GÉNESIS 28

1Shina nicpimi, Isaac Jacobota bendiciashpaca: «Cai Canaán llactapi causac huarmicunahuanca ama cazaranguichu. 2Padan-aram llactapi causac cambac mamapac taita Betuelpac huasiman ri. Chaipi cambac mamapac huahua Labanpac ushicunamanta maijanhuan cazarangui. 3Imatapish ruhuaclla Dios canman bendiciashpa, achca llactacuna tucungacaman cambac huahua huahuacunataca achcata mirachichun. 4Cai ñucanchic pozashpa causacuc allpata Dios cuchun. Cantapish, cambac huahua huahuacunatapish Abrahamta bendiciashca shina bendiciachun. Cai allpataca Diosmi Abrahamman cusha nirca» nirca.

5Chashnami Isaacca Jacobotaca Padan-aram llactaman cacharca. Chaimantami arameopuramanta Betuelpac churi Labanpac huasiman chayarca. Labanca Rebecapac turimi carca. Cutin Rebecaca Esaupac, Jacobopac mamami carca.

6Esauca Isaac Jacobota bendiciashcatapish, Jacobohuan cazarachingapac Padan-arammanta solterata apachun cachashcatapish, shinallatac: «Canaán llactapi causac solteracunahuanca pacta cazaranguiman» nishcatapish, 7Jacobo paipac taita mamata cazushpa, Padan-aramman rishcatapish yacharcami. 8Shinallatac Esauca paipac taita Isaac Canaanmanta solteracunata mana ricunayachishcatapish yacharcami. 9Chaimantami Abrahampac churi Ismaelpacman rishpa, paipac ushi Mahalat solterahuan cazararca. Mahalatca Nebaiotpac panimi carca. Esauca Canaanmanta huarmicunata charishca jahuami, paihuanpish cazararca.

Bet-elpi Dios Jacoboman ricurishcamanta

10Jacobo Beersebamanta llucshishpaca, Harán llactamanmi rirca. 11Ña inti tigranatami shuc pambaman chayashpa, chaipi sueñurca. Chaipimi shuc rumita japishpa, saunata ruhuashpa, sueñungapac siririrca. 12Shina sueñucushpami, pambamanta jahua pachacaman shuc escalera shayacucta muscurca. Chai escalerataca Diospac angelcunami huichicucurca, shinallatac uricucurcapish. 13Shinallatac Mandac Dios chai escalera jahuamantaca: «Ñucami cambac taita Abrahampac, shinallatac Isaacpac Mandac Dios cani. Can sueñushpa siricuc allpataca canman, shinallatac cambac huahua huahuacunamanmi cusha. 14Cambac huahua huahuacunaca ñuto allpa shinami, achcata miraringa. Jahuamanpish, uramanpish, inti llucshina ladomanpish inti tigrana ladomanpish rishpami, mirarishpa causangacuna. Canmantapish, cambac huahua huahuacunamantapishmi tucui cai pachapi causaccunata bendiciasha. 15Ñucaca canhuanmi cani, can maita ricpipish, cuidashpami, cai allpaman cutichimusha. Can ñuca nishcata pactachingacaman cantaca manatac saquishachu» nirca.

16Jacobo riccharishpaca: «¡Mandac Diosca caipipish cashcamari! ¡Chaitaca mana yacharcanichu!» nishpami yuyarirca. 17Paica yalli manchaihuan cashpami: «¡Cai pambaca mana yangallachu, Diospacmi cashca! ¡Caipica Diospac huasimari, shinallatac jahua pacha pungumari!» nirca.

18Jacoboca cayandi utca jatarishpami, saunashpa sueñushca rumita japishpa, shuc pilarta shina shayachirca. Chai quipaca aceiteta chai rumipi tallishpami, Diospacllata ruhuarca. 19Shina ruhuashpami, Jacoboca chai pambataca Bet-eltami shutichirca. Ñaupaca chai pambapi tiyac puebloca Luz shutimi carca.

20Chaipimi Jacoboca: «Dioslla, can ñucahuan cashpaca, ñuca rina ñanpi micunatapish, churanatapish cushpa, alli pushangui. 21Can ñuca taitapac huasiman ima llaqui mana tucushcata cutichimushpaca, ñucata Mandac Diosmi cangui. 22Ricunalla cachunmi, pilarta shina, cai ñuca shayachishca rumica Diospac huasi canga. Shinallatac tucui can imalla cushcacunamantaca chungamanta shucta chicanyachishpami canmanca cusha» nirca.

Currently Selected:

GÉNESIS 28: QCA10

Highlight

Copy