JOB 42

Job pandarishcata Diosman huillashcamanta

1Jobca Mandac Diostaca:

2«Ñucaca cantaca tucuita

ruhuac cashcatami yachani.

Can imata ruhuanata yuyarishpaca

tucuitami ruhuangui.

Canmanca mana ruhuaipacca

imapish mana tiyanchu.

3¿Pitac alli yachachishcacunata

mana entendishpa pandachisha

nircayari?

Ñucaca imata mana entendishpa

rimarinillami.

Chai rimashcacuna ñucaman

sumaimana cacpipish,

ñucaca mana entendircanichu.

4Cunanca canhuanmi rimasha nini.

Ñuca tapushcata cutichingapac

alli uyai nircanguimi.

5Can rimashcataca

ñuca ringrillahuanmi uyarcani.

Shina cacpipish cunanca

ñuca ñahuihuantacmi ricuni.

6Chaimantami yallita llaquirishpa,

ñuto allpapi, uchupapi

tiyarini» nirca.

Mandac Dios Jobta bendiciashcamanta

7Mandac Dios Jobta tucuita rimashca quipami, temanitapuramanta Elifazta rimashpaca: «Cancunaca ñucata servic Job shina ñucamantaca mana allichu huillacunguichic. Chaimantami canhuanpish, caishuc ishcai runacunahuanpish yallita piñarini. 8Cunanca canchis becita, canchis carnero ovejata cancunamanta ñucaman cushpa, tucui rupachichun ñucata servic Jobman cugrichic. Ñucata servic Jobmi cancunamanta ñucata mañanga. Pai mañashcatami ñucaca uyasha. Pai mañacllapimi, cancunataca ñucamanta mana allita huillashca cacpipish, mana yallita llaquichisha. Cancunaca ñucata servic Job shinaca mana huillarcanguichicchu» nirca.

9Shina nicpimi, temanitapuramanta Elifazpish, suhitapuramanta Bildadpish, namatitapuramanta Zofarpish Mandac Dios mandashca shina ruhuarca. Chaimantami Mandac Diosca Job mañashcata uyarca.

Job cutinllatac alli causaita callarishcamanta

10Job paipac ricsishca quimsa runacunamanta mañashca quipami Mandac Diosca paimanca ñaupa charishcamanta ishcai cutinhuan yallita bendiciarca. 11Chai quipami paipac huauquicunapish, panicunapish, tucui ñaupa ricsishcacunapish paihuan micungapac huasiman shamurcacuna. Mandac Dios paita llaquichishcamantami paicunapish llaquishcata ricuchingapac, cushichingapacpish shamurcacuna. Tucui paicunami cullquitapish, curi sortejascunatapish caishuc chaishuc cungapac apamurcacuna.

12Mandac Diosca Jobpac tucuri punzhacunapica punta bendiciashcata yallimi Jobmanca bendiciarca. Chaimantami paica chunga chuscu huaranga ovejata, sucta huaranga camellota, huaranga yunta huagrata, huaranga burrota charirca. 13Canchis churicunatapish, quimsa ushicunatapish charircami. 14Punta ushitaca Jemimatami shutichirca. Quipa ushitaca Cesiatami shutichirca. Shinallatac quipa ushitaca Keren-hapuctami shutichirca. 15Jobpac ushicuna shina sumac huarmicunaca mai llactapipish mana tiyarcachu. Jobca paicunamanca paicunapac turicunaman shinallatacmi herenciata curca.

16Job alliyashca quipaca patsac chuscu chunga huatatami causarca. Jobca paipac churicunatapish, nietocunatapish, charishpami, chuscuniqui mirai huahuacunatapish ricurca. 17Paica unai huatacunata causashpami, yallita yuyacyashpa huañurca.

Currently Selected:

JOB 42: QCA10

Highlight

Copy