JOB 41
41
1¿Canca Leviatán animaltaca
anzuelollahuan llucchi pudinguichu?
¿Paipac callutapish huascahuan
huatai pudinguichu?
2¿Singa jutcucunapipish huascata
pasachi pudinguichu?
¿Jazhatapish jutcushpa fierrota
churachi pudinguichu?
3¿Paica ama llaquichichun
canta mañac shamungachu?
¿Cantaca cuilla rimaicunahuan
mañangachu?
4¿Tucui causaipi canta servingapac
canhuanca ari ningachu?
5¿Paihuanca zhutacunahuan shina
pucllai pudinguichu?
¿Cambac huarmi huahuacuna
pucllachun huatai pudinguichu?
6¿Paitaca randiccunahuan negociota
ruhuai pudingachu?
¿Randiccunapura chaupinacui pudingachu?
7¿Paipac carataca cuchillohuan
piti pudinguichu?
¿Paipac umataca challuata japina
fierrohuan piti pudinguichu?
8Paipac uma jahuapi cambac
maquihuan tuparishpa, paihuan
macanacushcataca yuyaricunguillami.
Cutinca mana tuparisha ninguichu.
9Pi paita ricushpaca
mancharishpami yuyaita chingachin.
Pipish paita japisha nishpaca
yangallatami yuyan.
10¿Pitac paitaca ricchachi pudinga?
¿Pitac paipac ñaupapi
shayari pudinga?
11Ñuca cutichichunca,
¿pitac ñucaman imata curca?
¡Cai pachapi tucui
ima tiyashcacunaca ñucapacmi can!
12Pai ima shina cashcatapish,
paipac podermantapish,
mana manchac cashcatapish
mana upalla saquirishpami huillasha nini.
13¿Pitac paipac aicha carataca
anchuchi pudingayari?
¿Pitac paipacman chayashpa
ishcai frenota churangayari?
14Paipac shimi muyunditaca manchana
fino quirucunami.
Chashna cacpica,
¿pitac paipac shimitaca
pascai pudingayari?
15Paipac huasha lomopish
escamacunata quichquita sirashpa
churashca shinami.
16Huairapish maita mana yaicuipac
chaipurata yallita
quichquita churashcami.
17Chaipura sumacta llutashca,
maita mana chicanyaipacmi.
18Pai jachic nishpaca
achic nicuc ninatami llucchin.
Paipac ñahuicunaca inti llucshimuc
shinami achicyachin.
19Paipac shimimantaca
culun nicuc ninapish,
jaguin nicuc chispaspish llucshinmi.
20Paipac singamantapish,
timbucuc mangamanta
shinami cushni llucshin.
21Paipac samaillami
carbonta rupachin.
Shimimantaca culun
nicuc ninami llucshin.
22Paica cungapimi
yallita fuerzata charin.
Paita ricushpaca manchaillatacmi
yuyaita chingachin.
23Paipac aichapish
rumiyashca shina maita mana
cuyuripac yallita sinchimi.
24Paipac shunguca
cutana mama rumi shina sinchimi.
25Pai jataricpica yallita
sinchicunapish, manchaillatacmi
yuyaita chingachishpa callpancuna.
26Espadahuanpish, lanzahuanpish,
flechahuanpish,
fierro churanahuanpish paitaca
mana pi huañuchi pudinchu.
27Paimanca fierroca
ucsha shinallami.
Broncepish ismushca
caspi shinallami.
28Flechacunapish paitaca
mana manchachinchu.
Huaracahuan shitacpipish,
rumica ucsha shinallami japin.
29Martillohuan huactashcapish
paimanca shicshic shinallami.
Espadacunata chilin nichicpipish
paica asinmi.
30Paipac cuerpoca puntasapa
fierrocuna churashca shinami.
Pai purishca pambacunaca
jutcu jutcumi saquirin.
31Mama cucha ucutapish
mangata timbuchic
shinami timbuchin.
Shinallatac jambiccunata
tandachishpa timbuchic
shinami ruhuan.
32Jatun mama cuchata
purishpapish, puscuta shitashpami
yuranlla pambata saquin.
33Cai animal shinaca
imapish mana tiyanchu.
Imatapish ama manchachun
ruhuashcami can.
34Mai jatun tucushcacunatapish
mana manchanchu.
Tucui sinchi animalcunata
yalli sinchimi can» nirca.
Currently Selected:
JOB 41: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.
