Hanana Enjil 10

Bag. 10.

1„Aleged, aleged irgi wetidirrin, zol on egedina zerubana agilged tomenil, ama agar echel wekked dari tol, man zol amagilum, wide magasum. 2Ama zol agilged tol, ter egedigi aïwil teran. 3Inin joro bawab zeruhana agilgi akusin. Wide egedi tenna hisigi agijirran. Wide tennewertin egedigi tinn eriged aüweirin, wide bochigir aosirin. 4Tennewertin egedigi aosirinn aharro tinn owolged atalen wide egedigon tekki atebaeran, tenna hisigi iyirburangad. 5Ama garibki atebaemnan. Tennaiton adosran, mine garibna hisigi aïyirmendangad.“ 6In metelgi Yesu tirgi wetidirsum. Ama tiri fehmekomnan minged tirgodon abainsingi.

7Yesu owittiged wetidirsum: „Aleged, aleged irgi wetidirri, ai anna kidir egedina zerubana agil ter erin. 8Ann owollo tareli male tiri magasim wide akabkilim. Ama egedi tirgi agijirtidirminan. 9Ai zerubana agil ter erin. Aiged tolna zol bihalistakkin. Wide biton. Wide bibelin. Wide iwarkon belin. 10Magas atan, magiry an, wide gojiry an, wide beri an. Ama ai tasim, ayarki tidirri an, wide ayarkon tidder zider an.“

11„Ai anna kidir aïwil sere ter erin. Won aïwil sere tennewertigi aewrosin egedina joro. 12Ama zol keraï, aïwilmenil, wala egedi tendichimenil, jeleg tekk abidi talebungi nalkin, egedigi mugos adososin. Wide jeleg egedigi kabkika agulirin. 13Keraï adosin, keray engad. Wala egediged abalemnum. 14Ama ai aïwil sere ter erin. Wide anna kidichigi aïyirirrin. 15Won ann egedigon aigi aïyirran, abo aigi aïyirin nawite, aigon ikke abogi aïyirrin. Aigon ann ayarki aüskurrin egedina joro. 16Egedi echeli werigon korin. In zerubartonimnan. Ingugon battaïrrin. Anna hisigon bigijirran. Wide malegon kude werandan aïwil werna togor. 17Inin joro abo aigi adolin, ai ann ayarki aüskurringad, wide owittigedgon arrinna joro. 18Wekkon eske annaiton ayarki barmunum. Ai annewertirton aüskurrin. Wide gudragi korin uskrarked widegon ararked. In wesadti abonaiton arsim.“

19Owittiged bagar wer dukisum Yahudichin barer, in werena joro. 20Tiddeton digrichi weri wesan: „Tedder shetan wer agin“ an, wide: „Ter asawrin an. Ir ma agijirtirrun?“

21Echeli weri wesan: „In were shetan dabuln iddimnum. Shetan wer aba eskergi dugurna misichigi bikusna?“

22Urushalimirgon jamana erkirarna kore ter esum. Tekkon shiter esum. 23Teddo Yesu tale juka tasum jaman tur, Solumna gabwin togor. 24Yahudichi seler undred wide wetirsan: „Sittagbokon er anna newertichigi soligredagin? Er on er komisbul ter ekin, argi beyingir wedecchir!“ 25Yesu rude wetidirsum: „Irgi wetidirsim. Won iri aamnemnun. Awdi ai aawrini abon erir, tiri aigi ashehededendan. Ama iri aamnemnun. 26Mine iri anna egedirtonmendungad, irgi wetidirsin nawre. Ann egedi anna hisigi agijirran. 27Wide aigi atebaeran. Aigon tirgi aïyirrin. 28Wide aigon tirgi ayar dimendigi atidirrin. Wala tiri bidabminan. Wala zol wer ann irton bikabkirmunum. 29Abo tirgi aigi denel malen dogor dulum. Wala zol wer eskergi abon irton bidukirmunum. 30Aigon abogon wer erun.“ 31Yahudichi kulwigi injisan owittiged, tekki tin jomirw an. 32Yesu rudetidirsum: „Awdi adeli digrichi werigi irgi abonaiton amintidirsim. Awid edi saïna joro tiddeton aigi arejmerun?“ 33Yahudichi rude wetirsan: „Ar ekki awid adel werna joro arejmemnun, ama enna jedifadna joro. Er enna kidir zol engon en newertigi aartigrin.“ 34Yesu rude wetidirsum: „Inna sheriar bajbumnu: ‚Ai wekomni irgi artichim an?’ 35Ter on mangugi artichim an wekokin, tenna weregi wetidirsinna tirtichigi, — wala bajbulna kusar emkinemnum,— 36won abo gadisesingi wide alamgir ishinsingi, tekki wetirrua: ‚Er ajedifen’ an, ai weringad: ‚Artina tod terrim’ an? 37Ai on abona awidti aawmenkirin, aiged amnemenwe. 38Won ai on aawkirin, aiged amnemenwe. Ama awdi ai awrinigi amnewe, ir iyirrunna joro wide amnerunna joro abo adder engi wide aigon abor eringi.“ 39Owittiged birigsan tekki morograrki. Ama ter tinna ichin barerton bolossum.

40Wide Urdunin jerkir wawsum man agar Hana owollo akidirsinder. Wide teddo welesesum. 41Tekk abidi digrichi weri targi wesan: „Hana aya habbekki awkomnum. Ama. Hana inina jihar wesin male aley esum.“ 42Digrichi weri tekked amnesan man agarro.

Currently Selected:

Hanana Enjil 10: XNZ1912

Highlight

Copy