HABACUC 3
3
Habacuc Diosta mañashcamanta
1Dios ima nishcata huillac Habacucca llaquillata cantashpami, Diosta mañarca.
2Mandac Dioslla,
can rimashcata
uyashpaca mancharircanimi.
Mandac Dioslla,
can ruhuashcacunata
ricushpa mana amirinimi.
¡Ñaupa huatacunapi ruhuashcata
cunan punzhacunapi ricuchiyari!
Can piñarishca
cashpapish llaquiyari.
3Diosca Temán
llactamantami shamun.
Jucha illac Diosca
Parán urcumantami shamun.
Paipac sumaimana achicca
jahua pachatami tapan.
Cai pachapica paita
alabashcami jundan.
4Paica achic nicuc luz shinami.
Paipac maquimantaca
relampa achicyachicmi llucshin.
Chai chaupipica paipac fuerzami
pacalla tiyacun.
5Paipac ñaupataca
huañuchic ungüimi rin.
Paipac chaquimantaca
rupacuc ninami llucshin.
6Pai shayaricpica,
cai pachami chucchun.
Pai ricucpica,
llactacunami manchan.
Ñaupa huatacunapi tiyac
urcucunapish tuñirinmi.
Lomacunapish urmanmi.
Paipac ñancunaca huiñaicamanmi.
7Cusán llacta carpa huasicunaca
llaquilla cactami ricuni.
Madián llacta carpa
huasicunapish chucchunmi.
8Mandac Dioslla,
¿callpac yacucunahuanchu
piñarircangui?
¿Canca jatun yacuhuanchu
nina japiric shina piñarircangui?
¿Cambac caballocunapi,
cambac mishana
carretacunapi tiyarishpaca,
mama cuchatachu llaquichigringui?
9Cambac arcopish allichishcami.
Flechacunapish huacaichishcami.
Yacuhuanmi huaicu huaicuta
ruhuarcangui.
10Canta ricushpaca
urcucunapish mancharircami,
yacu jundashcapish yallircami.
Manchana jatun
jutcupish caparircami.
Mama cuchapish jahuata alzarircami.
11Cambac flechacunaca
achicyachinmi,
cambac achic nicuc
lanzapish ricurinmi,
Intipish, quillapish shayarinmi.
12Canca yallita piñarishpami,
cai pachataca sarurcangui,
shuctac llactacunataca
nina japiric shina
piñarishpami sarunacurcangui.
13Canca acllashca llactata
cacharichingapac,
aceitehuan cahuishca
jatun mandacta
quishpichingapacmi llucshircangui.
Canta mana manchac runapac
huasi catataca urmachircanguimi.
Callari rumicuna ricuringacamanmi
tucui urmachircangui.
14Soldadocunataca paicunapac
flechacunallahuantacmi
huañuchircangui.
Paicunaca piñarishpami
acapana huaira shina
caita chaita shic-huanata yuyarca.
Paicuna imatapish
mana charic runata
pacalla llaquichic shinami,
jatun tucushpa
llaquichinata munarca.
15Mama cucha jahuatami,
caballocunapi puscuta
shitashpa purircangui.
16Chaita uyashpaca,
ñuca shungu mancharcami.
Rimacta uyashpaca,
ñuca shimipish chucchurcami.
Ñuca tullucunapish
ismucuc shinami tucurca.
Ñuca changacunapish chucchucurcami.
Chashna cashpapish
ñucanchicta llaquichiccunata
llaquichi punzhatami
ñucaca casilla shuyacuni.
17Higo yuracuna
mana sisacpipish,
uvas yuracunapi grano
mana tiyacpipish,
olivos mana pucucpipish,
allpacuna mana cucpipish,
oveja manada mana tiyacpipish,
vacacuna corralpi
mana tiyacpipish,
18ñucaca Mandac Dios-huanmi
cushicusha.
Quishpichic Mandac Dios-huanmi
yallita cushicusha.
19¡Mandac Diosca ñuca jarcarina
sinchi torre shinami!
Paica ñuca chaquicunata
tarugapac chaqui
shinata ruhuashpami,
jahua urcucunata purichinga.
Currently Selected:
HABACUC 3: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.
