Hanana Enjil 13

Bag. 13.

1Ama, Yesu basan owollo iyired tenna saa bidasingi, in alamirton tenn abogir nogiry an, tendichi alamir dolirsinigi kemalbokon dolirsum.

2Ashana wattigi shetan Yahuda, Simanna tod, Isharyuti, tekki biselimenna tirtina ār tosum. 3Yesu iyirbungon timbab haja malegi tenna ichin barer undursingi wide ter artinaiton bel ta artinaigir birejaengi, 4ashan dogorton kute tebos, wide tenna kadechigi dukos, wide kadena guda wekki amajessum. 5Terin aharro essigi dadi werro bog undros wide ugudisum tenna hiranina osichigi ewirri an. Kade tekked amajebusingedgon ewoska asowigrirsum. 6Wide tasum Siman Butrusnai. Man wetirsum: „Wo anna tirti, er ann osichigi bewna?“ 7Yesu rude wetirsum: „Er eleken iyirmunum ai aawringi. Ama inin aharro biyirkanin.“ 8Butrus tekki wetirsum: „Kidir er anna osichigi bewmunum!“ Yesu rudetirsum: „Ai on enn osichigi ewmenkirin, er aigodon bagid wekki komnum.“ 9Siman Butrus wetirsum: „Wo anna tirti, anna osichi agudegmunum, ama anna ichigon wide urkon.“

10Yesu tekki wetirsum: „Zol bowedel echel wekki hajemnum, tenna osichina ewark anmenkin, ter kamil tahar engad. Won irgon taharim, ama ir malemnun.“ 11Mine ter iyirbusum tekki biselimelgi. Inin joro ter wesum: „Ir male taharimnum“ an. 12Tinna osichigi ewosirsinn aharro, wide tenna kadechigi ar undred wide tegos, tirgi wetidirsum: „Ir fehmesure ai irged awsingi? 13Ir aig awerun ‚Arifm’ an widegon ‚Tirtim’ an, inna weregon adelum, mine aigon ikke burin. 14Ter on ai, arif wide tirti eringon, inna osichigi ewkokrin, indogochir wejbossum ittiwrina osichigi ewar. 15Mine ai irgi metel wekki mugtidirsim, ai irged awsin nawre irgon awrungir wer wekked. 16Aleged, aleged irgi wetidirrin, nugud wekkon tenna tirtin dogor dulmunum, wala ishinbul wer tekki ishineldogor. 17Ir on ingi iyirkrun, iri barkeburun, ir on tekki awkrun. 18Won ai ir malen dogor awemnim. Ai iyirrin ai barsinna tirtigi. Ama kitabki timer an: ‚Zol aigodon kalegi akalil tenna osigi aig abidi sokesum.’ Elekenton irgi awetidirrin, tamenin owollo, 19mine tan kello amnerunna joro ai ter ter eringi. 20Aleged, aleged irgi wetidirrin, zol ai ishindinna tirtigi geblel aigi geblen. Aigi geblelgon aigi ishinelgi ageblen.“

21Ingi Yesu werosirgi tennewertir gabra werro toros shehede wesum: „Aleged, aleged irgi wetidirrin, iddeton wer aigi biselimen.“ Hirani ingi gijred ittiwrigi aürusan. 22Wide hayirtakkibusan, nin dogor ter ingi wesingi. 23Yesuna ogirrogon hiranirton wer tekyebusum. Ingi Yesu adolsum. 24Siman Butrus ing abidi mile tekki wetirsum: „Tekki isig, nin dogor ter awengi.“ 25Man wide Yesun ān dogor tekyos wide wetirsum: „Wo anna tirti, ni terre?“ 26Yesu rudesum: „Ter man zol ai agilna eyegrarki tabetirrinna tirti teran.“ Wide tomattigi tabos Yahuda Simanna tod Isharyutigi tirsum. 27Tomattin aharro shetan tedder tosum. Yesu wide wetirsum: „Er bawingi shutte awos.“ 28Wekkon tekkodon aglirton fehmekomnum minin joro ikke tekkodon abainsingi. 29Duguna dadi Yahudagodon esinged, tiddeton weri tinnergir wesan Yesu tekki awetirsingi: „Korena joro abirigrungi jan“ an, wala: „Hajebuligi haja wekki tidir an.“ 30Man tomattigi aressinna wattigi shuttan belsum. Ugw egongessum.

31Ter belossinn aharro Yesu wesum: „Eleken zolna tod mejidtakkossum. Wide artigon tedder mejidtakkossum. 32Won arti on tedder mejidtakkoskokin, artigon tekki tenna kidir bimejidekanin, wide gowan bimejiden. 33Wo anna affichi, ai elgon watti urtuna wekki irgodon eri. Ir aigi bikashkandun. Won Yahudichigi wetidirsin nawre: Ai bujurinn agarro ir eske bitamnun’ irgi eleken ai awetidirrin. 34Sheria ēr wekki ai irgi atidirrin: ‚Ittiwrigi dolw an.’ Ai irgi dolsin nawre, ikke irgon ittiwrigi dolwe. 35Inged male biyirran ir anna hiraniy erungi, idder ittiwrina dole dakin.“ 36Siman Butrus wetirsum: „Wo anna tirti, saïgir er ajun?“ Yesu rudetirsum: „Ai ajurinn agarro er eleken eskergi aigi bitebaemnum. Ama er aigi bitebaekanin, aharro.“ 37Butrus tekki wetirsum: „Wo anna tirti, ai ma ekki eleken eskergi atebaemendin? Ai annewertigi enn agarro buskurrin.“ 38Yesu rudetirsum: „Er ennewertigi anna joro buskurna? Aleged, aleged ekki wetirrin, darbadn ondi kililemeningon, er aigi gir toskigi bigubkanin.“

Currently Selected:

Hanana Enjil 13: XNZ1912

Highlight

Copy