Hanana Enjil 11

Bag. 11.

1Odil wer dasum. Tenn erigon Lezar esan. Ter neja Betanirton esum. Meryemgon wide tinisi Martagonna neja ter esum. 2In Meryemgon Yesugi eter wekked numegrel wide tenna osichigi tenna sirked komsel ter esum. 3Lezar odilgon timbes ter esum. Tinisichi owingari Yesug abidi ishin wesan: „Wo annā tirti, ahan er adolin odin.“ 4Ingi gijredirgi Yesu wesum: „In odar diardimnum. Ama artina mejidadna jororum. Wide artina tod tekked bimejidtakkin.“ 5Yesugon Martagi adolsum, wide tinisigon wide Lezarkongi. 6Odingi gijredirgi kewidsum ter dasinn agarro ugros owigi. 7Terin aharro tenna hiranigi wetidirsum: „Imbelwe, Yahudiyegir widerun.“ 8Hirani tekki wetirsan: „Wo rabi, eleken Yahudichi akasshan ekki rijmerangi. Widegon mando bijuna?“ 9Yesu rudesum: „Eleken ugros saa diminde owimnu? Zol wer ugrostur talekin, kidir aatremnum, mine in dunyana dawigi analingad. 10Ama ugugi talekin, biatren, mine dawina kid tedder dameningad.“ 11Ingi werosirgi terin aharro wetidirsum: „Lezar anna tiwri nerossum. Ama ai jurgi bagisrin.“ 12Hirani tekki wetirsan: „Wo anna tirti, ter on nerbukin, bimbelkanin.“ 13Ama Yesu awesum tenna diarki. Tirgon fehemesan nalundigir awesingi. 14Yesu kemallo wetidirsum beyingir: „Lezar diossum. 15Ama ai agureri inna joro, ai mando mensingi, ir amnerunna joro. Elekengon taloswe tekk abidi.“ 16Tuma, Tawam an aweran, hirani tenna tiwrichigi wetidirsum: „Taloswe, argon tekkodon dirunna joro.“

17Yesu targi elsum ugros kemsankon tēr tosindo. 18Betanigon Urushalimna igitum, tinna barer shebahked mil diminde dijkiri dan. 19Yahudichirton digrichi weri takosan, Martagon wide Meryemnaigon, timbesir tabeirw an. 20Marta Yesu tasingi gijressinna kello tekki imbel ju abidisum. Ama Meryem kar agingon welesesum. 21Marta Yesugi wetirsum: „Wo anna tirti, er on inder ekokin, ambes bidikomnum. 22Ama elekengon iyirrin er artinaiton birgin malegi arti ekki bitiringi.“ 23Yesu tekki wetirsum: „Imbes bimbelkanin.“ 24Marta tekki wetirsum: „Ai iyirrin ter bimbelkaningi imbelarna ugros kemaldir.“ 25Yesu tekki wetirsum: „Ai imbelar ter erin wide ayarkon. Aiged amnel dikingon bayin. 26Wide aïbul malegon, aiged amn ekin, diarki dimen bokon nalmunum. Inged er aamnena?“ 27Tekki wetirsum: „Eyo, wo anna tirti, ai amnossim er komisbul, artina tod, alamir bital, ter engi.“ 28Ingi werosirgi bijurgi Meryem tinisigi bokeged uwetirsum. Wide wetirsum: „Arif bidasum. Widegon ekk aüwen.“ 29Man gijredirgi shutte imbelligi tennai tasum. 30Ama Yesu elgon nejar tokomnum. Ter elgon Marta tekki abidisinn agarror esum. 31Yahudichigon tekkodon kar dareli, taberu an, Meryemgi shutte imbelsingi wide bochigir belsingi nalos tekki tebaesan, tinnewertichir iros ten dogor jurgi boyin an. 32Meryem Yesu dasinn agarro bidargi wide tekki nalos kurtichin dogor digirsum tenn osichinai. Wide wetirsum: „Wo anna tirti, er on indor ekokin, ambes bidikomnum.“

33Yesu ter aoyingi nalos wide Yahudichi tekkodon tareligi aoirangi nalosir, tenna kidir newertigi undros wide gabra wer tekki aressum. 34Wide wesum: „Saïr tekki uskursure?“ Tekki wetirsan: „Wo anna tirti, targi nal.“ 35Yesu oisum. 36Yahudichi wesan: „Nalwe saï kottekki tekki adolsingi.“ 37Wide tiddeton weri wesan: „In aba dugrina misichigi kusel eskergi ingon diarroton bagismunu?“ 38Owittiged Yesu newertigi undur osirgi tenai tasum. Tegon magaray esum. Wide kulu wekked kobbusum. 39Yesu wesum: „Kulugi sokoswe!“ Marta, dibulna tinisi, tekki wetirsum: „Wo anna tirti, siyos mensin. Ugros kemsankon tēr dabun.“ 40Yesu tekki wetirsum: „Ai ekki wetirkomni: Er on amnekin, artina gudragi binaln an?“ 41Kulugi sokossan. Wide Yesu tenna misichigi dogogir sokergi wide wesum: „Wo abo, ai ekki shukrerin aigi gijirdensingi. 42Aigon iyirsim er watti maler aigi agijirdeningi. Elekengon in jema tebilna joro wesim, amn ew an er aigi ishinsingi.“ 43Ingi weros hisi dul wekked uwesum: „Wo Lezar, bochigir bel ta!“ 44Diel bel tasum, tenna ichigon wide osichigon digburangon sheriti weriged, wide tenna koigon mahrama wekked garbungon. Tirgi Yesu wetidirsum: „Kusoswe. Wide taler anwe.“

45Yahudichirton digri wer Meryemnai tarelirton Yesu awsingi naled tekked amnesan. 46Ama tiddeton weri Farisichinai jurgi wide wetidirsan Yesu awsinigi. 47Teddo fegirina samli duligon wide Farisichigon jame tegos wesan: „Mingi awrun terre in zol aya ukkottekki aawilgodon? 48Ar on in amurro mugkurun, male tekked bamneran. Wide Rumanichigon targi annā esheigon wide anna gebilagon bidukedran.“ 49Tiddeton wer wetidirsum, tekkon Kayafa, fegirina samil dul ter esum manin jengi: „Iri wekkongi aïyirmunun. 50Wala jilemnun innai gen engi zol wer dingi gebilana joro, gebila male disindogor.“ 51Ingi ter tennewertirton wekomnum. Ama manin jengi fegirina samil dul ter esinged nebyesum Yesuna jihar, ter umana agarro diarro tebsingi. 52Wala in uma aguden joromnum. Ama artina affichi gulibuli malen jiradilo wekkirri an. 53Manin ugrosirton shuresan tekki berarki.

54Yesugon owittiged Yahudichina barer beyingir talekomnum. Teddoton talosirgi eshei jebelna awtindir jusum, medine Efraïm an awerander. Teddo tenna hiranigodon welesossum.

55Yahudichina basana koregon awt esum. Nejachigon digrichi weri kujsan Urushalimgir koren owollo, tinn achigi tahareru an. 56Yesugi kashka wide tinna barer awesan jaman tur tebrangon: „Mingi ametilerun? Ter aba korer bitamnum?“ 57Widegon fegirina samli duli Farisichigon amur wekki ossan, ter on zol wer ter dann agarki iyirkin, amningi, tekki morogirw an.

Currently Selected:

Hanana Enjil 11: XNZ1912

Highlight

Copy