesuna jitagi elkomnan. 4Tir wide manged haireburangon, ogj owi kadechi ulili weriged tirgodon ta kute tebsan. 5Tir wide sarkeged koigi aridtir obirsan. Ogji wetidirsan: „Ir ma aïbulgi dielin barer akashrun? Ter indomnum. 6Ter imbolossum. Jilewe mine ter irgodon bainsingi, ter elgon Jelillor engon, 7wide wetidirkosingi: ‚Zolna toddogor dan an zoli zenbikolina ichir selimad. Wide bisolitakkin an. Ama ugros toskittir bimbeln an.“ 8Ecchi wide tenna weregi jilossan. 9Wide terton widergi diminde wekkon wide kewidbuli malegongi wetidirsan ta nogel malegi. 10Meryem Majdaliyagon, wide Yuhanagon, wide Meryem Yagubna tinengon, wide ecchi kewidbuligon ishinbuligi ikke wetidirsan. 11Tinna were hiraninai ugnutti galg esum. Wala gijirtidirkomnan.
12Butrus wide imbelligi tegir bodsum. Dured suriye uru nalsum kefeni agudan burangi. Ter wide nogsum, ta nogelged ajibengon.
13Tiddetongon owi man ugrosir medine wekkir talebusan. Urushalimirton gulwa sitinged wariy esum. 14Tenn erigon Emaüs esan. Ittiwrigodongon man ta nogeliged abainsan.
15Tir abaindangon wide ajadlerangon, Yesu tirg abidi awtan tirgodon talebusum. 16Ama tinna misichi tenna iyirarroton kobbusan. 17Ter tirgi wetidirsum: „Ter were minde, ir taleburungon tekked abaindun?“ Tirgon musulburangon tebossan. 18Tiddeton wer widegirtirsum. Tenn erigon Kaliyubas esan. In wetirsum: „Er agude Urushalimir ērre? Wala gijirkomnum tedder in ugrosir ta nogeligi?“ Ter wetidirsum: „Ter minde elon?“ 19Tir wesan: „Yesu Nasirandiged awtakkeli. Ter zol nebiyan buel wide gudrakorel awdiged wide werechiged artin owollo wide gebila malen owollo, 20mine fegirin samli duligon wide annā hākimigon tekki selimossangi diarked wide soligrarked. 21Argon tekki urwedagsun, ter Israelgi bihariren an. In malegon olongu ugros toskansum ta nogsindo. 22Addetongon ecchi weri fejirki tenai jurgi 23tenna jitagi elkomnan. Wide wesan malaikari werigi teddo nalsam an, malaikarigon wetidirsangi tekki aïbun an. Inged ecchi argi hairedagran. 24Wide argodon dalirton weri teg abidi jurgi tir wesan nawre elsan. Ama Yesugi elkomnan.“ 25Ter tirgi wetidirsum: „Wo gabichi, wide a orokelkoni imando nebichi bainsan maleged. 26Komisbuldogor dakomnum odar, wide terin agabir tenna mejidtir bitangi.“ 27Ter wide ugudi Muserton wide nebichi malerton amintidirsum tekked kolibulgi kitabi maler. 28Neja, tekk abidi tallebusan, awtanosingad, ter tennewerti ezenu warigir ajulgirossum. 29Tir wide wetirsan: „Argodon welese. Gu shareyanossum. Wide ugroskon bujusum.“ Ter wide tosum, tirgodon kewdiry an.
30Tirgodon tegos kal wekki arrigon barkos birtos tidirsum. 31Tinna misichi kustakkosrangad tekki iyirossan. Ter wide tinnaiton dabossum.
32Tir ittiwrigodon wesan: „Eleken ann achi anna tuchir argi jugrirkomnan, argodon darbir abainingon wide kitabigi awadihedecchiringon?“ 33Tenna watten mandoton imbelligi Urushalimgir wide targi elsan diminde wekki jameburangon, tirgon tirgodon daligon, 34wide awerangon: „Tirti aleged imbolossum an. Wide Simangi beltirsum an.“ 35Ama tiri awetidirsan tirgodon ta nogelgi darubdogor, wide mine tekki iyirsangi kalgi abirtingon.
36Inged ittiwrigodon abaindangon Yesu tennewertiged tinna seler kute tebos wetidirsum: „Gendar indogochirum.“ 37Sarke wer arir wide jefle newerti wekki nalsam anagsan. 38Ter tirgi wetidirsum: „Ir ma ikke sarkiburun? Wide inn achi ma abaindan? 39Ann ichigon wide ann osichigongi uru nalwe, ai ter ter eringi. Aigi kumi nalwe. Mine newerti kusugon kidtongi komnum, adder anallun nawite.“ 40Ikke weros tenna ichigon osichigongi amintidirsum. 41Wide tiri gurattiged alegredagmendangon wide ajebir daburangon, ter wetidirsum: „Indo innai kallan wer dana?“ 42Tiri wide kare nibbulna guda wekki soke tirsan, wide aselna guda wekki. 43Ter wide arrigi tinn owollo kalsum.
44Wide wetidirsum: „Ahan in teran were ai irgi wetidirkosin, ai elgon irgodon daringon, aiged bajbul male, Musena sheriar wide nebichir wide zaburrogon, bitimen an.“ 45Ter wide tinna erigki kussum, kitabki fehmew an. Wide wetidirsum: 46„Ikke teran bajbun, komisbuldogor odar dan wide dios ugros toskittir bimbelingi. 47Wide tenn eriged bibeshirtakkin tobaged, zenbichina wakerarna jiradilo, umachi malen barer, Urushalimirton uguded. 48Irgon terina shahadi ter erun. 49Ahan aigon abo wetirdisingi irgi bishintidirrin. Ama irgon Urushalimirton warianmenwe, gudra dogondigi degedrunbokon.“
50Wide bochigir osir Betanigir attaïr tenn ichigi soke barkosirsum. 51Ter tirgi abarkeiringon tinnaiton wakerarrigi simegir kujossum.
52Tir wide sejdossir Urushalimgir widossan guratti dul wekked. 53Wide watti malegi jaman tur artigi sebiheka mejiderangon agsan.
Bajsum.
Currently Selected:
Luka Enjil 24: XNZ1912
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1912.
