HABACUC 2
2
1Cuidac runa shinami chaparacusha.
Torre jahuapimi
chapashpa shayacushalla.
Ñuca caparishpa mañashcata
uyangacamanmi chaparacushalla.
Habacucman Mandac Dios huillashcamanta
2Chaimantami Mandac Diosca:
“Muscuipi shina ricurishcata
rezanallata rumi tablacunapi
quillcai.
3Muscuipi shina ricushcaca
tauca huatacunata
mana pactashpapish,
mana llullangachu, pactangatacmi.
Mana utca pactacpipish
chaparacuilla, pactangatacmi,
mana unayangachu.
4Millai shungu runaca
jatun tucunllami.
Ashtahuanpish cashcata
ruhuac runaca
crishcamantami causanga” nirca.
5Jatun tucushca vino shinami
llaquiman apan.
Seol pascaric shinami
imatapish mashcanga.
Huañui shinami mana shaicunga.
Shinallatac paipaclla cachunmi
tucui llactacunata munan.
Chashna jatun tucushca
runaca mana causangachu.
6¿Manachu shuctac llactacuna
yuyarina rimaicunahuan,
paita burlashpa cantanga?
Chai llactacunaca:
“¡Aij, manapish
quiquinpac cashcahuan
mirachiccunalla!
¿Ima punzhacamantac
prendacunata japishpa
montonacungalla?” ningami.
7Can llaquichishca gentecunaca
cungaillami canta
llaquichingapac jataringa.
Paicunaca canta llaquichishpami
can ima charishcacunata quichunga.
8Tauca llactacunamanta imacunata
quichushcamantami
shuctac gentecunapish can ima
charishcacunata quichunga.
Huañuchishpa, yahuarta jichashpa
llactacunata, pueblocunata
quichushcamantami
chai llactacunaca tandanacushpa,
can charishcacunata
quichushpa apanga.
9¡Canca ashtahuan
charina yuyaihuanmi
shuhuashpa huasipi
jundachircangui!
¡Llaquimanta miticungapacmi
huasitaca pipish mana
chayaipac jahua altopi
churangui!
¡Aij, imachari tucungui!
10Achca gentecunata
pandachishpami,
canllatac pandarishcangui.
Tucui chaicunata ruhuashpami,
cambac huasitaca
pingaipi churarcangui.
11Chaimantami pircashca
rumipish, huasipi churashca
vigapish cambac contra caparinga.
12¡Canca gentecunata
huañuchishpami
pueblota shayachircangui!
¡Mana allita ruhuashpami
pueblota callarichircangui!
¡Aij, imachari tucungui!
13¿Manachu tucuita Mandac Diosca
gentecuna imata ruhuashcataca
ninapi rupachic shina tucuchinga?
Llactacunapi causaccuna imata
ruhuashpaca yangami shaicunga.
14Mama cucha yacuhuan
junda cac shinami,
cai pachapi causaccunaca
Mandac Diospac poderta
ricsina yuyaihuan canga.
15¡Canca ubiachishpami
machachingui!
¡Vinohuan machachishpami
pingaichingui!
¡Aij, imachari tucungui!
16Canca alli nishca
canapac randica,
mana alli nishca
pingaichishcami cangui.
Canpish ubiashpa,
lluchulla tucuiyari.
Mandac Diospac alli
lado maquipi tiyacuc
vasomantami canmanca ubiachinga.
Chashna ubiachishpami,
can alli nishca runataca
cumurichinga.
17Líbano urcuta
llaquichishcamanta,
sacha animalcunata
huañuchishcamanta,
chaipi causaccunata huañuchishpa
yahuarta jichashcamanta,
paicunapac allpata shuhuashcamanta,
pueblocunatapish,
chaipi causaccunatapish
shuhuashpa llaquichishcamantami
cantapish llaqui japinga.
18Artesano ruhuashca diosca,
¿imapactac valin?
Yacuyachishpa ruhuashca diosca,
¿imapactac valin?
Chai diosca llullamanmi apan.
Imamanpish riccha, mana rimaric
dioscunata ruhuacca,
¿ima shinatac chai dioscunapi
shunguta churanga?
19¡Canca caspi diostami:
“Ricchariyari” ningui!
¡Mana rimac rumi diostami:
“Jatariyari” ningui!
¡Aij, imachari tucungui!
¿Chai diosca imatapish
yachachi pudingachu?
Chai diosca jahuallata curihuan,
cullquihuan tapashcami.
Samaitapish mana charinchu.
20Ashtahuanpish Mandac Diosca
paipaclla chicanyachishca
huasipimi causan.
¡Cai pachapi tucui causaccuna
paipac ñaupapi upalla caichic!
Currently Selected:
HABACUC 2: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.
